بخش 1 - مقام حکیم آلمانی نیچه

ہر جگہ وجود اور نیستی میں جنگ جاری ہے کوئی بھی اس نیلے آسمان کے راز سے باخبر نہیں ہے (کوئی نہیں جانتا ہے ) ۔

ہر کہیں زندگی کا پیغام لاتی ہے، مبارک ہے وہ شخص جسے یہ علم ہو کہ موت کیا ہے

پر کہیں زندگی ہوا کی طرح ارزاں ہے، بے ثبات ہے اور اسے ثبات کی تمنا بھی رکھتی ہے ۔

میری آنکھوں نے سینکڑوں چھ روزہ جہان دیکھے، تب کہیں جا کر اس کائنات کی حد ظاہر ہوئی ۔

اس جہان کے اپنے چاند اور پروین ستارے ہیں اور ہر کسی میں زندگی کے طور طریقے ایک دوسرے سے مختلف ہیں ۔

ہر جہاں کا وقت دریا کی مانند رواں ہے جو یہاں اس جہان میں تو سست رفتار ہے اور اس جہان میں وہ تیزی سے چل رہا ہے ۔

ہماری دنیا کے سال مہینے ہیں جبکہ وہاں ایک پل ہیں ۔ یہاں کے سال میں تو بارہ ماہ ہیں لیکن وہاں کے سال محض ایک پل ہے ۔

اس جہان میں ہماری عقل ذوفنون ہے لیکن دوسرے جہان میں وہ ذلیل و خوار ہے اس کی کوئی قدر و قیمت نہیں ہے ۔

اسباب اور مقدار کے اس جہان کی سرحد پر ایک مرد درد بھری صدائیں بلند کر رہا تھا ۔

اس کی نگاہیں عقابوں سے بھی زیادہ تیز تھیں ، اس کا چہرہ اس کے سوز جگر کا گواہ تھا ۔

ہر لمحہ اس کے باطنی سوز میں اضافہ ہو رہا تھا، اس کے ہونٹوں پر ایک شعر تھا جو اس نے سو مرتبہ پڑھا ۔

نہ جبرئیل، نہ جنت، نہ کوئی حور اور نہ خداوند، یہ مٹی کا پتلا آدم ہی ہے جو ایک آرزو مند جان کے باعث سلگ رہا ہے ۔

میں نے رومی سے پوچھا کہ یہ دیوانہ کون ہے انھوں نے کہا کہ یہ ایک جرمن دانشمند (نیٹشے) ہے ۔ نیٹشے ایک فلسفی تھا لیکن اس پر مجذوبی کی حالت طاری ہو گئی تھی ۔

اس کا مقام ان دو جہانوں کے درمیان ہے، اس کی بانسری میں وہی پرانا نغمہ ہے ۔

اس حلاج (یعنی نیٹشے) نے جسے سولی پر نہیں لٹکایا گیا ایک مرتبہ پھر وہی پرانی بات نئے انداز سے کہی ہے یعنی انا الحق کی بات ۔

اس کی باتیں بے باک اور اس کے افکار عظیم ہیں ۔ اہل مغرب اس کی گفتگو کی تلوار سے دو ٹکڑے ہیں ۔ اس نے اپنی باتوں یعنی افکار و نظریات سے عیسائی تہذیب و ثقافت کا حلیہ بگاڑ کر رکھ دیا ۔

اس کے ساتھی اس کے جذبے کو نہ پا سکے (نہ سمجھ سکے) انھوں نے اس مجذوب انسان کو دیوانہ سمجھ لیا ۔

عقلمندوں نے جو عشق و مستی کے جذبوں سے محروم ہیں اسکی نبض طبیب کے ہاتھ میں دے دی، یعنی ڈاکٹروں سے اسکا علاج کروایا ۔

معالجوں کے پاس نمائش اور فریب کے سوا اور ہے ہی کیا، افسوس اس مجذوب پر جو افرنگ یا یورپ میں پیدا ہوا ۔

ابن سینا (بہت بڑا طبیب ) نسخہ جات کی بیاض پر دل لگاتا ہے یعنی جو کچھ کتابوں میں تھا ، جو اسی کے مطابق علاج کر جاتا یا پھر اس کی فصد کھولتا یا نیند لانے والی گولی دیتا ہے ۔

وہ (نیٹشے) ایک ایسا حلاج تھا جو اپنے شہر کے اندر بھی اجنبی تھا، ملا یعنی عیسائیوں کے مذہبی پیشواؤں سے تو اس کی جان بچ گئی لیکن طبیبوں نے اسے مار ڈالا ۔

یورپ کے اندر کوئی راہ داں آدمی نہ تھا اس لیے اس (نیٹشے) کا نغمہ ساز کے تاروں سے بڑھ گیا ۔

مسافر (مراد نیٹشے) کو کسی نے راستے کا پتہ نہ بتایا اس لیے اس کی واردات (وارداتِ قلبی) میں سینکڑوں خلل پیدا ہو گئے ۔

وہ نقدی (سونا) تھا، کسی نے اسے کسوٹی پر نہیں لگایا (نہیں پرکھا) کسی مردِ کار (مردِ کامل) نے اسے مردِ کار (باتیں سمجھنے والا نہ بنایا) ۔

وہاں ایک ایسا عاشق تھا جو اپنی آہوں میں کھو گیا تھا (گم رہا) وہ ایک ایسا سالک تھا جو اپنے رستے ہی میں گم ہو گیا تھا (منزل تک نہ پہنچ سکا) ۔

اس کی مستی نے ہر شیشے (نظریہ) کو توڑ ڈالا، وہ خدا سے تو بے تعلق ہوا ہی تھا اپنے آپ سے بھی بے تعلق ہو گیا ۔

اس نے دلبری اور قاہری کے اختلاط کو ظاہری آنکھوں سے دیکھنا چاہا ۔

اس نے چاہا کہ آب و گل یعنی آدم سے باہر نکلے ۔

اسے مقام کبریا کی تلاش تھی ، اور یہ مقام عقل و حکمت سے ماورا ہے ۔

زندگی خودی کے اشاروں یا رمزوں کی شرح ہے، لا اور الا خودی ہی کے مقامات میں سے ہیں ۔

جو لا ہی میں الجھ کر رہ گیا اور الا تک نہ پہنچا اور عبدہ کے مقام سے بیگانہ رہا ۔

مطلب تجلی اس (نیٹشے) کے پہلو میں تھی لیکن وہ اس سے بے خبر رہا ۔

اس کی آنکھوں نے آدم کی رویت (مرد کامل کا نظارہ) کے سوا اور کچھ نہ چاہا، اس نے بیباکانہ نعرہ لگایا کہ آدم (فوق البشر) کہاں ہے ۔

ورنہ وہ تو خود بھی آدمیوں سے بیزار تھا اور حضرت موسیٰ کی طرح خدا کے دیدار کا طالب تھا ۔

کاش وہ کسی احمد یعنی حضرت شیخ احمد سرہندی کے زمانے میں ہوتا تاکہ وہ سرورِ دائم (ہمیشہ رہنے والے سرور) حاصل کر لیتا ۔ وہ اسے سرور سرمدی تک پہنچا دیتے ۔

اس (نیٹشے) کی عقل اپنے آپ سے گفتگو میں لگی ہوئی ہے ۔ تو اپنے راستے پر چل تیرا راستہ ہی بہتر ہے، آگے بڑھ ۔

اے زندہ رود تو قدم آگے بڑھا کہ اب و ہ مقام آ گیا ہے جہاں الفاظ کے بغیر ہی باتیں ہوتی ہیں یہ مقام لاہوت ہے ۔ دوسرا مصرع رومی کی مثنوی کا ہے ۔ اپنے شعر میں رومی نے یہی کہا ہے کہ یہ وہ مقام ہے جہاں الفاظ کے بغیر کلام کرنا ممکن ہے جبکہ عقل اس کا ادراک نہیں رکھتی ۔