بخش 1 - ارواح جلیلهٔ حلاج و غالب و قرةالعین طاهره که به نشیمن بهشتی نگرویدند و به گردش جاودان گراییدند

میں اپنے اس دیوانے دل کے قربان جاؤں جو ہر لمحہ مجھے ایک نیا ویرانہ عطا کرتا ہے ۔

جب میں ایک منزل پر ٹھہرتا ہوں تو (دل) مجھے کہتا ہے اٹھ کہ جو شخص اپنے آپ کو پہچانتا ہے وہ تو سمندر کو پیالہ سمجھتا ہے ۔

چونکہ خدا کی نشانیوں کی کوئی حد نہیں ہے ، اس لیے اے مسافر راستے کی انتہا کہاں ہے ۔

حکمت (فلسفہ) کا کام دیکھنا اور گھسنا (پیچھے ہٹنا) ہے جبکہ عرفان و معرفت کا کام دیکھنا اور بڑھنا یعنی آگے بڑھنا ہے ۔

وہ (حکمت) ہر شے کو ہنر کے ترازو میں تولتی ہے جبکہ یہ (معرفت) ہر شے کو نظر کے ترازو میں تولتی ہے ۔

وہ (حکمت) جہان آب و خاک کو اپنی گرفت میں لائی جبکہ یہ (معرفت) جانِ پاک کو گرفت میں لائی ۔

وہ (حکمت) نگاہ کی تجلی کو سمجھنے میں صرف کرتی ہے جبکہ یہ (معرفت) تجلی کو خود اپنے اندر سمو لیتی ہے ، جذب کر لیتی ہے ۔

میں نت نئے جلوے کی تلاش میں ، میں افلاک کو طے کر رہا اور بانسری کی طرح نالہ و فریاد کرتا ہوا چلا جا رہا ہوں ۔

یہ سب اس پاک زاد مرد یعنی رومی کا فیض ہے ، یہ وہ ہستی ہے جس نے اپنا سوز عشق میری جان میں ڈال دیا ہے ۔

کائنات کو دیکھنے والے ان دو مسافروں کا قافلہ اب مشتری کے کنارے پر آ اترا ۔

یہ جہان (فلک مشتری) ایک نامکمل دنیا تھی جس کے گرد کئی چاند تیزی سے چکر لگا رہے تھے ۔

اس کی انگور کی بیل کا شیشہ ابھی تک خالی تھا اور آرزو ابھی تک اس کی خاک سے پیدا نہیں ہوئی تھی ۔

اس کے چاند کی روشنی سے اس کی آدھی رات دوپہر کی مانند روشن تھی ۔ اس کی ہوا میں نہ تو ٹھنڈک تھی اور نہ کوئی گرمی ہی تھی ۔

جب میں نے آسمان کی طرف نظر کی تو اس کے ایک ستارے (مشتری) کو اپنے بہت قریب پایا ۔

اس نظارے کی ہیبت نے تو میرے ہوش اڑا دیے ، اور دور اور دیر اور جلدی کا تصور بدل گیا ۔

وہاں میں نے اپنے سامنے تین پاکباز روحیں دیکھیں ، ان کے سینوں میں ایسی آگ تھی (یعنی آتش عشق) جو کائنات کو پگھلا دینے والی تھی ۔

انکے پہلووَں میں لالہ کے سے رنگ کی سرخ چادریں تھیں اور ان کے چہرے ان کے سوز دروں کے باعث چمک رہے تھے ۔

وہ ہنگام الست سے تب و تاب میں تھے، وہ اپنے نغموں کی شراب سے مست تھے ۔

رومی نے کہا اس قدر بے خود نہ ہو جا، ان آتش نواؤں کے دم (کلام) سے زندہ ہو جا ۔

تو نے اب تک بے پروا عشق نہیں دیکھا، اب دیکھ لے تو نے اس شراب کا زور نہیں دیکھا اب دیکھ لے ۔

غالب اور حلاج اور ایرانی خاتون (قرۃ العین طاہرہ) جنھوں نے حرم (کعبہ) کی جان میں شور برپا کر رکھا ہے انہیں دیکھ اور ان کی نوائیں سن ۔

ان کا کلام روح کو ثبات بخشتا ہے ، اس لیے کہ ان کی گرمی کائنات کے اندر سے ہے ۔