زمزمهٔ انجم

تیری عقل زندگی کا حاصل ہے اور تیرا عشق کائنات کا راز ہے ۔ اے مٹی کے پیکر یعنی اے خاکی انسان (اقبال) تو اس عالم جہات سے اس طرف خوشی خوشی آ (اس طرف آنا تجھے مبارک ہو) ۔

زہرہ اور چاند اور مشتری تیری وجہ سے ایک دوسرے کے رقیب بن گئے ہیں ۔

محبوب حقیقی کی راہ میں نت نئے اور تازہ جلوے ہیں ۔ جو کوئی صاحب شوق اور آرزو والا ہے وہ کلیات ہی کو دل نہیں دیتا یا اس سے ہی دل نہیں لگاتا ۔

زندگی صدق و صفا کا نام ہے ۔ زندگی نشوونما کا نام ہے ۔ تو ازل سے ابد تک گھوڑا دوڑا (تگ و تاز جاری رکھ) زندگی تیرے خدا کا ختم نہ ہونے والا ملک ہے ۔

تو اپنے غزل سرائی کے شوق کو ہائے و ہو (نالہ و فریاد کرنے) کی اجازت دے ۔ ایک بار پھر رند اور محتسب کو مٹکے بھر بھر کے شراب دے ۔

شام اور عراق اور ہند اور ایران کے مسلمان مصری شیرینی کے عادی ہو چکے ہیں ۔ ان مصری کھانے کے عادیوں میں آرزو کی تلخی پیدا کر ۔ ان میں بڑھنے کا جذبہ پیدا کر ۔

اس خاطر کہ وہ بلند موجوں والے سمندر سے معرکہ آرائی کا آغاز کرے تو ندی کے دل کو تیز رفتار سیلاب کی لذت عطا کر ۔

مردِ درویش، فقیر آدمی آگ ہے جبکہ امیری اور شہنشاہی تنکا ہیں ۔ بادشاہوں کی شان وشوکت کو مٹانے کے لیے حق و صداقت پر مبنی ایک صاف اور بے باک بات کافی ہے ۔

قلندری دبدبہ سارے کا سارا حضرت موسیٰ کلیم اللہ کا جذبہ ہے ۔ جبکہ طنطنہ سکندری سراسر سحر سامری ہے ۔ (سامری کے جادو کا توڑ حضرت موسیٰ نے کیا تھا ۔ کلیمی یا قلندری صاحب بقا ہے جبکہ سکندری و سامریت کو فنا ہے ) ۔

قلندر تو نگاہ سے مارتا ہے جبکہ بادشاہ فوج کے ذریعے قتل و غارت کرتا ہے ۔ یعنی قلندر اپنی نگاہِ فیض اثر سے دلوں پر قابو پا لیتا ہے ۔ اور یوں کسی قتل و غارت گری کے بغیر اور انسانوں کی آزادی چھینے بغیر انہیں اپنا گرویدہ بنا لیتا ہے ۔

یہ دونوں قلندر اور بادشاہ دنیا کو فتح کرتے ہیں اور دونوں بقا کے آرزومند ہیں دوام چاہتے ہیں ۔ بادشاہ تو قہر و غضب اور ظلم و ستم کی دلیل سے ایسا چاہتا ہے جبکہ قلندر دلبری کی دلیل سے ایسا کرتا ہے ۔

ضرب قلندری پیدا کر (اور اس سے) سدّ سکندری توڑ ڈال؛ حضرت موسیؑ کی روایت تازہ کر، سامری کی رونق ختم کر دے۔

ترجمہ: میاں عبدالرشید