غزل شمارهٔ 75

میں اب اپنے آپ ہی کو سجدہ کرتا ہوں کیونکہ اب مندر اور مسجد دونوں ہی باقی نہیں رہے ۔ مسجد عرب میں نہیں رہی اور مندر عجم میں موجود نہیں ۔ (نہ تو مسجد ہی رہبری کا فریضہ انجام دے رہی ہے اور نہ ہی مندر میں کوئی راہنما موجود ہے تو پھر اس کے سوا اورکوئی چارہ نہیں کہ میں صرف اپنے ضمیر کی پیروی کروں ) ۔

(موجودہ دور جو کہ اہلِ یورپ کی تہذیب کا عکس لیے ہوئے ہے ) اس میں لالہ اور گلاب کے پھولوں کی پتیوں میں وہ رنگ اور لطافت نہیں پائی جاتی ۔ چمن کے پرندوں کے غم انگیز گیتوں میں بھی سر اور تال کا وہ زیر و بم نہیں رہا جو کبھی ان کے گیتو ں میں پایا جاتا تھا ۔

کائنات کے اندر میں کوئی نیا نقش ابھرتا ہوا نہیں دیکھ رہا ۔ شاید کی ملک عدم میں کوئی اور نقش باقی نہیں رہا ۔

آسمان کے سیارے ذوقِ انقلاب کے بغیر اپنا سفر طے کر رہے ہیں ۔ شاید کہ دن اور رات میں حرکت کی ہمت باقی نہیں رہی ۔

(عہد حاضر کے لوگ) منزل مراد کی فکر کئے بغیر آرام سے سو رہے ہیں ۔ شاید کہ مٹی کے بنے ہوئے ان خاکی پتلوں میں دم باقی نہیں رہا ۔

(اس تمام بے عملی کی وجہ یہ ) ہو سکتی ہے کہ امکان کے بیاض میں کوئی سادہ ورق باقی نہیں رہا ۔ یا پھر ایسا ہے کہ ممکنات کا ظہور تو ابھی باقی ہے لیکن تب تقدیر میں لکھنے کی ہمت نہیں ۔