بخش 1 - پیشکش به حضور ملت اسلامیه

اے ملت اسلامیہ جس طرح تیرے رسول خاتم الرسل ﷺ اور اس دنیا کے آخری نبی تھے اسی طرح تو قوموں کی خاتم یعنی تیرے بعد کوئی قوم پیدا نہ ہو گی ۔ اس سلسلے میں جو آغاز ہوا تھا وہ تیری ذات پر انجام کو پہنچ گیا ۔

اے ملت! تیرے پاکباز اور پاک باطن اصحاب کو اس سے ملتی جلتی حیثیت حاصل ہے جو پہلی قوموں میں انبیا کو حاصل تھی ۔ تیرے جن بزرگوں کے جگر عشق حق کی وجہ سے چاک چاک ہیں وہ دلوں کے زخم رفو کر دیتے ہیں ۔

اے امت مسلمہ ! تو نے اہل کلیسا کے حسن (علوم) پر نظر رکھی ہوئی ہے؛ اور تو راہ کعبہ سے دور جا پڑی ہے۔

ترجمہ: میاں عبدالرشید

یہ آسمان تیرے کوچے کے گردوغبار کی مٹھی ہے اور تیرے چہرے کے حسن کا یہ عالم ہے کہ دنیا کی نگاہیں اسی پر جمی ہوئی ہیں ۔ تیرا چہرہ دنیا والوں کے لیے تماشاگاہ ہے ۔

لیکن تیری کیفیت یہ ہے کہ تو موج کی طرح بے قرار ہو کر دوسری طرف چلی جا رہی ہے ۔ میں پوچھتا ہوں کہ تجھے ذوق تماشا کہاں لیے جا رہا ہے ۔ تو کس کے نظارے کے لیے جا رہی ہے ۔ ان دونوں شعروں کے آخری دو مصرعے سعدی کی غزل کے ایک شعر سے لیے گئے ہیں ۔

تجھے چاہیے کہ پروانے سے سوز کے راز سیکھے اور چنگاریوں میں محل تعمیر کرے یعنی گھر بنائے ۔

اپنی جان کے اندر عشق رسول اللہ کا انداز پیدا کر اور رسول اللہ ﷺ سے پھر اپنے پیمان نیاز وفا باندھ لے ۔

اے ملت! جب تیرے چہرے سے نقاب اوپر کو اٹھا اور میں نے اس کی آب و تاب دیکھی تو میرے دل کو نصرانیوں اور غیروں سے نفر ت ہو گئی ۔

میرے ہمنواؤں نے غیروں کو جلوہ افروزیوں کے افسانے سنائے ۔ زلف و رخسار کی داستانیں بیان کیں ۔

انھوں نے ساقی کے دروازے پر پیشانی گھسی، وہ مغ زادوں کے قصے کہتے رہے (یہ اس وقت کے عام شاعروں کی کیفیت تھی) ۔

اے ملت اسلامیہ! میں تو تیری تیغ ابرو کا شہید ہوں ۔ بلاشبہ میری حیثیت خاکی ہے لیکن تیرے ہی کوچے میں مجھے آسائش نصیب ہوئی ہے ۔

میں کسی کی مدح سرائی نہیں کر سکتا اس سے بہت اونچا ہوں ۔ ہر وزیر کے آگے میرا سر نہیں جھک سکتا ۔

قضا و قدر نے مجھے شعر و سخن کا آئینہ ساز بنا دیا ہے اور بادشاہوں سے بے نیاز کر دیا ہے اگرچہ وہ سکندر جیسی عالم گیر سلطنت ہی کے مالک ہوں ۔

میری گردن کسی کے احسان کے بوجھ کی روادار نہیں ہو سکتی، میں باغ میں جاؤں تو میرا دامن کھلا نہیں رہتا ،بند ہو کر کلی کی شکل اختیار کر لیتا ہے تا کہ کوئی یہ نہ سمجھے کہ میں باغ سے کچھ لینے کے لیے آیا ہوں ، یعنی کسی کے آگے دامن نہیں پھیلاتا ۔

میں اس دنیا میں تلوار کی طرح سخت کوش ہوں اور بھاری پتھر سے آب یعنی اپنی چمک اور تیزی حاصل کرتا ہوں ۔ اقبال نے شاعرانہ اندا ز میں یہ فرمایا ہے کہ میرا خنجر بھی پتھر سے اپنے لیے آب حاصل کرتا ہے ، سخت کوشی کا تقاضا بھی یہی ہے ۔

اگرچہ میں سمندر ہوں لیکن میری موجوں میں کوئی بیقراری نہیں ہے ۔ اور میرے ہاتھ میں بھنور کا کشکول نہیں ہے ۔

میں رنگ کا پردہ ہوں ، کوئی خوشبو نہیں کہ باد نسیم کا ہر جھونکا مجھے شکار کر کے لے جائے ۔ (مطلب یہ ہے کہ نسیم چلتی ہے تو خوشبو اڑا کر لے جاتی ہے لیکن رنگ نہیں لے جا سکتی ۔ )

میں زندگی کے اس مقام پر، جہان شعلے ہی شعلے ہیں ایک انگارہ ہوں اور اس پر خوش ہوں کہ میری راکھ میرے لیے خلعت مہیا کرے گی ۔

اے ملت اسلامیہ میری جان تیرے در پر نیاز (نذرانہ) لے کر آئی ہے، اس کے دامن میں تیرے لیے سوزو گداز کا تحفہ ہے ۔

جس آسمان کا رنگ نیلا ہٹ میں سمندر کے پانی سے ملتا جلتا ہے اس سے میرے پر حرارت دل پر دمبدم دریا ٹپکتے رہتے ہیں ۔

میں انہیں ندی سے بھی زیادہ باریک بناتا ہوں تا کہ وہ تیرے باغ کے صحن میں بہنے لگے ۔

اے ملت! یہ سب کچھ اس لیے ہے کہ تو ہمارے مجبوب کو پیاری ہے اور ہم نے دل کی طرح تجھے پہلو میں بٹھا رکھا ہے ۔

جب سے عشق نے میرے سینے میں آہ و فغاں کی بنیاد رکھی اس کی آگ نے میرے دل کو آئینہ بنا دیا ۔

میں پھول کی طرح اپنا سینہ چیر رہا ہوں تا کہ یہ آئینہ تیرے سامنے آ جائے ۔

اور تو اس آئینے میں اپنے چہرے پر ایک نظر ڈالے تاکہ تو اپنی زلف میں ہی اسیر ہو جائے ۔

میں تیری پرانی داستان پھر سے سناتا ہوں ، دہراتا ہوں تا کہ تیرے سینے کے داغ تازہ ہو جائیں ۔

میں اس قوم کے لیے جو اپنی حقیقت سے نا آشنا ہو چکی تھی، اللہ تعالیٰ کی بارگاہ میں پائیدار زندگی کی التجائیں کرتا تھا ۔

آدھی رات کا وقت تھا، ہر طرف سناٹا تھا اور میں رو رہا تھا ۔ دنیا سو رہی تھی اور میری آنکھوں سے آنسو بہہ رہے تھے ۔

میری جان صبر اور سکون سے محروم ہو چکی تھی اور میں یا حی یا قیوم کا ورد کر رہا تھا ۔ دعا پائیدار اور محکم زندگی کے لیے تھی، ایسے میں یا حی و یا قیوم ہی کا ورد موزوں تھا ۔

میری ایک آرزو تھی، اسے لہو بنا کر بہایا اور آنکھوں کے راستے باہر نکال دیا ۔

انسان لالے کی طرح کب تک متواتر جلتا رہے اور کب تک صبح سے شبنم کی بھیک مانگی جائے ۔

میں نے شمع کی طرح اپنے آنسو اپنے آپ پر گرانے شروع کئے اور اسی کی طرح اندھیری رات سے پنجہ آزمائی شروع کر دی جس شمع سے آنسو نکلتے ہیں وہ مومی شمع ہوتی ہے اور اندھیری رات سے شمع کی پنجہ آزمائی کا معاملہ بالکل واضح ہے ۔ کیونکہ وہ چاہتی ہے اندھیرا اس کے نور سے اجالا بن جائے ۔

میں خود گھلتا گیا اور روشنی کو تیز تر کرتا رہا، اس طرح دوسرے کے لیے محفل آراستہ کر دی ۔

مجھے ایک لمحے کے لیے بھی سینے کی جلن سے فرصت نہیں ملتی، میرے ہفتے میں روز جمعہ ہے ہی نہیں (اسلامی حکومت میں جمعہ تعطیل ہوتی تھی) ۔ شاعر بتانا چاہتا ہے کہ سب کو ہفتے میں ایک دن کے لیے چھٹی مل جاتی ہے لیکن میرے ہاں چھٹی کا کوئی دن نہیں آتا ۔

میرے پرانے جسم میں جو غموں سے نڈھال ہے جان کی کیفیت ایسی ہے جیسے آہ کا ایک جلوہ گردوغبار سے آلودہ ہو ۔

ازل کی صبح کو خدا نے مجھے پیدا کیا تو میرے ساز کے ریشمی تاروں میں نالے تڑپنے لگے ۔

یہ نالے ایسے تھے جو عشق کے بھید ظاہر کر دینے والے تھے اور جنھیں عشق کی حسرت گفتار کا خوں بہا کہنا چاہیے ۔

ان نالوں میں یہ قوت تھی کہ خس و خاشاک کو آگ کی فطرت بخش دیں اور خاک کی چٹکی میں پروانے کی شوخی بھر دیں (مطلب یہ کہ اللہ تعالیٰ نے میرے دل میں ازل ہی سے قوم کا درد رکھ دیا تھا اور وہی درد آج اس دعوت کا سبب بنا) ۔

عشق کے لیے لالے کی طرح داغ ہی کا سامان کافی ہے ۔ اگر اس کے گریبان میں لالے کا ایک بھی پھول ہو تو وہ کافی ہے ۔

اے ملت اسلامیہ ! میں یہی پھول تیری دستار (پگڑی) کے زینت بناتا ہوں تو بڑی گہری نیند سوئی ہوئی ہے میں حشر برپا کر رہا ہوں تا کہ تو جاگ اٹھے ۔

تاکہ تیری خاک کا دامن لا لہ زار بن جائے (وجود میں آئے) اور تیرا سانس اس کائنات کے لیے فصل بہار کی شکل اختیار کرے ۔