بخش 21 - در معنی اینکه جمعیت حقیقی از محکم گرفتن نصب العین ملیه است و نصب العین امت محمدیه حفظ و نشر توحید است

اے مخاطب! میں تجھے کائنات کی زبان سکھاتا ہوں ۔ وہ حروف و الفاظ کی زبان نہیں بلکہ زندگی کے اعمال کی زبان ہے ۔

جب زندگی کسی مدعا سے وابستہ ہو جاتی ہے تو ایک پختہ ، موزوں اور برمحل مطلع بن جاتی ہے ۔

اگر مدعا ہماری ایڑ بن جائے تو ہمارا گھوڑا آندھی کی طرح دوڑنے لگے گا ۔

مدعا زندگی کے حفظ و بقا کا بھید ہے اسی کی برکت سے زندگی کی قوتوں کے بےقراری دور ہوتی ہے اور وہ مرکز پر جمع ہو جاتی ہے ۔

جب زندگی ایک مقصد سے آشنا ہو جاتی ہے تو اس دنیا میں اسے حاصل کرنے کے جتنے اسباب ہیں انہیں نظم و ضبط میں لے آتی ہے ۔

اپنے آپ کو اس مقصد کے لیے وقف کر دیتی ہے ۔ اس کے حصول میں جس چیز کی ضرورت پڑتی ہے اس سے کام لیتی ہے ۔ جو معاون بنتی ہے اسے چن لیتی ہے جو مضر نظر آتی ہے اسے ٹھکرا دیتی ہے ۔

ملاح سمندر میں جہاز چلاتا ہے تو صرف اس مقصد سے کہ ساحل پر پہنچ جائے ۔ مسافر راستے طے کرتے ہیں تو اس لیے کہ منزل پر فائز ہوں ۔

پروانے کے دل پر ذوق سوز نے ایک داغ لگا رکھا ہے اسی لیے وہ چراغ کے گرد چکر لگاتا رہتا ہے یہاں تک کہ وہ مر جاتا ہے ۔

قیص صحرا میں اس لیے آوارہ و سرگرداں پھر رہا ہے کہ اسے لیلیٰ کے محمل کی تلاش ہے ۔

اگر ہماری لیلیٰ شہر میں رہنے لگے اور صحرا کی طرف نہ جائے تو ہمارے پاؤں کبھی صحرا کی طرف نہ اٹھیں ۔

غرض کوئی بھی عمل پیش نظر لاوَ اور غور کرو، صاف معلوم ہو جائے گا کہ کسی نہ کسی مقصد کو اس کے تعلق میں جان کی حیثیت حاصل ہے ۔

ہماری رگوں میں خون کی جو گردش ہے وہ حصول مدعا کے لیے سرگرمی ہی کی بنا پر تیز ہوتی ہے ۔

مدعا کی حرارت سے زندگی اپنے آپ کو جلا دیتی ہے اور لالے کی طرح آگ فراہم کر لیتی ہے ۔ اپنے آپ کو جلا دینے سے حقیقتاً جلا دینا مقصود نہیں بلکہ اس اسلوب بیان سے سعی و کوشش کی انتہائی سرگرمی کا تصور پیدا کرنا منظور ہے ۔

مدعا ساز ہمت کے لیے مضراب ہے ۔ یہی مرکز ہے جو ہر قوت عمل کو اپنی طرف کھینچ لیتا ہے ۔

مقصد ہی قوم کے ہاتھ پاؤں میں حرکت پیدا کرتا ہے اور بہ یک وقت سینکڑوں آنکھیں اسی کے اشارے پر گردش کرنے لگتی ہیں ۔

اے مخاطب! تو بھی اپنے مقصد کے لیے محبوب کے لیے دیوانگی اختیار کر اور مقصد کو شمع بنا کر پروانے کی طرح اس کا طواف شروع کر دے ۔

قم کے نغمہ ساز یعنی مشہور شاعر ملک قمی نے ایک نہایت اچھا ترانہ سنایا ہے ۔ گویا حقیقت کا نغمہ تار پر لگایا ہے ۔

جب تک مسافر اپنے تلوے سے کانٹا نکالے، محمل نظروں سے پوشیدہ ہو جاتا ہے ۔

اگر تو ایک دم کے لیے بھی غافل ہو گا تو منزل سے سینکڑوں فرسنگ دور ہو جائے گا ۔

یہ پرانا پیکر جس کا نام دنیا ہے عناصر کے ربط و ضبط سے بنا ہے اور اس میں ابتدا ہی سے ارتقا کا عمل جاری ہے ۔

اس نے سینکڑوں نیستان بوئے اور ان میں ایک نالہ پیدا کیا ۔ سینکڑوں باغوں کا خون کر کے ایک لالہ اگایا ۔

نقشوں کے خاکے تیار ہوئے اور بٹھائے گئے ۔ پھر انہیں مٹایا گیا اے مسلمان بناوَ بگاڑ کا یہ سلسلہ اس لیے جاری رہا تاکہ زندگی کی تختی پر تیرا نقش بٹھایا جا سکے ۔

جانوں کے کھیت میں آہ و فغاں کی کاشت جاری رہی یہاں تک کہ ایک اذان کی صدا نے فروغ پایا ۔

یہ دنیا مدت تک احرار سے لڑتی رہی، اسے جھوٹے معبودوں سے محبت تھی ۔

آخر ایمان کا بیج مٹی میں بویا گیا ، وہ اگا ، بڑھا ، پھولا پھلا اور اے مسلمان تیری زبان سے اس دنیا نے توحید کا کلمہ پڑھا ۔

تو لا الہ یعنی کلمہ توحید کی حقیقت جانتا ہے ۔ جہان کے ہر دور و گردش کا مرکزی نقطہ لا الہ ہے ۔ اور اس جہان کے کام کی انتہا بھی لا الہ ہے ۔

آسمان اسی کے زور سے گھوم رہا ہے، سورج کو اسی کی بدولت استواری اور آب و تاب حاصل ہے ۔

سمندر نے لا الہ ہی کی چمک دمک سے موتی پیدا کئے اور دریا کے اندر موج کو اسی تڑپ سے بہرہ یاب کیا ۔

مٹی لا الہ کی باد نسیم سے پھول بن جاتی ہے اور مٹھی بھر کر اس کے سوز سے بلبل کی شکل اختیار کر لیتے ہیں ۔

انگور کی رگوں میں اسی کے سوز کی بدولت آگ گردش کر رہی ہے ۔ صراحی کی مٹی میں بھی اس کے سوز کی بدولت چمک دمک ہے ۔

عالم ہستی کے ساز میں لا الہ کے نغمے سوئے ہوئے ہیں ۔ اے زخمے والے ہاتھ آج عالم ہستی کا ساز تیری تلاش میں ہے تا کہ تو زخمہ لگائے اور سوئے ہوئے نغمے جاگ اٹھیں ۔

تیرے پاس سینکڑوں نغمے ہیں جو خون کی طرح تیرے بدن میں د وڑ رہے ہیں اٹھ اور اس کے تار کو مضراب سے چھیڑ دے ۔

کیونکہ تکبیر ہی میں تیری ہستی کا راز چھپا ہوا ہے اور جان لے کہ تیرا اصل مقصد توحید کی حفاظت و اشاعت ہے ۔

اگر تو مسلمان ہے تو تجھے اس وقت تک ایک دم کے لیے بھی آرام سے نہیں بیٹھنا چاہیے جب تک کہ زمانہ بھر سے حق کی آواز نہ اٹھنے لگے ۔

اے ملت اسلامیہ! کیا قرآن مجید کی وہ آیت تجھے معلوم نہیں جس میں تجھے امت عادل کا خطاب ملا ۔

زمانے کے چہرے کی رونق اور تازگی تیرے ہی دم سے ہے تو اس دنیا میں تمام قوموں کے لیے گواہی دینے والی ہے ۔ اس میں اشارہ قرآن مجید کی اس آیت کی طرف ہے اور ہم نے تمہیں نیک ترین اور عادل ترین امت ہونے کا درجہ عطا فرمایا تاکہ تم تمام انسانوں کے لیے گواہی دینے والے ہو اور تمہارے لیے رسول اللہ گواہی دینے والے ہیں (البقرہ) ۔

جو نکتہ شناس ہیں انہیں دعوت عام دے اور امت نبی کے علوم سے آگاہ کر ۔

وہ اُمّی ، جس کی گفتگو قرآن ارشاد کے مطابق نفس کی خواہش سے پاک تھی اور جو کچھ اس کی زبان مقدس پر جاری ہوتا تھا وحی کے ذریعے سے پہنچا ہوا آسمانی پیغام تھا ۔ وہ اُمّی جس کے ارشادات ماغویٰ کی شرح تھے یعنی ان میں بے راہی کی کوئی بات نہ تھی ۔

اس امی نبی نے کائنات کی نبض اپنے دست مبارک میں لی تو زندگی کی پختگی کے تمام بھید کھول کر رکھ دیے ۔

اس چمن میں لالوں کی قبا پر جتنی آلودگیاں پرانے زمانے سے چھائی ہوئی تھیں ان سب کو دھو کر صاف کر دیا ۔

اس دنیا میں زندگی اسی امی نبی کے دین سے وابستہ ہے اور یاد رکھو اس کی شریعت اور اس کے مقرر کئے ہوئے قاعدوں کے بغیر جینا ممکن ہی نہیں ۔

اے ملت اللہ تعالیٰ کی کتاب یعنی قرآن مجید تیرے بغل یعنی پاس ہے اس کے نور سے فائدہ اٹھا اور عمل کی میدان میں چلنا شروع کر دے ۔

انسان کا شیوہ ابتدا سے یہ رہا ہے کہ بت بنائے اور انہیں پوجے وہ ہر گھڑی کسی نئے بت کی تلاش میں رہتا ہے ۔

اب اس نے پھر آذر کا طریقہ اختیار کر لیا ہے اور نت نئے بت بنا کر کھڑے کر دیے ہیں ۔

وہ بت خون بہا کر خوشی سے ناچتے ہیں ان کے نام ہیں رنگ، ملک اور نسل (ملک کا بت یورپ نے پیدا کیا، رنگ کا بت بھی یورپ ہے ان بتوں نے عالم انسانیت کو چھوٹے بڑے ٹکروں میں بانٹ دیا اور جگہ جگہ ایک دوسرے سے دشمنی کی آگ بھڑکا دی) ۔

اقبال نے کیا خوب فرمایا کہ دیکھو، ان نامراد بتوں کے پاؤں میں انسانیت بھیڑ بکری کی طرح بیدردی سے ذبح کر ڈالی گئی ۔

اے ملت اسلامیہ تو نے ابراہیم کی صراحی سے شراب پی ہے تیرے خون میں اسی شراب کی حرارت دوڑ رہی ہے ۔

اٹھ اور اس باطل کا سر جس نے حق کا لباس پہن رکھا ہے لاموجود الا ہو کی تلوار چلا کر قلم کر دے ۔

اس دنیا کے طول و عرض میں اندھیرا چھا گیا ہے ۔ اٹھ اور اجالے کا سروسامان کر دے ۔ جو دین تجھ پر کامل ہوا ہے اسے چپے چپے میں پھیلا دے ۔

میں تو شرم کے مارے کانپ اٹھتا ہوں جب سوچتا ہوں کہ قیامت کے دن وہ پاک ذات جو اس کائنات کی آبرو تھی

اے ملت تجھ سے پوچھے گی کہ تجھے ہماری پیش گاہ سے ایک پیغام دیا گیا تھا تو نے اسے دوسروں تک کیوں نہ پہنچایا