بخش 18 - در معنی اینکه پختگی سیرت ملیه از اتباع آئین الهیه است

شریعت میں کوئی دوسرے معنی تلاش نہ کر ۔ موتی کے اندر چمک دمک اور روشنی کے سوا کچھ اور مت ڈھونڈ ۔

اس موتی (یعنی شریعت) کو موتی بنانے والی خود اللہ کی ذات ہے ۔ اس کا ظاہر بھی موتی ہے اور باطن بھی موتی ۔

یہ جو شریعت، طریقت، حقیقت اور معرفت کی اصلاحیں وضع کی گئیں ہیں ان کی کوئی حیثیت نہیں ۔ واضح رہے کہ علم حق شریعت کے سوا کچھ نہیں ۔ شریعت وہی ہے جو اللہ کے حکم سے رسول اللہ نے انسانوں تک پہنچائی ۔ اور تجھے معلوم ہے کہ سنت کی اصلیت کیا ہے محض اللہ اور اس کے رسول پاک کے حکم پر عمل سے محبت جو شخص اللہ تعالیٰ کی مقرر کی ہوئی شریعت اور رسول اللہ ﷺ کی سنت کے لیے جذب و کشش اپنے اندر نہیں رکھتا اس کی زبان سے محبت کا دعویٰ جھوٹا سمجھا جائے گا ۔

فرد کے لیے شریعت ایسا زینہ ہے جو اسے یقین کی بلندی پر پہنچا دے ۔ شریعت ہی کی پیروی سے یقین کے مقامات پختہ اور مستحکم ہوتے ہیں ۔

ملت خدا کے مقرر کیے ہوئے دستور کے مطابق نظام و ترکیب پاتی ہے ۔ یہ نظام پختہ ہو جاتا ہے تو ہمیشہ کے لیے قائم رہتا ہے ۔

اس کے علم میں یعنی اسے جاننے میں قوت و قدرت پیدا ہوتی ہے ۔ یہ عصا بھی ہے اور ید بیضا بھی ۔

شریعت ہی اسلام کا آغاز اور شریعت ہی انجام ہے ۔ یعنی اسلام کی ساری بنیاد شرع پر ہی ہے ۔

اے مخاطب تو دین کی حکمت کا امانت دار ہے میں تجھے اسلام کی روشن شریعت کا ایک نکتہ بتاتا ہوں ۔

جب کوئی فرد یا گروہ بلاوجہ مسلمان کو کسی مستحب فعل سے روکتا ہے ۔

تو وہ مستحب نہیں رہتا بلکہ فرض کی صورت اختیار کر لیتا ہے (اس کا مطلب کیا ہے ) یہ کہ زندگی قدرت و قوت کے سوا کچھ نہیں ۔

اگر لڑائی کے دن دشمن اس خیال سے بے فکر ہو جائے کہ صلح ہو رہی ہے ۔

حفاظت کے لیے اس نے جو پابندیاں عائد کر رکھی تھیں انہیں ڈھیلی کر دے اور دفاعی تدابیر سے کنارہ کش ہو جائے

جب تک اس کے تمام حفاظتی انتظامات پہلی شکل پر نہ آ جائیں اس کی مملکت پر لشکر کشی حرام ہے ۔

کیا تجھے معلوم ہے کہ خدا کے اس فرمان میں کیا راز چھپا ہوا ہے یہ کہ خطروں میں جینا اصل زندگی ہے ۔

شریعت (اس بات کی خواہاں ہے) کا تقاضا یہ ہے کہ جب مسلمان جنگ کے لیے نکلے توشعلہ بن کر ہر طرف لپکے اور پتھروں کے گلے تک کو چیرتا جائے ۔

شریعت تیرے بازو کی قوت آزمانے کی غرض سے الوند جیسا پہاڑ تیرے سامنے ڈال دیتی ہے ۔

وہ کہتی ہے کہ تو الوند پہاڑ کو پیس کر سرمہ بنا دے اور اپنے خنجر کی حرارت سے اسے پگھلا دے ۔

کمزور اور دبلی بھیڑ اس لائق نہیں ہوتی کہ نر شیر اسے شکار کرے اور پنجہ مارنے کی زحمت اٹھائے ۔

اگر باز ممولے کے شکار کا عادی ہو جائے تو آہستہ آہستہ وہ اپنے شکار سے بھی زیادہ کمزور اور بے بس ہو جائے گا ۔

یہی وجہ ہے کہ شریعت تربیت دینے والی پاک ذات نے جو اچھے برے کی حقیقت سے خوب واقف تھی تیرے (مسلمان) کے لیے ایک ایسا دستور تیار کر دیا جو قوت کا طلبگار ہے اور قوت پیدا کرنے میں معاون ہوتا ہے ۔

اس دستور میں یہ صلاحیت ہے کہ اگر تو کمزور اور ناتواں ہو گا تو تجھے قوی اور پہاڑ کی طرح پختہ کر دے گا اور دنیا میں تجھے اعلیٰ مقام پر فائز کر دے گا ۔

اگر تو دلگیر ہے تو وہ تجھے مضبوط دل والا بنا دے گا اور تجھے پہاڑ کی مانند مستحکم اور اٹل بنا دے گا ۔

یاد رکھ کہ رسول اللہ کا دین زندگی کا دین ہے اور حضور جو شریعت لائے وہ زندگی کے دستور کی تفصیل ہے ۔

اگر تو پستی میں زمین کے برابر ہے تو یہ دین تجھے آسمان کی بلندی عطا کر دے گا اور خدا تجھے جو کچھ بنانا چاہتا ہے بنا دے گا ۔

اس دین کی صیقل سے پتھر آئینہ بن جاتا ہے اور لوہے کی زنگار کی آلائش نکل جاتی ہے ۔

جب سے قوم سے رسول اللہ کی سنت کا دامن چھوٹا ہے وہ بقا کی حقیقت اور بھید سے نا آشنا ہو گئی ۔

صحرا میں رہنے اور اونٹ پر سوار ہونے والا مسلمان ایک ایک بلند اور پائیدار درخت کی طرح تھا ۔

اس نے وادی بطحا میں جڑ پکڑی، صحرا کی گرمی آب و ہوا میں نشوونما پائی ۔

افسوس کہ عجم کی ہوا نے اس کی قوت چھین لی اب وہ نے بنا ہوا ہے جو اندر سے خالی ہے (مطلب یہ ہے کہ جب تک مسلمان عربی طور طریقوں اور اسلامی شیووں پر کاربند تھے انہیں دنیا بھر میں سربلندی حاصل تھی لیکن جب عجمیوں کے طور طریقے اختیار کر لیے ان میں سختیاں برداشت کرنے کی قوت نہ رہی تو ان کی پہلی حیثیت زائل ہو گئی ۔ )

جو مسلمان شیروں کو بھیڑوں کی طرح بے حقیقت سمجھ کر موت کے گھاٹ اتار دیتے تھے اب ان کا یہ حال ہے کہ ایک چیونٹی بھی پاؤں کے نیچے روندی جائے تو ان کا دل درد سے تڑپ اٹھتا ہے ۔

جن مسلمانوں کی تکبیر سے پتھر بھی پانی ہو جایا کرتا تھا وہ اب ایک بلبل کی آواز سن کر بے قرار ہو جاتے ہیں ۔

جن مسلمانوں کا عزم اتنا بلند تھا کہ وہ پہاڑوں کو گھاس کے تنکے سمجھتے تھے اب ہاتھ پاؤں توڑے بیٹھے ہیں اور انھوں نے اس کا نام توکل رکھ لیا ہے ۔

جن مسلمانوں کی ضربیں دشمنوں کی گردنیں توڑتی تھیں اب وہ اپنے سینوں کی ضربوں سے اپنا دل زخمی کر چکے ہیں

جن مسلمانوں کے نقش قدم سے سینکڑوں ہنگاموں کا سروسامان ہو جاتا تھا اب علیحدگی کے کونے میں پاؤں توڑے بیٹھے ہیں ۔

جن مسلمانوں کے فرمان دنیا کے لیے اٹل ہوتے تھے اور جن کے دروازوں پر سکندر اور دارا جیسے بادشاہ بھیک مانگا کرتے تھے ۔

ان مسلمانوں نے اب جدوجہد چھوڑ کر قناعت اپنا لی، یہاں تک کہ وہ بھیک کے کاسے پر فخر کرنے لگے (دوسروں کے آگے سر جھکانا ان کے لیے باعث فخر ہے ) ۔

شیخ احمد رفاعی جن کے بارگاہ بلندی میں آسمان کے برابر تھی سورج ان کے ضمیر سے نور حاصل کرتا تھا ۔

ان کے مقدس مزار پر جو پھول ہیں وہ لا الہ کہتے ہوئے زمین سے سر باہر نکالتے ہیں ۔

انھوں نے اپنے ایک مرید سے فرمایا ، بیٹا عجمیوں کے خیالات سے پرہیز لازم ہے ۔

اگرچہ عجمیوں کی فکر آسمان سے بھی آگے نکل گئی لیکن افسوس کہ رسول اللہ کے دین کی حد کے اندر نہ رہی ۔

اے بھائی ملت کے اس مخدوم کی نصیحت غور و توجہ سے سن ۔

یہ سچی بات ہے اس سے دل کو مضبوط کر ۔ عرب سے تعلق پیدا کر تا کہ تو مسلمان ہو جائے ۔ نوٹ: عرب و عجم کی اصطلاحات سے مقصود ملک عرب اور ملک ایران یا کوئی اور نسل نہیں ۔ اقبال نے ان اصلاحوں کو خاص معنی میں استعمال کیا ہے ۔ عرب سے ان کا مقصود پاک دین ہے جو رسول اللہ اس دنیا میں لائے ۔ عجم سے مقصود اسلام کا وہ ڈھانچہ ہے جو عجمی تصورات و نظریات کے سانچے میں تیار ہوا اور جسے اصل اسلام سے کوئی خاص مناسبت نہ رہی ۔