تمهید آسمانی: نخستین روز آفرینش نکوهش می‌کند آسمان زمین را

زندگی نے غیب و حضور کی لذت کی خاطر اس نزدیک اور دور جہان کا نقش پیدا کیا ۔ (غیب ہر لحاظ سے کہ وہ نظر نہیں آتا اور حضور اس لحاظ سے کہ کائنات کے ذرے ذرے میں تو اس کا جلوہ کارفرما ہے) ۔

حیات نے سانس کے تاروں کو ایک دوسرے سے کچھ اس طرح علیحدہ کر دیا کہ ایام کے حیرت خانہ کی بنیاد رکھ دی ۔

ہر جگہ خودگری کے ذوق و شوق کے باعث میں اور ہوں اور تو اور ہے کا نعرہ سنائی دے رہا ہے ۔ من دیگرم تو دیگری امیر خسرو کے اس شعر سے ماخوذ ہے ۔

قدرت نے چاند اور ستاروں کو گردش کرنا سکھا دیا اور یوں سینکڑوں چراغ روشن کر دیئے گئے (چاند اور ستاروں کے لیے چراغ کا استعارہ استعمال کیا گیا ہے) ۔

نیلے آسمان پر سورج نے سونے کے تاروں سے بنا ہوا خیمہ نصب کیا جس کی رسیاں چاندی کی طرح سفید تھیں ۔ (رسیوں سے مراد سورج کی کرنیں ہیں ) ۔

افق سے صبح نے سر نکالا اور نئے تخلیق شدہ جہان کو اپنی آغوش میں لے لیا یعنی طلوع و غروب اور صبح و شام کا سلسلہ شروع ہو گیا ۔

آدم کی دنیا اس وقت محض مٹی کا ایک گھر تھا ۔ اس کا بیابان بغیر کسی کاروان کے تھا ۔ دنیا میں زندگی کی کوئی رونق نہ تھی ۔

نہ کسی پہاڑ ہی سے کوئی ندی نبرد آزما تھی (پہاڑ سے کوئی ندی نہیں نکلتی تھی) اور نہ کسی صحرا میں کوئی بادل ٹکڑے ٹکڑے ہو کر گردش کر رہا تھا ۔

نہ شاخوں پر پرندے چہچہا رہے تھے اور نہ سبزہ زار میں ہرن بھاگ دوڑ رہے تھے ۔

اس کائنات کے بحر و بر میں جان کی تجلیاں نہ تھیں ۔ اس کے جسم کی چادر اٹھتا ہوا دھواں تھا ۔

یہاں کے سبزے نے ابھی موسم بہار کی ہوا نہیں دیکھی اور وہ زمین کی گہرائیوں میں سو رہا تھا ۔ (سبزہ اگنا شروع نہیں ہوا تھا ) ۔

نیلے آسمان نے زمین کو طعنہ دیا ۔ میں نے کسی کے حالات ایسے خراب نہیں دیکھے ۔

میری فضا کی وسعتوں میں تیرے جیسا اندھا کہاں ہے ۔ میری قندیل کے بغیر تیرے پاس روشنی کہاں ہے ۔ اندھا استعارہ ہے تاریکی کا ۔

مٹی اگر الوند پہاڑ بن جائے تو بھی وہ مٹی ہی رہتی ہے ۔ وہ کبھی آسمانوں کی طرح روشن اور جاودانی نہیں ہو سکتی ۔

اے زمین تو یا تو دلبری کے سازو سامان یعنی انداز سے زندگی بسر کر یا پھر اپنے کمتر ہونے کی شرم میں مر جا ۔

زمین، آسمان کی اس طعنہ زنی سے شرمسار ہو گئی اور مایوس اور بوجھل دل والی اور مضمحل ہو گئی ۔

وہ خدا کی بارگاہ میں اپنی بے نوری کے درد سے تڑپی، یہاں تک کہ آسمان کے اس پار سے یہ آواز آئی ۔

اے امین تو اپنی امانت سے بے خبر ہے ، تو غم نہ کر اپنے ضمیر کے اندر نظر ڈال یعنی تجھ میں آدم آنے والا ہے جو ایک امانت ہے ۔

تیرے دن زندگی کے ہنگامے سے روشن ہو جائیں گے اور اس روشنی سے نہیں جو تجھے اپنے اطراف میں نظر آ رہی ہے ۔

یہ جو صبح کی روشنی ہے یہ تو داغ دار سورج کی بنا پر ہے جبکہ نورِ جاں زمانے کے گردو غبار سے پاک ہے ۔

روح کا نور راستوں کے بغیر ہی سفر میں رہتا ہے ۔ وہ نورِ جاں سورج اور چاند کی شعاعوں سے بھی زیادہ تیز رفتار ہے ۔

کیا تو (زمین )نے اپنی جان کی تختی سے امید کا نقش دھو ڈالا ہے ۔ نورِ جاں تیری مٹی ہی سے ظاہر ہو گا ۔ مطلب یہ کہ نا امید نہ ہو تیری مٹی ہی سے آدم وجود میں آئے گا ۔

آدم کی عقل جہان پر شب خون مارے گی ۔ اس کا عشق لامکان پر شب خوں مارے گا ۔ یعنی اس کی عقل جہان کو مسخر کرے گی اور اس کا عشق آسمان کو بھی مسخر کر لے گا ۔

اس آدم کا فکر کسی راہبر کے بغیر ہی صحیح راستہ جاننے والا ہو گا اور اس کی آنکھ جبرئیل سے بھی زیادہ بیدار ہو گی ۔

انسان ہے تو مٹی کا بنا ہوا لیکن پرواز میں وہ فرشتے کی مانند ہے ۔ آسمان اس کے راستے کی ایک پرانی سرائے کی مانند ہے ۔ (اس کے آگے زمان و مکان کی کوئی حیثیت نہیں وہ آگے ہی بڑھتا رہتا ہے) ۔

وہ (انسان) آسمان کے وجود میں اس طرح کھٹکتا ہے جس طرح سوئی کی نوک پر ریشمی کپڑے میں چبھی ہوئی ہوتی ہے ۔

وہ وجود کے دامن سے داغ دھبے دھوتا ہے ۔ اس کی نگاہ کے بغیر یہ جہان اندھا اور تاریک ہے ۔

اگرچہ وہ تسبیح نہیں کرتا یا کم کرتا ہے ۔ اور ایک دوسرے کا خون بہاتا ہے (ملاءکہ نے کہا تھا کہ ہم تسبیح و تقدیس کرتے ہیں اور آدم جھگڑالو اور خونریز ہے ) لیکن زمانوں کے لیے وہ مہمیز کا کام کرتا ہے (زمانے کی ترقی اس کی بدولت ہو گی ) ۔

اس کی آنکھ کائنات سے روشن ہو گی تا کہ وہ اس ذاتِ حق کو اس کی صفات کے اندر دیکھے گا ۔

جو کوئی بھی اس ذاتِ حق کے جمال کا عاشق ہو گیا وہ ساری موجودات کا سردار ہو گیا ۔ (یہ شعر مولانا رومی کا ہے