اشتراک و ملوکیت

حضرت ابراہیم خلیل اللہ کی نسل سے ایک آدمی (یہودی کارل مارکس) جو کتاب سرمایہ کا مصنف ہے وہ گویا جبرئیل کے بغیر ایک (جھوٹا) پیغمبر ہے ۔

چونکہ حق اس کے باطل میں چھپا ہوا ہے اس لیے اس کا دل تو مومن ہے لیکن اس کا دماغ کافر ہے ۔

اہلِ مغرب نے افلاک (روحانیت) کو گم کر دیا ہے ۔ وہ پیٹ میں جانِ پاک تلاش کرتے ہیں ۔

جانِ پاک (روح) بدن سے رنگ و بو حاصل نہیں کرتی ۔ اشتراکیت کا تعلق صرف جسم سے ہے ۔

اس حق ناشناس یعنی خدا کے منکر پیغمبر (کارل مارکس) کا دین پیٹ کی مساوات کی بنیاد پر قائم ہے ۔

چونکہ اخوت کا مقام دل کے اندر ہے اس لیے اس کا بیج دل ہی کے اندر ہے، جسم (شکم) میں نہیں ۔

ملوکیت (سرمایہ داری) بھی جسم ہی کے موٹاپے کا نام ہے ۔ اس کا بے نور سینہ دل سے خالی ہے ۔

اس ملوکیت کی کیفیت شہد کی اس مکھی کی سی ہے جو پھول پر چرتی ہے ۔ پتے چھوڑ دیتی ہے اور اس سے شہد لے لیتی ہے ۔

پھول کی شاخ اور پتیاں اور اس کا رنگ اور خوشبو اپنی اصل حالت ہی میں رہتے ہیں اور اس پھول کے حسن پر بلبل کا نالہ بھی ویسا ہی رہتا ہے ۔

تو (اقبال) اس پھول کے رنگ و بو کے طلسم سے گزر جا اس کی صورت چھوڑ اور معنی پر غور کر حقیقت یا باطن پر توجہ کر ۔

اگرچہ باطن کی موت کو دیکھنا مشکل ہے تاہم تو پھول کو (جو شہد سے خالی ہو چکا ہے) پھول نہ کہہ اس لیے کہ وہ حقیقت میں مٹی ہے ۔

اشتراکیت و ملوکیت دونوں ایسے نظام ہیں جن میں روح عدم اطمینان اور بیقراری کی شکار ہے اور یہ دونوں نظام حق ناشناس اور انسانوں کو دھوکے فریب دیتے ہیں ۔

زندگی اس (اشتراکیت) کے لیے گویا ملوکیت اور مذہب کے خلاف بغاوت کا نام ہے جبکہ اس (ملوکیت) کے لیے یہ خراج ہے ۔ یعنی لوگوں پر مختلف صورتوں میں (ٹیکس وغیرہ) ستم ڈھا کر خزانے جمع کرنے کا نام ہے جس کے نتیجے میں آدمی ان دو پتھروں کے درمیان گویا شیشہ کی طرح پس رہا ہے ۔

یہ (اشتراکیت) علم و مذہب اور ہنر و فن کے ذریعے معاشرے میں توڑ پھوڑ کرتی ہے جبکہ وہ (ملوکیت) بدن سے روح اڑا لیتی اور ہاتھ سے روٹی لے جاتی یا چھین لیتی ہے ۔

میں نے دونوں کو مادیت یا مادہ پرستی میں غرق دیکھا ہے اور دونوں کے جسم تو روشن ہیں لیکن دل تاریک ہیں ۔

زندگی تو سوز و ساز کا نام ہے (جسے ساختن یعنی موافقت کرنا کے ساتھ سوختن یعنی جلنا، سوز کہا گیا ہے) اور زندگی بدن میں دل کا بیج بونے کا نام ہے ۔