بخش 20 - در معنی اینکه حیات ملیه مرکز محسوس میخواهد و مرکز ملت اسلامیه بیت الحرام است

میں تیرے سامنے زندگی کے کاروبار کی گتھی کھولتا ہوں اور اس کے بھیدوں سے تجھے آگاہ کرتا ہوں ۔

زندگی بھی خیال کی طرح بیتابانہ ادھر ادھر پھرتی رہتی ہے اور اطراف سے دامن بچاتی ہوئی چلتی ہے ۔

مطلب یہ کہ زندگی کسی جگہ یا مقام کی پابند نہیں کہ اس دنیا میں کیونکر آتی ہے جو دیر و زود کی پابند ہے اور زندگی کا وقت گزشتہ کل اور آئندہ کل پیدا کرتا ہے

اگر تیرے پاس حقیقی نظر ہے تو تھوڑی دیر کے لیے اپنی حالت دیکھ اور اس پر غور کر ۔ تو بھی تو اے بیخبر ہر لحظہ بدلتا اور وقف خرام رہتا ہے ۔

جب زندگی چاہتی ہے کہ اپنی ان تابانیوں اور درخشانیوں کو نمایاں کرے جو نظر نہیں آتیں تو اس کا شعلہ اپنے دھوئیں سے اردگرد پردہ تیار کر لیتا ہے ۔

جب زندگی سیر و گردش اور حرکت کے بجائے سکون و قیام اختیار کر لیتی ہے یا کہنا چاہیے کہ جب نظر اس کی سیر و سکون کی حالت میں دیکھتی ہے تو زندگی کی ندی میں جو لہر ہے وہ بندھ کر اور پیوستہ ہو کو موتی میں پہنچ جاتی ہے ۔

زندگی آگ تھی پھر اس نے دم سادھا اور لالے کا پھول بن کر ایک شاخ سے باہر نکل آئی ۔

تیری فکر خام ہے ، بیدار ہونے میں سست ہے اور لنگڑی ہے تو نے رنگ کی پرواز پر پھول کی تہمت لگا دی ۔

حالانکہ زندگی ایسا پرندہ نہیں جو کسی جگہ گھونسلا بنا کر بیٹھ جائے ۔ وہ تو رنگ کا پرندہ ہے جو ہر وقت اڑتا رہتا ہے (پرواز کے سوا کچھ نہیں ) ۔

زندگی عاجزی اور بیچارگی کی حالت میں قید بھی ہوتی ہے ساتھ ہی آزاد بھی ۔ وہ گیت بھی گاتی ہے اور آہ و نالہ بھی کرتی ہے ۔

اس کے پروں سے لحظہ بہ لحظہ پرواز کی قوت گھٹتی جاتی ہے پھر وہ خود ہی اپنی کوتاہیوں کے علاج میں لگی رہتی ہے ۔

وہ خود ہی اپنے کاموں کے رشتے میں گرہیں ڈالتی ہے ۔ پھر جتنی مشکلات جمع ہو جاتی ہیں انہیں آسان بھی کر لیتی ہے ۔

زندگی بہت تیز رفتار ہے لیکن کبھی کبھی زمین پر گر کر کھڑی ہو جاتی ہے تاکہ چلنے پھرنے کا ذوق دوگنا ہو جائے ۔

اس کے سوز میں ساز سویا ہوا ہے اور جب وہ آج کی شکل اختیار کر لیتی ہے تو گزشتہ کل اور آئندہ کل بھی پیدا ہو جاتی ہے ۔

ہر لحظہ مشکلات بھی پیدا کرتی ہے تاکہ جدوجہد کا جذبہ ابھارے ، ساتھ ہی آسانیاں بھی پیدا کر لیتی ہے ۔ غرض وہ ہر وقت نئی نئی اور تازہ چیزیں پیدا کرنے میں مصروف ہے ۔

اگرچہ زندگی خوشبو کی مانند ہر وقت تگ و تاز میں لگی رہتی ہے تاہم جب کسی سینے میں ٹھہر جاتی ہے تو سانس بن جاتی ہے ۔

وہ اپنے ممکنات کے رشتوں کا جال اپنے آپ پر تنتی رہتی ہے کبھی گرہ کھا کر گھنڈی بن جاتی ہے ۔

جس طرح ایک بیج کے اندر درخت کے پتے اور پھول پوشیدہ ہوتے ہیں اسی طرح زندگی جب اپنے آپ پر نگاہ ڈالتی ہے تو درخت بن جاتی ہے ۔

پھر مٹی اور پانی سے اپنی خلعت تیار کرتی ہے اس میں ہاتھ پاؤں ، آنکھ اور دل وجود میں لاتی ہے ۔

اس طرح جسم تیار ہو جاتا ہے تو اس کی خلوت میں زندگی جا بیٹھتی ہے اس خلوت میں ہزاروں انجمنیں بروئے کار لاتی ہے ۔

قوموں کے پیدا ہونے کا دستور بھی اسی طرح ہے ۔ یعنی زندگی ایک مرکز پر جمع ہو جاتی ہے ۔

مرکز کی حیثیت دائرے کے لیے وہی ہے جو جسم کے لیے جان کی ہے ۔ دائرے کا پورا خط اس کے نقطے میں سمٹا ہوا ہوتا ہے ۔

قوم کا ربط ضبط بھی ایک مرکز ہی سے وابستہ ہے اور اسکے کاروبار میں دوام مرکز ہی کی بدولت پیدا ہوتا ہے ۔

ہماری زندگی کے بھیدوں کا حامل اور خود بھید بیت الحرام یعنی کعبہ ہے ۔ ہمارا سوز و ساز ، ہمارا رنج و راحت ہمارا دکھ اور سکھ اسی سے وابستہ ہے ۔

ہم کعبے کو سینے میں سانس کی طرح محفوظ رکھتے ہیں ۔ وہ ہماری جان شیریں ہے اور ہم اس کا جسم ہیں ۔ گویا ہماری ہستی کعبے ہی پر موقوف ہے ۔

ہمارا باغ اس لیے تروتازہ اور شاداب ہے کہ کعبے کی شبنم سے اسے برابر فیض حاصل ہوتا ہے ۔ ہمارا کھیت اسی کے زمزم سے پانی لیتا ہے ۔ یعنی کھیت کی آبیاری اسی کے زمزم سے ہوتی ہے ۔

اسی کے ذروں سے سورج کو آب و تاب حاصل ہوتی ہے ۔ اسی کی فضا میں وہ غوطہ زن رہتا ہے ۔

کعبے کے دعوے کے لیے دلیل کی ضرورت ہو تو ہم سراپا دلیل ہیں ۔ حضرت ابراہیم خلیل اللہ کی برہانوں میں سے ہم بھی ایک برہان ہیں ۔

کعبے ہی نے ہماری شہرت دور دور پہنچا دی اور ہمارے حدوث کا رشتہ قدم سے جوڑ دیا یعنی ہم فانی ہیں تاہم جب تک یہ دنیا باقی ہے ہمارے لیے بقا کا انتظام کعبے ہی کی وجہ سے ہوا اگرچہ ہماری ملت جگہ جگہ بکھری ہوئی ہے ۔

لیکن کعبے کے گرد گھومنے اور طواف کرنے کے باعث ہم سب ایک ہیں متحد ہیں ہماری حیثیت اس صبح کی ہے جس کے پنجرے میں سورج بند ہوتا ہے ۔

اے مسلمان تیری کثرت کعبے کی وجہ سے وحدت بنی ہوئی ہے اور اسی رشتہ وحدت کی بدولت تیری خودداری پختہ اور پائیدار ہے ۔

تو کعبے سے وابستگی کے باعث زندہ ہے جب تک اس کا طواف کرتا رہے گا قائم و استوار رہے گا ۔

اس دنیا میں جمیعت کو قوموں کی جان سمجھا جاتا ہے جب تک جمیعت نہ ہو قو میں وجود میں نہیں آ سکتیں ۔ اے مسلمان آنکھیں کھول کر دیکھ، کعبہ تیری جمیعت کا راز ہے یعنی اسی پر تیری جمیعت موقوف ہے ۔

اے مسلمان تیرا روشن ضمیر ہے تو امت موسیٰ یعنی یہودیوں کے انجام سے عبرت حاصل کر ۔

جب اس قوم نے مرکز کھویا تو ساتھ ہی قوم کی جمیعت کا رشتہ بھی ٹوٹ گیا ۔

اس قوم یعنی یہود نے انبیا ء کے آغوش میں نشوونما پائی ۔ اس میں ایسے لوگ بھی ہوئے جو تمام بھیدوں سے واقف تھے ۔

لیکن جب مرکز اس کے ہاتھ سے نکلا جمیعت کا رشتہ ٹوٹا تو زمانے نے اس کی کنپٹی پر ایک تھپڑ رسید کیا ۔ ان کی زندگی خون ہو کر رہ گئی اور آنسو بن کر آنکھ سے ٹپک گئی ۔

وہ قوم انگور کی بیل تھی اس کے رگ و ریشہ سے نمی زائل ہو گئی ۔ اب یہ کیفیت ہے کہ اس کی خاک سے بید کا درخت بھی پیدا نہیں ہوتا ۔

وہ قوم بے وطنی میں بکھر کر جگہ جگہ جا بیٹھی ، اسکی زبان بھی ختم ہو گئی ۔ اس میں قومی دم خم بھی باقی نہ رہا اور اس کا وطن بھی نابود ہو گیا ۔

شمع بجھ گئی، پروانہ اس کا ماتم کر رہا ہے جب میں اس قوم کی سرگزشت پر غور کرتا ہوں تو بدن پر لرزہ طاری ہو جاتا ہے

اے مسلمان تیرا جسم آسمان کے ظلم کی تلوار سے زخمی ہو رہا ہے ۔ تو شک و شبہ اور وہم و گمان کا قیدی بنا ہوا ہے

تو اپنے لباس کو جامہ احرام بنا لے اور شام کے غبار سے صبح پیدا کر لے یعنی کعبے کی مرکزیت بحال کر ۔

اپنے باپ دادا کی طرح سجدہ ریزی اور عبادت گزاری میں غرق ہو جا کہ تو خود سراپا سجدہ اور عبادت بن جائے ۔ مراد یہ ہے کہ پورا دینی نظام اختیار کرے ۔

دیکھ ابتدائی زمانے کے مسلمانوں نے عبودیت ، بندگی اور فرمانبرداری کا ایسا نقشہ پیش کیا ہے کہ وہ زمانے بھر کے لیے فخر و ناز کا سامان بن گئے ۔

انھوں نے خدا کی راہ میں پاؤں کانٹوں سے زخمی کر لیے اور باغ کو دستار کے گوشے میں باندھ لیا ۔