بخش 1 - این زمین و آسمان ملک خداست

یہ زمین اور آسمان خدا تعالیٰ کی ملکیت ہیں ۔ یہ چاند یہ پروین ستارہ یعنی ستارے سب ہماری میراث ہیں ۔

اس راستے میں جو کچھ نظر آ رہا ہے اے مسافر تو اسے محرمانہ نگاہوں سے دیکھ ۔

تو اپنے شہر میں اجنبیوں کی طرح مت چل، اے کہ تو خود کو گم کیے ہوئے ہے ذرا بیباکی اختیار کر ۔

یہ اور وہ ساری اشیاء تیرا حکم دل و جان سے مانتی ہیں ۔ اگر تو کسی شے سے کہے کہ یہ مت کہ وہ کر تو وہی کچھ کرے گی ۔

یہ جہان آنکھ اور کانوں کے بتوں کے علاوہ اور کچھ نہیں ۔ اس کا ہر آنے والا کل گزرے ہوئے کل کی طرح مر جاتا ہے ۔

تو طلب (تلاش) کے بیابان میں دیوانہ ہو جا یعنی اس بت خانہ کا ابراہیم بن جا (تو اپنی معرفت حاصل کر، بتوں کو توڑ کر توحید پرست ہو جا جس طرح حضرت ابراہیم ہو ئے تھے ) ۔

جب تو زمین اور آسمان کو طے کر لے اور اس جہان اور اس جہان کو طے کر لے ۔

تو پھر بھی آرام سے نہ بیٹھو بلکہ خدا سے سات آسمان اور طلب کر اور سینکڑوں نئے زمانے اور مکان طلب کر ۔

بہشت کی ندی کے کنارے بے خود پڑے رہنا اور نیکی اور بدی کی جنگ سے بے نیاز پڑے رہنا کوئی زندگی نہیں ۔

اگر نجات کا مطلب جستجو سے نجات پانا ہے تو پھر اس رنگ و بو کی بہشت سے قبر بہتر ہے ۔

اے مسافر یہ سمجھ لے کہ قیام سے جان مر جاتی ہے ۔ اور مسلسل پرواز سے روح اور بھی زیادہ زندہ ہو جاتی ہے ۔

ستاروں کے ساتھ ہم سفر ہونا ایک اچھی بات ہے اور سفر میں ذرا بھی آرام نہ کرنا اچھی بات ہے ۔

جب میں (یعنی اقبال) فضاؤں میں مصروف سفر ہوا تو جو کچھ اوپر تھا وہ نیچے نظر آنے لگا ۔

تاریک مٹی (زمین ) اب مجھے رات کی قندیل سے زیادہ دکھائی دینے لگی ۔ میرا سایہ میرے سر پر تھا ، کیسی عجیب بات تھی ۔

ہر لمحہ ہم چاند سے نزدیک تر ہوتے چلے گئے یہاں تک کہ چاند کے پہاڑ نظر آنے لگے ۔

رومی نے کہا تو (اقبال) وہم و گمان سے پاک ہو جا اور آسمانوں کے رسم و رہ کا عادی ہو جا ۔

چاند ہم سے اگرچہ دور ہے مگر وہ ہم سے آشنا ہے ۔ یہ ہمارے سفر کے راستے کی پہلی منزل ہے ۔

اس چاند کے زمانے کے دیر اور زود (زمان و مکان) دیکھنے کے لائق ہیں ۔ اس کے کوہسار کی غاریں دیکھنے کے قابل ہیں ۔

وہ خاموشی اور وہ کوہسار بھیانک ، ڈراوَنا تھا ۔ اس (چاند) کا اندر تو پرسوز تھا لیکن اس کا ظاہر چاک چاک (پھٹا پھٹا) سا تھا ۔

وہاں خافطین اور یلدرم نام کے سینکڑوں پہاڑ تھے جن کے دہانوں پر تو دھواں تھا لیکن ان کے پیٹ میں آگ تھی ۔ (آتش فشاں پہاڑ تھے) ۔

اس کے اندر سے سبزے نے سر نہ نکالا تھا اور اس کی فضا میں کوئی پرندہ محو پرواز نہ تھا ۔ (جہاں نہ سبزہ تھا اورر نہ کوئی پرندہ تھا) ۔

وہاں کے بادلوں میں نمی نہ تھی اور ہوائیں تندو تیز تھیں ۔ یہ بادل اور ہوائیں اس کی مردہ زمین سے برسر پیکار تھیں ۔

وہ ایک فرسودہ جہان تھا جو رنگ اور آواز سے خالی تھا، نہ وہاں زندگی ہی کے کوئی آثار نظر آ رہے تھے اور نہ موت ہی کے آثار نظر آ رہے تھے ۔

نہ تو اس کی ناف میں زندگی کے درخت کی کوئی رگ تھی اور نہ اس کے زمانے کی پشت ہی میں حادثات تھے ۔

اگرچہ وہ (چاند) سورج ہی کے خاندان سے ہے لیکن اس کی صبح اور شام کوئی انقلاب پیدا نہیں کرتی ۔

رومی نے کہا اٹھ اور قدم آگے بڑھا، تو بیدا رمقدر کو ہاتھ سے مت دے ۔

اس (چاند) کا باطن (اندرون) اس کے ظاہر سے بہت اچھا ہے ۔ اس کی غاروں کے اندر ایک اور ہی دنیا ہے ۔

اے صاحب ہوش و خرد (اقبال) جو کچھ بھی تیرے سامنے آئے اسے تو اپنے چشم و گوش کے حلقوں میں لے لے ۔

اگر آنکھ دیکھنے والی ہے تو ہر شے دیکھنے کے لائق ہے ۔ اور وہ نگاہ کے ترازو میں تولنے کے لائق ہے ۔

رومی جہاں کہیں تجھے لے جائے تو وہاں چل اور ایک دو پل کے لیے اس (رومی) کے سوا ہر شے سے بیگانہ ہو جا ۔

اس نے آہستہ سے میرا ہاتھ اپنی طرف کھینچا اور تیز چلتے ہوئے ایک غار کے کنارے پہنچ گیا ۔