پیغام افغانی با ملت روسیه

قرآن کی منزل اور اس کا مقصود اور ہے ۔ مسلمان کے رسم و آئین اور ہیں (آج کا مسلمان قرآن کریم اور اس کی تعلیمات سے دور ہوتا جا رہا ہے ) ۔

اس کے دل میں جلا دینے والی آگ نہیں ہے ۔ اور حضرت محمد مصطفی اس کے سینے میں زندہ نہیں ہیں ۔ اس کے دل میں رسول اللہ کی محبت نہیں رہی ۔

بندہَ مومن نے قرآن سے فائدہ نہیں اٹھایا ۔ میں نے اس کے پیالے میں نہ تو شراب ہی دیکھی ہے اور نہ تلچھٹ ہی دیکھی ہے ۔

اس نے خود ہی قیصر و کسریٰ کا طلسم توڑا اور اب خود ہی شاہی تخت پر بیٹھ گیا ۔

جوں جوں مسلمانوں کی سلطنت کا درخت قوت پکڑتا گیا اس کے دین نے ملوکیت کا نقش اپنا لیا ۔

ملوکیت سے نگاہ کا انداز ہی بدل جاتا ہے جس کے نتیجے میں عقل و ہوش اور رسم و رہ سب بدل جاتے ہیں ۔

اے روسی قوم تو نے جو ایک نئے نظام کی بنیاد رکھی ہے اور پرانے حیات و سلطنت کے دستور سے دل ہٹا لیا ہے (کمیونزم کی بنیاد رکھ کر شاہی نظام کو ختم کر دیا ) ۔

تو نے بھی دنیا میں ہم مسلمانوں کی طرح قیصریت (ملوکیت) کی ہڈی توڑ ڈالی ہے ۔ (شاہی نظام ختم کر دیا ہے ) ۔

تو اپنے ضمیر میں کوئی چراغ روشن کر لے یا کر سکے تو ہم مسلمانوں کی سرگزشت سے عبرت حاصل کر ۔

تو اس جنگ میں مضبوطی سے اپنے پاؤں جما لے ۔ اور لات و ہبل کے گرد پھر طواف نہ کر ۔

اس پرانی دنیا کو اب ایک ایسی ملت کی آرزو ہے جو بشیر بھی اور نذیر بھی ہو ۔

تو پھر سے مشرقی قوموں کی طرف واپس آ جا ۔ اس لیے کہ تیرے زمانے مشرق کے زمانوں سے وابستہ ہیں ۔

اب تو نے اپنی جان میں ایک نیا سوز پیدا کیا ہے ۔ تیرے ضمیر میں روز و شب بھی اب نئے ہیں ۔

افرنگ ، یورپ کے دین و آئین اب پرانے ہو چکے ہیں ۔ تو اس پرانے مندر کی طرف مت دیکھ ۔

تو نے پرانے آقاؤں کا کام تمام کر دیا ہے ۔ اب تو لا کی منزل سے گزر کر الا کی جانب چل ۔

اگر تجھ میں تلاش و جستجو کا مادہ ہے تو لا کی منزل سے گزر جا کیونکہ جب تو اثبات کی راہ اختیار کرے گا تو تو زندہ و جاوید ہو جائے گا ۔ (اثبات سے مراد ہے خدا تعالیٰ او ر اس کے ابدی نظام کا اقرار اور اس پر ایمان ) ۔

اے ملت روسیہ تو جو ایک عالم گیر نظام قائم کرنے کی آرزومند ہے کیا تو نے اس کے لیے کوئی مضبوط بنیاد تلاش کر لی ہے

تو (روسی قوم) نے پرانی داستان کا ایک ایک باب دھو ڈالا ہے ۔ تو اب قرآن کریم سے اپنی فکر روشن کر ۔

سیاہ فاموں کو کس نے ید بیضا دیا قیصر و کسریٰ کی نفی کی خوشخبری کس نے دی

فرنگیوں کے رنگا رنگ جلوے ہیں ان پر توجہ نہ دے، ان سے دور رہ اور فرنگ کے دیے ہوئے ان جلووں کو ترک کر کے خود کو پا لے ۔

اگر تو اہلِ مغرب کے مکر و فریب سے باخبر ہے ۔ تو پھر لومڑی پن چھوڑ دے اور شیر کی سی خصلت پیدا کر لے ۔

یہ لومڑی پن کیا ہے یہ محض دنیاوی سازوسامان کی تلاش ہے جبکہ اللہ کا شیر آزادی یا موت کی تلاش کرتا ہے ۔

قرآن کے بغیر شیری بھی لومڑی پن ہے اور قرآن کا فقر اصل شہنشاہی ہے ۔

قرآن کا فقر ذکر اور فکر کا اختلاط ہے ۔ میں نے ذکر کے بغیر فکر کو کامل نہیں دیکھا ۔

ذکر کیا ہے ذکر کو ادب سکھانا ہے اور یہ جان (روح) کا کام ہے نہ کہ زبان و لب کا ۔

(اللہ کے ) ذکر سے سینے کو جلا دینے والے شعلے پیدا ہوتے ہیں اور یہ ابھی تک تیرے مزاج کے ساتھ موافقت نہیں رکھتے ۔

تو اے فکر کے حسین و جمیل محبوب پر مر مٹنے والے (روسی) میں تجھے فکر کی تجلیوں سے آگاہ کرتا ہوں ۔

قرآں کیا ہے قرآن آقا کے لیے موت کا پیغام ہے اور بے ساز و سامان یا مفلس غلام کا مددگار ہے ۔

تو دولت کے پجاری آدمی سے کسی خیر (بھلائی) کی توقع نہ رکھ ، قرآن پاک کا ارشاد ہے کہ تم نیکی نہیں پا سکتے جب تک کہ تم اللہ کی راہ میں اپنی محبوب ترین چیز خرچ نہ کرو ۔

سود سے آخر کیا پیدا ہوتا ہے فتنے ہی پیدا ہوتے ہیں ۔ کوئی بھی قرض حسنہ کی لذت سے آشنا نہیں ہے ۔

ربا (سود) سے جان سیاہ ہو جاتی ہے اور دل اینٹ پتھر کی مانند ہو جاتا ہے اور انسان دانتوں اور پنجوں کے بغیر درندہ بن جاتا ہے ۔

اپنا رزق زمین سے حاصل کرنا جائز ہے یہ (زمین) بندے کی متاع تو ہے لیکن حقیقی ملکیت اللہ ہی کی ہے ۔

بندہَ مومن اللہ کی زمین کا امین ہے جبکہ مالک اللہ ہی ہے حق کے سوا جو کچھ بھی تجھے نظر آتا ہے وہ ہلاک ہونے والا ہے ۔ قرآنی آیت کا حوالہ اللہ تعالیٰ کے چہرے کے سوا ہر چیز ہلاک ہونے والی ہے ۔

پرچم حق بادشاہوں نے سرنگوں کر دیا ۔ یوں ان کی مداخلت سے بستیاں تباہ و برباد ہو گئیں ۔ بے شک جب بادشاہ کسی بستی میں داخل ہوتے ہیں تو اس کو تباہ و برباد کر دیتے ہیں اور اس کے معزز لوگوں کو ذلیل و خوار کر دیتے ہیں ۔

ہمارا رزق ایک دستر خوان سے ہے ۔ آدم کا خاندان گویا ایک نفس ہے ۔

جب قرآن کا نقش اس جہان پر ثبت ہوا تو برہمنوں اور پادریوں کے نقش مٹ گئے ۔

میرے دل میں جو کچھ پوشیدہ ہے وہ میں واضح طور پر بیان کرتا ہوں اور وہ یہ کہ یہ (قرآن) کوئی کتاب نہیں ہے کچھ اور ہی چیز ہے ۔

جب یہ (قرآن) روح میں سما جاتا ہے تو جان کچھ اور ہی ہو جاتی ہے اور جب جان کچھ اور ہو جاتی ہے تو دنیا بھی کچھ اور ہو جاتی ہے ۔ یعنی جان بدل جائے تو جہان بدل جاتا ہے ۔

حق کی مانند یہ (قرآن کریم) چھپا ہوا بھی ہے اور ظاہر بھی ہے ۔ یہ زندہ، ہمیشہ رہنے والا یعنی لافانی اور بولنے والا ہے ۔

اس کے اندر مشرق و مغرب کی تقدیریں پنہاں ہیں ۔ تو انہیں سمجھنے کے لیے خود میں بجلی کی سی تیزی فکر پیدا کر ۔

قرآن کریم مسلمانوں سے یہ کہتا ہے کہ تم اپنی جان ہتھیلی پر رکھ لو اور جو کچھ تمہاری ضرورت سے زیادہ ہے اسے دوسروں یعنی مفلسوں کو دے دو ۔

تو (روسی قوم) نے اور طرح کا شرع اور آئین بنا لیا ہے تو ان قوانین کو ذرا قر آن کی روشنی میں دیکھ ۔

تاکہ تو زندگی کی اونچ نیچ (اچھائی برائی) سے آگاہ ہو جائے اور زندگی کی تقدیر بھی تجھ پر واضح ہو جائے ۔

ہماری محفل شراب اور ساقی کے بغیر ہے مگر قرآن کے ساز کے نغمے اپنی جگہ برقرار ہیں ۔

اگر ہماری مضراب میں کوئی اثر نہیں رہا تو آسمان کے پاس ہزاروں اور سازندے موجود ہیں ۔

خدا تعالیٰ کا ذکر قوموں سے بے نیاز ہے ۔ وہ زمان و مکان دونوں سے بے نیاز ہے ۔

ذکر حق ہر ذاکر کے ذکر کرنے سے الگ (اسکی اپنی الگ حیثیت ہے ) اسے روم اور شام کی کیا حاجت ہے یعنی کوئی ضرورت نہیں ۔

اگر اللہ تعالیٰ اسے (قرآن کو) ہمارے سامنے سے اٹھا لے تو وہ اسے کسی اور قوم کے سامنے رکھ دے گا ۔

میں نے مسلمانوں میں دوسروں کی بلاوجہ کی پیروی اور قیاس کو دیکھا ہے اس سے میری جان ہر لمحہ جسم میں لرزتی رہی ہے ۔

میں اس دن سے ڈرتا ہوں کہ مسلمان کو قرآن سے محروم نہ کر دیا جائے ۔ اور مولا کریم اپنے عشق کی آگ کسی اور کے دل پر نہ ڈال دے ۔

پیر رومی جو سراپا سوز و درد ہیں ان کی جان پر افغانی کی بات نے کیا اثر کیا میں ہی جانتا ہوں ۔

ان (رومی) کے دل سے ایک جگر سوز آہ نکلی ۔ ان کی آنکھوں سے آنسو نکلے جو شہید کے خون سے بھی زیادہ رنگین تھے ۔

وہ شخصیت (رومی) جس کی نگاہ کے تیر نے بندگانِ حق کے دلوں کے سوا اور کسی کو نہیں چھیدا ، اس نے افغانی کی طرف دیکھا اور کہا ۔

دل کو شفق کی مانند خون میں رنگ لینا چاہیے اور اپنا ہاتھ اللہ کی فتراک میں دینا چاہیے ۔

جان امید سے ہی بہتی ہوئی ندی کی مانند بنتی ہے ۔ امید ترک کر دینا جان کی ہمیشہ کی موت ہے ۔ ارشاد باری تعالیٰ ہے کہ اللہ کی رحمت سے مایوس نہ ہو ۔

پھر رومی نے میری طرف دیکھا اور کہنے لگے کہ اے زندہ رود دو ایک شعروں سے وجود کے اندر کی آگ لگا یعنی ایسے اشعار سنا جن کو سن کر دل میں سوز جذبہ پیدا ہو جائے ۔

ہماری اونٹنی تھک چکی یا بیمار ہے اور محمل بوجھل ہے (اب) ضروری ہے کہ ساربان کا نغمہ زیادہ تلخ ہو ۔

اللہ کے پاک بندوں کی آزمائش مصائب سے ہوتی ہے ، پیاسوں کو زیادہ پیاسا کرنا جائز ہے ۔

حضرت موسیٰ کلیم اللہ کی طرح تو دریائے نیل سے گزر جا اور خلیل کی طرح آگ کی طرف قدم بڑھا ۔

ایسا مردانہ نغمہ سنا جس سے دوست (محبوب حقیقی) کی خوشبو آئے تاکہ ملت کو دوست کے کوچے میں لے جائے ۔