زروان که روح زمان و مکان است مسافر را به سیاحت عالم علوی می‌برد

مولانا رومی کے کلام سے میری جان بے چین ہو گئی اور میرے جسم کا ہر ذرہ پارے کی طرح ہو گیا (تڑپنے لگا) ۔

اچانک میں نے دیکھا کہ مغرب اور مشرق کے درمیان آسمان نور کے ایک بادل میں ڈوبا ہوا ہے ۔

اس بادل میں سے ایک فرشتہ نیچے اترا ۔ اس کے دو چہرے تھے ایک آگ کی مانند ، دوسرا دھوئیں کی مانند ۔

دھوئیں والا چہرہ رات کی طرح تاریک اور آگ والا چہرہ ستارہ شہاب کی طرح روشن تھا ۔ آگ والے چہرے کی آنکھ بیدار اور دھوئیں کے چہرے والی آنکھ سوئی ہوئی تھی یا نیند میں تھی ۔

اس کے بال سرخ اور زرد رنگ کے، نیز سبز و سفید اور نیلے اور لاجوردی تھے ۔

اس کے مزاج میں خیال کی سی تیز رفتاری تھی اور زمین سے کہکشاں تک کا سفر اس کے لیے ایک پل کا سفر تھا ۔ (ایک لمحہ میں طے کر لیتا تھا ) ۔

ہر زمان اس میں ایک نئی خواہش پیدا ہوتی تھی اور ہر پل ایک نئی فضا میں پرواز کرتا تھا ۔

وہ کہنے لگا میں زروان ہوں اور اس جہان پر میرا تسلط ہے ۔ میں نگاہ سے پنہاں بھی ہوں اور ظاہر بھی ہوں ۔

ہر تدبیر میری تقدیر سے وابستہ (بندھی ہوئی ) ہے ۔ بولنے والے اور نہ بولنے والے سبھی میرے شکار ہیں ۔

شاخ کے اندر غنچہ میری وجہ سے پھوٹتا ہے اور پرندہ آشیانے میں میری وجہ سے فریادی ہے ۔

دانہ میری ہی پرواز سے درخت بنتا ہے اور ہر فراق میرے فیض سے وصل بنتا ہے ۔ تبدیل ہوتا ہے ۔

میں عتاب بھی لاتا ہوں اور خطاب بھی اور میں ہی کسی کو پیاسا بناتا ہوں تا کہ اس کے لیے پینے کی چیز لاؤں ۔

میں ہی زندگی ہوں ، میں ہی موت ہوں ، میں ہی قیامت ہوں ۔ میں ہی حسابِ حشر ہوں ، میں ہی دوزخ ہوں اور میں ہی فردوس اور میں ہی حور ہوں ۔

آدمی اور فرشتہ دونوں میرے اسیر یا قیدی ہیں ۔ یہ چھ روزہ جہان میری اولاد ہے ۔

ہر وہ پھول جو تو شاخ سے توڑتا ہے وہ میں ہوں اور ہر وہ چیز جو تو دیکھتا ہے اس کی ماں میں ہوں ۔

یہ جہان میرے طلسم میں اسیر ہے اور میرے دم یا میری سانس سے یہ جہان ہر لمحہ بوڑھا ہو رہا ہے ۔

جس کسی کے بھی دل میں لی مع اللہ کا نقش بیٹھ گیا اس جواں مرد آدمی نے میرا جادو توڑ دیا (لی مع اللہ کی رمز سے واقف انسان وقت پر قابو پا لیتا ہے اور زمانہ اس کی غلامی میں آ جاتا ہے ) ۔

اگر تو یہ چاہتا ہے کہ میں درمیان میں نہ رہوں تو پھر تو لی مع اللہ کو دوبارہ دل و جان سے پڑھ ۔

میں نہیں جانتا اس کی نگاہ میں کیا تھا کہ اس نے میری نگاہ سے یہ پرانا جہان اڑا لیا (اوجھل ہو گیا) ۔

یا تو میری نگاہ کسی اور جہان پر کھل گئی یا پھر وہی پرانا جہان سارا تبدیل ہو گیا ۔

میں اس رنگ و بو کی کائنات میں تو مر گیا اور ایک ہنگاموں اور شور و غوغا سے خالی جہان میں پیدا ہو گیا ۔ (عالم سفلی سے عالم علوی پہنچنا مراد ہے ) ۔

میرا تعلق اس پرانے جہان سے ختم ہو گیا اور ایک نئی دنیا میرے ہاتھ لگی ۔

ایک جہان کے نقصان سے میری جان تڑپ اٹھی ۔ یہاں تک کی میری خاک سے ایک نئے جہان نے جنم لیا ۔

میرا جسم پہلے سے زیادہ ہلکا ہو گیا اور جان (روح) پہلے سے زیادہ تیز رفتار ہو گئی جبکہ میرے دل کی آنکھ پہلے سے زیادہ دیکھنے والی اور پہلے سے زیادہ بیدار ہو گئی ۔

چھٹی ہوئی اشیا بے پردہ ہو کر ظاہر ہو گئیں اور میرے کانوں نے ستاروں کا یہ گیت سنا ۔