بخش 1 - ارواح رذیله که با ملک و ملت غداری کرده و دوزخ ایشان را قبول نکرده

پیر رومی جو راہِ راست پر چلنے والوں کے پیشوا اور جوان کے ہر مقام سے آگاہ ہیں ۔

مجھ (زندہ رود) سے کہنے لگے کہ اے آسمانوں کی سیر کرنے والے سخت جان مسافر، کیا تو وہ زنار پوش جہان جو سامنے ہے کو دیکھ رہا ہے یہ غداروں کی روح کا ٹھکانا ہے اس لیے زنارپوش کہا، زنار ہندووَں کا مقدس دھاگا) ۔

اس نے اپنی کمر کے گرد جو جنیو (زنار) لپیٹ رکھا ہے وہ اس نے ایک (دم دار) ستارے کی دم سے چرایا ہے ۔

اس سیارہ کا سست رفتاری کی وجہ سے چلنا بھی اس کے ٹھہراوَ ہی کی صورت نظر آتا ہے ۔ اس کے حکم سے ہر نیکی، برائی اور ذلت بن جاتی ہے ۔

اگرچہ اس جہان کا ڈھانچہ (پیکر) پانی اور مٹی سے ہے لیکن اس کی زمین پر پاؤں رکھنا مشکل ہے ۔

ہزاروں فرشتے روزِ آفرینش ہی سے ہاتھوں میں بجلی کے کوڑے لیے خدا کا قہر نازل کر رہے ہیں ۔

یہ فرشتے سیارے پر مسلسل (پیہم) درے مارتے رہتے ہیں ، اور سیارہ کو اس کے مدار سے اکھاڑ ڈالتے ہیں ۔

وہ (فلک زحل) آسمان کا ایک دھتکارا ہوا اور رد کیا ہوا جہان تھا ۔ سورج کی کنجوسی یعنی روشنی نہ دینے کے باعث وہاں کی صبح بھی شام کی مانند تھی ۔

یہ ان روحوں کا ٹھکانا تھا جن کے لیے روزِ قیامت بھی نہیں ہے ۔ ان کی اس غداری کے باعث دوزخ بھی انہیں جلانے کے لیے قبول نہیں کر رہی ۔ یہ روحیں انتہائی قابل نفرت تھیں ۔

ان روحوں میں دو پرانے شیطان (غدار) تھے جنھوں نے اپنے دو جسموں کی خاطر ایک قوم کی روح مار ڈالی تھی ۔

بنگال کا میر جعفر اور دکن کا صادق، یہ دونوں (غدار ، شیطان) انسانیت، دین (مذہب) اور وطن کے لیے باعث شرم تھے ۔

یہ دونوں ناقبول اور نا امید اور نامراد رہے ۔ ان کی غداری سے ملت (قوم) فساد کی نذر ہو گئی ۔

وہ ملت اسلامیہ جس نے ہر محکوم قوم کی غلامی کی زنجیر کھولی تھی، اس کا اپنا ملک اور دین اپنے بلند مقام و مرتبہ سے نیچے گر گیا ۔

کیا تو نہیں جانتا کہ ہندوستان کا خطہ اہل دل حضرات کو دلی طور پر عزیز، محبوب پیارا ہے ۔

جس کا ہر پہلو دنیا کو روشن کرنے والا ہے ۔ اب یہ خاک و خون میں لتھڑا پڑا ہے ۔

اس کی مٹی میں غلامی کا بیج کس نے بویا، یہ سب انہی خبیث روحوں کا کام ہے ۔

(اے زندہ رود) تو اس سیارے کی نیلی فضا میں کچھ دیر کے لیے رک جاتا کہ تو دیکھ لے کہ مکافات عمل کیا ہے ۔