بخش 19 - در معنی اینکه حسن سیرت ملیه از تأدب به آداب محمدیه است

ایک دن ایک بھکاری اٹل قضا کی طرح ہمارے دروازے پر بار بار صدائیں لگانے لگا ۔

میں (علامہ) نے غصے کے عالم میں اس کے سر پر اس زور سے چھڑی ماری کہ وہ ٹوٹ گئی ۔ بھیک مانگ کر جو کچھ اس نے جھولی میں جمع کیا تھا وہ زمین پر گر پڑا ۔

دور جوانی کا آغاز تھا اور معلوم ہے کہ اس دور میں عقل نیک و بد اور درست و نادرست نہیں سوچا کرتی (چنانچہ مجھ میں سوچے سمجھے بغیر یہ حرکت سرزد ہوئی) ۔

میرے مزاج کی یہ حالت دیکھ کر والد ماجد بہت آرزدہ ہوئے ۔ ان کے چہرے کا لالہ زار مرجھا کے رہ گیا ۔ یعنی ان کے چہرے کی سرخی پر افسردگی چھا گئی ۔

ان کے لبوں سے ایک جگر سوز آہ نکلی اور دل سینے میں تڑپ اٹھا ۔

ایک آنسو جس کی شکل ستارے کی تھی ان کی آنکھوں سے نکلا، کچھ دیر مژگان پر چمکا اور گر گیا ۔

میری کیفیت یہ تھی کہ ڈر کے مارے جان میرے بدن میں لرز اٹھی ، جیسے پرندہ خزاں کے موسم میں گھونسلے کے اندر بیٹھا ہوا صبح کی ہوا سے لرز اٹھتا ہے ۔

میں اس نتیجے سے غافل تھا ۔ والد کی کیفیت دیکھ کر صبر کی لیلیٰ میرے محمل سے نکل گئی یعنی مجھ میں صبر کی تاب نہ رہی ۔

والد نے فرمایا کہ کل رسول اللہ ﷺ کی امت اس ذات پاک کے سامنے جمع ہو گی جسے سب کی آقائی کا درجہ حاصل ہے ۔

ان میں ملت بیضاکے غازی بھی ہوں گے اور وہ لوگ بھی جو اسلام کی حکمت رعنا کے حافظ تھے یعنی بلند پایہ اصحاب و بصیرت ۔

وہ شہید بھی ہوں گے جو دین حق کے لیے دلیل ہیں اور ملت کی فضا میں ستاروں کی مانند چمک رہے ہیں ۔

ان میں زاہد بھی ہوں گے دل فگار عاشق بھی ۔ عالم بھی ہوں گے اور شرمسار گنہگار بھی ۔

اس مجمع میں اس بھکاری کے حلق سے آہ و فغاں بلند ہو گی جسے تیرے ہاتھ سے دکھ پہنچا ۔

بیٹا! سواری کے بغیر تیرا راستہ تو طے ہونا مشکل نظر آتا ہے ۔ میں پوچھتا ہوں کہ جب رسول اللہ مجھ سے فرمائیں گے ۔

خدا نے ایک مسلمان نوجوان کو تیرے سپرد کیا کہ اسے صحیح تعلیم و تربیت دے ۔

حضور فرمائیں گے کہ تو تو اس آسان کام کو بھی پورا نہ کر سکا، یعنی مٹی کے انبار کو آدمی نہ بنا سکا ۔ بتا میں اس وقت کیا جواب دے سکوں گا ۔

والد لطف و کرم کا پیکر تھے اگرچہ مجھے ملامت کر رہے تھے لیکن گفتگو میں بڑی نرمی اور حلیمی تھی ۔ میں شرم کے مارے پانی پانی ہو رہا تھا اور امید و بیم کا شکار تھا ۔

والد نے فرمایا، بیٹا ذرا رسول اللہ کی امت کا جمع ہونا تو پیش نظر لا ۔

پھر میری سفید داڑھی دیکھ اور یہ سوچ کہ امید و بیم (خوف) کے لرزے سے میری حالت کیا ہو گی ۔

دیکھ اپنے باپ پر یہ نازیبا ظلم نہ کر اور غلام کے لیے آقا کے روبرو رسوائی کا سامان نہ پہنچا ۔

تو رسول اللہ کی شاخ کا غنچہ ہے حضورہی کی نسیم بہار سے شگفتہ ہو کر پھول بن جا ۔

تجھے رسول اللہ کی نسیم سے رنگ و بو حاصل کرنا چاہیے ۔ یعنی رسول اللہ ہی کے خلق عظیم سے حصہ لینا لازم ہے ۔

دیکھ مولانا روم کیا اچھی بات کہہ گئے ہیں ۔ وہ مولانا جن کے ہر قطرے میں حقائق کا سمندر سمایا ہوا ہے ۔

(فرماتے ہیں ) اپنی زندگی کا رشتہ رسول اللہ سے مت توڑ، اپنے علم و فن اور روش پر بھروسہ نہ کر ۔

مسلمان کی فطرت سر سے پاؤں تک (سراسر) شفقت ہے اس دنیا میں اس کا ہاتھ اور اس کی زبان رحمت کا پیغام ہے ۔

وہ پاک ذات جس کی انگلی کے اشارے سے چاند دو ٹکڑے ہو گیا ، کیا یہ معلوم نہیں کہ وہ سب کے لیے رحمت تھے اور ان کا لقب ہی رحمت للعالمین تھا ۔ پھر ان کے اخلاق سب سے اعلیٰ تھے ۔

اگر تو حضورکے مقام سے دور رہا تو جان لے کہ پھر ہماری جماعت میں سے نہ ہو گا ۔

تو ہمارے باغ کا پرندہ ہے ، ہمارا صفیر و ہما زبان ہے ۔

اگر تیرے اندر نغمے کی صلاحیت ہے تو ہمارے باغ کی شاخ پر بیٹھ کر گا، ہم سے الگ ہو کر نغمہ سرا نہ ہو ۔

اس دنیا میں جو بھی شے زندگی کے سرمائے سے مالامال ہے جب کسی ناسازگار فضا میں پہنچتی ہے تو مر جاتی ہے ۔

تو اگر بلبل ہے تو چمن میں پرواز کر (باغ میں ہے پرواز کا شوق پورا کر) اور اپنوں کے ساتھ مل جل کر گا ۔ یہاں باغ سے مراد رسول اللہ کا اسوہ مبارک ہے ۔

اگر تو عقاب ہے تو دریا کی تہہ میں زندگی بسر نہ کر ۔ صحرا کے خلوت خانہ کے سوا اور کہیں زندگی بسر نہ کر ۔ تیرے لیے صحیح مقام صحرا ہے ۔

کیا تو ستارہ ہے پھر اپنے آسمان کے سوا کہیں نہ چمک اپنے گردوپیش سے قدم باہر نہ رکھ ۔

اگر تو بہار سے پانی کا قطرہ لے اور اسے باغ کی فضا میں پرورش کرے ۔

یہاں تک کہ بہار کے فیض سے ایک شبنم کے قطرے کی طرح اسے اپنی گود میں لے لے ۔

صبح کے وقت جو کرن آسمان پر روشنی پھیلاتی ہے اور اس کے منتر سے غنچہ درخت بن جاتا ہے ۔

تو اس کرن سے کام لے کر قطرے کے جوہر سے نمی باہر کھینچ لے اور اس کے بیتاب اجزائے ترکیبی میں حرکت کا ذوق باقی نہ چھوڑ ۔

اس طرح جو جوہر تیار کرے گا صرف پانی کا ہو گا اور تیری کوشش کی حیثیت سراب سے زیادہ نہ ہوگی ۔ (اس مثال سے یہ دکھانا مقصود ہے کہ ہر شے اپنے اصل ماحول میں صحیح شکل اختیار کرتی ہے ماحول سے باہر نکل کر کتنی ہی کوششیں کی جائیں وہ مطلوب نتیجے پیدا نہیں کرے گی ۔

اگر تو اسے موتی بنانا چاہتا ہے تو اس کی تدبیر یہ ہے کہ قطرہ سمندر میں پہنچے اور صدف کی گود میں پرورش پائے بھی اس کی چمک دمک تارے کی چمک دمک اختیار کر لے گی کیونکہ وہ اپنے اصل ماحول میں پہنچ جائے گا اور قدرت کے مقرر کیے ہوئے اصول کے مطابق پرورش پائے گا ۔

ابر بہار کا جو قطرہ سمندر سے دور رہ جائے گا وہ شبنم کے قطروں کی طرح خس و خاشاک کی نذر ہو جائے گا (جو چیز اپنے ماحول سے الگ ہو جاتی ہے اس کا انجام یہی ہوتا ہے ) ۔

مسلمان کی سرشت بھی موتی کی طرح پاک ہے ۔ اسے رسول اللہ کے سمندر سے آب و تاب ملتی ہے ۔

اگر تو ابر بہار کا قطرہ ہے تو اس سمندر کی آغوش میں پہنچ اور اس کی تہہ سے موتی بن کر باہر نکل ۔ پھر دنیا میں سورج سے بھی زیادہ روشن ہو جا بلکہ دائمی تابا نی و درخشانی کا مالک ہو جا ۔

پھر دنیا میں آفتاب سے بھی زیادہ روشن ہو کر (چمک) اور ہمیشہ کی تابانی پا لے۔ در معنی اینکہ حیات ملیہ مرکز محسوس میخواہد و مرکز ملت اسلامیہ بیت الحرام است

ترجمہ: میاں عبدالرشید