بخش 17 - در معنی اینکه در زمانه انحطاط تقلید از اجتهاد اولی تر است

موجودہ زمانے کے سر کے نیچے بہت سے فتنے اور ہنگامے ہیں ۔ اس کی طبیعت بے باک اور نڈر ہے اور ہر وقت آفتیں برپا کرتی رہتی ہیں ۔ (موجودہ زمانے سے مراد وہ زمانہ ہے جو مغربی قوموں نے دنیا میں پیدا کیا ) ۔

اس نے پرانی قوموں کی مجلس کو درہم برہم کر ڈالا ہے ۔ اور زندگی کی شاخ کو نمی سے محروم کر دیا ہے ۔ یعنی زندگی کی شاخ تازگی سے محروم ہے ۔

اس زمانے کے جلوے نے ہمیں ہماری حقیقت سے بے گانہ کر دیا اور ہمارے ساز میں نوا پیدا کرنے کی صلاحیت ہی نہ چھوڑی ۔

ہمارے دل میں مدت سے عشق حق کی سلگتی آگ کو ٹھنڈا کر دیا اور لا الہ کا نور و نار ہمارے سینے سے غائب کر دیا ۔ وہ حرارت اور وہ نور باقی نہیں رہے ۔

جب زندگی کا ڈھانچہ سست اور کمزور ہو جاتا ہے تو ملت تقلید کے ذریعے سے ہی ثبات حاصل کرتی ہے ۔

تو نے تقلید کا مطلب سمجھا اس کا مطلب یہ ہے کہ ملت ایک رشتے میں منسلک رہے اور اس کے ضبط و نظم میں فرق نہ آئے ۔

جب خزاں کا موسم آ جائے تو اس کو شاخ، جو پتوں اور پھلوں سے خالی ہو چکی ہو درخت سے ٹوٹ کر الگ نہ ہونا چاہیے اور بہار کی امید رکھنی چاہیے ۔ کیونکہ جب بہار آئے گی ، درخت کے ریشے میں تازگی پیدا ہو گی ، سوکھی ہوئی شاخ بھی نئے سرے سے ہری ہو جائے گی۔

اے مخاطب تو سمندر ہاتھ سے دے چکا ہے اب اپنے نقصان کا خوب خیال رکھ ۔ تیرے پاس جو تھوڑے سے پانی کی ندی باقی رہ گئی ہے اسی کی حفاظت پوری طرح کر ۔

(یہی ایک صورت ہے تو جس سے کام لیتا رہے تو شاید وقت آ جائے کہ ) پہاڑی سیل تیری ندی کا رخ کر لے ۔ پھر اس کی آغوش میں طوفان پرورش پانے لگیں ۔

اگر تیرے جسم میں بصیرت رکھنے والی جان ہو تو یہودیوں کی سرگزشت سے عبرت حاصل کر ۔

دیکھ، انھوں نے زمانے کا کیا سرد و گرم دیکھا کشمکش میں ان کی جان گھلتی گئی مگر اب تک زندہ ہیں مرے نہیں ۔

ان کی رگوں میں خون کی روانی بہت سست ہو گئی ۔ ایک ان کی پیشانی ہے اور سینکڑوں آستانے ہیں جن پر گھسی جا رہی ہے ۔

آسمان کے پنجے نے انہیں انگور کی طرح نچوڑ ڈالا ہے ۔ مگر یہ حضرت موسیٰ اور حضرت ہاروں کی یادگار اب تک مر نہ سکے ۔

ان کی آگ بھرے نغموں سے شورش اور حرارت جاتی رہی تاہم ان کے سینے میں سانس اب تک باقی ہے (کیا کبھی سوچا ہے کہ ان کی بقا کا سبب کیا ہے یہ ہوا کہ)

جب ان کی جمیعت درہم برہم ہو گئی اور دنیا کے طول و عرض میں انہیں بکھر جانا پڑا تو انھوں نے اپنے باپ دادا کے راستے کے سوا کسی راستے پر محمل نہ باندھا یعنی کوئی دوسرا راستہ اور مسلک اختیار نہ کیا ۔ اسی وجہ سے اب تک باقی چلے آتے ہیں

اے مسلمان تیری پرانی مجلس بھی بکھر گئی اور تیرے سینے میں زندگی کا چراغ بھی بجھ گیا ۔

تو اپنے دل پر توحید کی حقیقت کا نقش ثبت کر اور جو مصیبت آ پڑی ہے اس کا علاج تقلید کے ذریعے سے کر ۔

زوال کے زمانے میں اجتہاد کا دروازہ کھلا رہے تو قوم کے نظم و اتحاد کی بساط لپیٹی جاتی ہے ۔ یعنی نظم و اتحاد باقی نہیں رہتا ۔

کوتاہ نظر عالموں کے اجتہاد پر چلنے کے بجائے بزرگوں کے راستے کی پیروی میں کہیں زیادہ حفاظت کی صورت ہے

یاد رکھو تیرے بزرگوں کی عقل ذاتی اغراض سے متاثر نہیں تھی اور یاد رکھ کہ پاک آدمیوں کے کام کاج اغراض سے آلودہ نہیں ہوتے ۔

ان کی فکر بڑی باریک بینیاں کرتی رہی اور ان کی پرہیزگاری رسول اللہ ﷺ کے عہد مبارک کے بہت نزدیک ہے ۔

امام جعفر علیہ السلام کا سا دینی ذوق اور امام رازی کی سی چھان بین جاتی رہی ۔ عربی ملت کی آبرو قائم نہ رہی ۔

ہم پر دین کا راستہ تنگ ہو گیا اور ہر فرومایہ آدمی دین کی رازداری کا دعوے دار بن بیٹھا ہے ۔

اے مسلمان تو دین کے رازوں سے ناواقف ہے ۔ اگر تیرے دماغ میں عقل اور سمجھ باقی ہے تو ایک آئین ایک دستور، ایک دینی ضابطے پر قائم رہ ۔

میں نے زندگی کی بنض پہچاننے والے سے سنا ہے کہ تیرا اختلاف زندگی کی قینچی ہے یعنی اگر اختلاف پیدا ہوا تو وہ قینچی کی طرح تیری زندگی کاٹ کر رکھ دے گا جس سے ملت کا وجود ختم ہو سکتا ہے ۔

مسلمان آئین و ضابطہ کی وحدت کے بل پر زندہ ہے اور ملت اسلامیہ قرآن کی بنا پر زندہ رہ سکتی ہے ۔

ہم سب خاک ہیں رازوں کو جاننے والا دل قرآن ہے ۔ اسے مضبوطی سے تھام لے کیونکہ اللہ کی رسی وہی ہے ۔ اس کو مضبوطی سے تھامنے کا حکم ہمیں ملا ہے۔

جس طرح موتی دھاگے میں پرویا جاتا ہے تو بھی اسی طرح قرآن کے رشتے میں پرویا جا ۔ اگر ایسا نہ کرے گا تو یاد رکھ تو گردو غبار کی طرح پریشان ہو کر فنا ہو جائے گا ۔