بخش 5 - تذکیر نبیهٔ مریخ

اے عورتو، اے ماؤں اے بہنو! یہ دلبروں کی سی زندگی کب تک گزارو گی (بسر کرو گی) ۔

دلبری دنیا میں مظلومی ہے ۔ دلبری محکومی اور محرومی کا نام ہے ۔

ہم اپنی دو زلفوں میں کنگھی کرتی ہیں اور اس طرح مرد کو اپنا شکار سمجھتی ہیں ۔

،مگر مرد (ظالم) تو ہمارا شکار بن کر الٹا ہمیں اپنا شکار بناتا ہے ۔ وہ تو تیرے (عورت) کے گرد اس لیے پھرتا ہے تاکہ تجھے وہ فریب دے کر اپنا غلام بنا لے ۔

اس (مرد) کی خود گدازیاں مکر و فریب ہیں ۔ اس کا درد و داغ اور آرزو سب مکر و فریب ہیں ۔

اگرچہ وہ کافر (مرد) تجھے اپنا حرم بناتا ہے لیکن درحقیقت وہ تجھے درد و غم میں مبتلا کرتا ہے ۔

اس کا ہم پہلو ہونا زندگی کا بڑا دکھ ہے ۔ اس کا وصل زہر اور اس کا فرق مصری کی ڈلی ہے ۔

وہ مرد ایک بل کھاتا ہوا سانپ ہے ۔ اس کی پیچ و خم سے بچو ، اس کے زہر کو اپنے خون میں نہ ڈالو ۔

ماں بننے سے ماؤں کا چہرہ زرد ہو جاتا ہے ۔ شوہروں کے بغیر آزادی کتنی اچھی ہے ۔

مجھ پر خدا کی طرف سے لگاتار وحی نازل ہو رہی ہے اور یہ میرے ایمان کی لذت میں اضافہ کرتی ہے ۔

اب وہ وقت آ رہا ہے کہ سائنس کے معجزے سے عورت کے بدن کے اندر جنین کو رحم کے اندر دیکھا جا سکے گا ۔

وہ وقت قریب ہے جب تم زندگی کی کھیتی سے اپنے حسب خواہش پیداوار حاصل کر سکو گی ۔ اپنی مرضی کے مطابق بیٹے یا بیٹیاں حاصل کر سکو گے ۔ یورپ نے علامہ کی ان باتوں کو سو فیصد درست ثابت کر دیا ہے ۔

اگر پیٹ میں بچہ ہماری خواہش کے مطابق نہ ہو گا تو بے خوف ہو کر اسے مار ڈالنا بھی ہمارا عین دین ہو گا ۔

اس زمانے کے بعد اور بھی کئی زمانے آئیں گے جن میں اور نئے نئے راز بھید ظاہر ہو ں گے ۔

ماں کے پیٹ میں بننے والا بچہ کچھ اور ہی ڈھب سے پرورش پائے گا، ماں کے پیٹ یعنی رحم میں رات بغیر صبح ہو جائے گی (ٹیسٹ ٹیوب بچے پیدا ہوں گے ) ۔

تاکہ مرد جو سراپا شیطان ہے وہ پرانے زمانے کے ان حیوانات کی طرح مر جائے جن کا دنیا میں اب کوئی وجود نہیں ہے ۔

لالہ کے پھول کے داغ کے بغیر اور پاک دامنی کے ساتھ شبنم کا احسان اٹھائے بغیر مٹی سے اگا کرینگے (مرد کے بغیر بچے پیدا کرو گی) ۔

زندگی کے راز خود بخود ظاہر ہو جائیں گے اور زندگی کا ساز مضراب کے بغیر ہی نغمہ پیدا کرے گا یعنی جنسی فعل کے بغیر بھی بچے پیدا ہو جایا کریں گے ۔

ابر نیساں سے جو قطرہ نیچے گرتا ہے اے سیپی (عورت) تو سمندر کی تہ میں پیاسی مر جا ۔

اٹھ اور فطرت کے ساتھ نبرد آزما ہو جا تاکہ تیری جنگ سے عورت مرد کی غلامی سے آزاد ہو جائے ۔

دو جسموں سے آزاد ہونا ہی عورت کی توحید ہے ، تو اپنی خود محافظ بن جا اور مرد پر کسی قسم کا ناز نہ کر ۔

تو (زندہ رود) ذرا نئے آئین والے زمانے کے مذہب کو دیکھ، اور ایک لادین تہذیب کے اثرات یا نتاءج کا حاصل دیکھ لے (یہ بات اس نبیہ کے وعظ کے حوالے سے کہی ہے ) ۔

(حقیقت یہ ہے کہ ) زندگی کا آئین و شرع عشق ہے ۔ تہذیب کی اصل دین ہے اور دین عشق ہے ۔

عشق کا ظاہر سوزناک اور آتشیں ہے اور اس کا باطن رب العالمین کا نور ہے ۔

اس (عشق) کے اندرونی تب وتاب سے علم و فن وجود میں آتے ہیں ، اسکے بے شمار ہنروں سے آگاہ جنوں سے علم و فن پیدا ہوتے ہیں ۔

آدابِ عشق کے بغیر دین پختہ ، مضبوط نہیں ہوتا ۔ تو (زندہ رود) اہل عشق کی صحبت و نگاہ سے دین حاصل کر ۔