سعید حلیم پاشا: شرق و غرب

اہل مغرب کے لیے دانش ہی زندگی کا ساز و سامان ہے جبکہ اہل مشرق عشق کو کائنات کا راز سمجھتے ہیں ۔

دانش عشق سے حق شناس کی معرفت حاصل ہوتی ہے ۔ جبکہ عشق کا معاملہ زیر کی سے مضبوط بنیاد والا بن جاتا ہے ۔

عشق جب دانش سے ہم آغوش ہوتا ہے یعنی جب عشق اور دانش دونوں باہم مل جاتے ہیں تو وہ ایک نئی دنیا کا نقش پیدا کرنے والا بن جاتا ہے ۔

تو اٹھ اور ایک اور ہی دنیا کا نقش ثبت کر یعنی عشق اور زیرکی کو باہم ملا دے ۔

افرنگیوں کے شعلے میں نمی آ گئی ہے یعنی بجھنے والا ہے ۔ ان کی آنکھیں تو دیکھتی ہیں لیکن ان کے دل مردہ ہیں ۔

انھوں نے اپنی ہی تلوار سے خود کو زخمی کر لیا ہے اور اپنے شکار کی طرح زخمی ہو کر گر پڑے ہیں ۔

ان کی انگور کی بیل سے سوز و مستی تلاش نہ کر ۔ ان کے آسمانوں میں کوئی اور زمانہ نہیں ہے ۔

زندگی میں جو سوز و ساز ہے وہ تیری ہی آگ کی وجہ سے ہے ایک نئی دنیا پیدا کرنا تیرا کام ہے ۔

مصطفی کمال کا جو تجدد کا راگ الاپتا رہا کہنا تھا کہ پرانے نقش مٹا دینے چاہیں (اس نے مغربی تہذیب کو رواج دیا) ۔

اگر افرنگ (یورپ) سے اس (کعبہ) کے لات و منات (غلط نظریات کے بت ) آ بھی جائیں تو بھی کعبہ کا سامانِ زندگی نیا نہیں ہو جائے گا ۔ مصطفی اتاترک نے مغربی تہذیب کو فروغ دیا لیکن وہ ایک باطل نقش تھا ۔

ترک کے ساز میں کوئی نیا راگ نہیں ہے ۔ اس کی ہر نئی چیز یورپ والوں کی پرانی چیز کے سوا اور کچھ نہیں ہے ۔ اتاترک نے ترکی جو جدید بنانے کے لیے یورپ کی جو تقلید کی تھی وہ یورپ کی پرانی چیزیں ہیں ۔

اس (مصطفی کمال) کے سینے میں کوئی نیا سانس نہ تھا اور اس کے ضمیر میں کوئی نیا جہان نہ تھا ۔

بے شک اس (اتاترک) نے موجودہ عالم کے ساتھ موافقت اختیار کر لی اور وہ اس عالم کی تپش سے موم کی طرح پگھل گیا ۔

کائنات کی فطرت میں جو جدیدیت ہے وہ زندگی کی تقویم کی بے جا قسم کی پیروی کی وجہ سے نہیں ہے ۔

زندہ دل انسان خود زمانوں اور ادوار پیدا کرتا ہے اس کی جان حقیقت جانے بغیر (دوسروں کی) پیروی سے بے حضور ہو جاتی ہے (اس کی روح تقلید سے مر جاتی ہے) ۔

اگر تو مسلمانوں کا سا حوصلہ رکھتا ہے تو پھر ذرا اپنے ضمیر میں جھانک اور قرآن پر نگاہ ڈال ۔

اس کی آیات میں سینکڑوں نئے جہان موجود ہیں ۔ اس مرد مومن کے زمان میں بہت سے ادوار مضمر ہیں ۔

قرآنِ کریم کی آیات میں موجود جہانوں میں سے دورِ حاضر کے لیے ایک ہی جہان کافی ہے ۔ اگر تیرے سینے میں معنی رس دل ہے تو تو وہ جہان لے لے ۔

بندہَ مومن اللہ تعالیٰ کی نشانیوں میں سے ایک نشانی ہے اور اس بنا پر ہر جہاں اس کے پہلو میں قبا کی مانند ہے ( اس کی قامت پر ہر جہان قبا کی طرح سج جاتا ہے ) ۔

جب کوئی جہان اس کے پہلو میں پرانا ہو جاتا ہے تو قرآن کریم اسے ایک اور نیا جہان عطا کر دیتا ہے ۔

ہم خاکیوں یعنی انسانوں کی کشتی ملاح کے بغیر ہے ۔ کوئی نہیں جانتا کہ قرآن کریم کا جہان کہاں ہے ۔

(افغانی جواب دیتے ہیں ) وہ جہان ابھی تک ہمارے سینوں میں گم ہے اور وہ جہان قم کے انتظار میں ہے ۔

وہ ایک ایسا جہان ہے جس میں نسل اوررنگ میں کوئی امتیاز نہیں ہے ۔ اور اس کی شام فرنگ کی صبح سے بھی زیادہ روشن ہے ۔

وہ ایک ایسا جہان ہے جو آقاؤں اور غلاموں سے پاک ہے ۔

وہ ایک ایسا جہان ہے جو شاداب و تازہ اور دلکش ہے جس کی (جناب رسول پاک) ایک نظر کے فیض نے حضرت عمر کی جان میں اس کا بیج بو دیا ہے ۔

وہ جہان لا زوال (ناپذیر) ہے اور اس کی واردات تازہ بتازہ یعنی قرآن کے پیدا کردہ اس جہان میں نت نئے کارنامے ظہور پذیر ہوتے رہتے ہیں ۔ اس کی محکمات کے برگ و بار تازہ بتازہ ہیں ۔

اس جہان کا باطن تغیر و تبدل (تبدیلیوں ) سے بے غم ہے ۔ اس کا ظاہر ہر لمحہ کا انقلاب ہے ۔

وہ جہان تیرے اندر ہے تو اسے دیکھ ، میں تمہیں اس کے محکمات کے متعلق بتاتا ہوں ۔