بخش 27 - قل هوالله احد

ایک رات میں نے حضرت ابوبکر صدیق کو خواب میں دیکھا اور آپ کے راستے کی خاک سے پھول چنے ۔

وہ ابوبکر جن کے احسان ہمارے آقا و مولا پر انسانوں سے زیادہ ہیں ۔ وہ ابوبکر جو ہمارے کوہ سینا کے پہلے کلیم تھے ۔ پہلے مصرع کے متعلق حدیث درج ہے کہ رفاقت اور مال میں حضرت ابوبکر کے احسان سب سے بڑھ کر ہے ۔ یعنی انھوں نے سب سے بڑھ کر صحابیت کا حق ادا کیا اور انھوں نے سب سے بڑھ کر پیغام حق کی اشاعت میں مال صرف کیا ۔ امن الناس اشارہ ہے اس حدیث کی طرف کی رسول اللہ ﷺ نے فرمایا امن الناس علی فی صحبتہ و مالہ ابوبکر تمام انسانوں میں سے مجھ پر رفاقت اور مال میں سب سے بڑھ کر احسان ابوبکر نے کیے ہیں ۔

حضرت ابوبکر کی ہمت اور ان کی ایثار کی حیثیت قومی کھیت کے لیے ابر رحمت کی تھی ۔ وہ اسلام غار، بدر اور قبر میں دوسرے تھے ۔

میں نے عرض کیا، اے عشق حق کے برگزیدوں میں سے برگزیدہ، آپ ہی عشق حق کے دیوان کا پہلا مطلع ہے ۔

ہمارے کام کی بناید آپ ہی کے ہاتھ سے مضبوط ہے کیونکہ اسلام کے لیے رسول اللہ ﷺ کی وفات کے بعد پہلا مصیبت خیز دور وہ تھا جس میں مختلف گروہ بغاوت پر آمادہ ہو گئے تھے ۔ ان میں سے بعض لوگ مرتد ہو چکے تھے ۔ بعض نے نبوت کا دعویٰ کر دیا تھا اور بعض نے زکواۃ روک لی تھی ۔ حالات بڑے تشویشناک تھے ۔ میں نے عرض کیا کہ جس طرح آپ نے ہماری بنیاد درست کر دی تھی اسی طرح ہماری بیماری کیلیے جس نے ہمیں سخت پریشان کر رکھا ہے کوئی علاج تجویز فرما دیجئے ۔

فرمایا! تو کب تک حرص و ہوس کا قیدی بنا رہے گا سورہ اخلاص سے چمک اور تابش حاصل کر ۔

دیکھو، سینکڑوں سینوں میں ایک ہی سانس چل رہا ہے ۔ یہ بھی توحید کے بھیدوں میں سے ایک بھید ہے ۔

تم بھی اسی (خدا) کا رنگ پیدا کرو تو اسی جیسے بن جاوَ گے اور دنیا میں اسی کے عکس جمال کے آئینہ دار ہو جاوَ گے ۔

جس نے تمہارا نام مسلمان رکھا وہ تجھے کثرت سے وحدت کی طرف لایا ہے (مسلمان نام اللہ نے رکھا، قرآن میں ہے وھو سمکم المسلمین ، فرماتے ہیں کہ مسلمان نام رکھنے کا مقصد ہی یہ تھا کہ سب ایک رہو) ۔

لیکن تو نے اپنے آپ کو ترک، افغان اور خدا جانے کیا کیا کچھ کہا ۔ تم پر افسوس ہے کہ تو جو کچھ تھا وہی رہا ۔

قوم کو ان مختلف ناموں سے نجات دلاوَ ۔ خم (صراحی) سے ربط قائم رکھو، جام و ساغر سے کنارہ کش ہو جاوَ ۔

تم نام کے پیچھے پڑے ہوئے ہو (جو رسوائی کا سامان ہے) گویا تم اپنے درخت سے کچے پھل کی طرح گر گئے ہو ۔

تم یگانگی سے موافقت پیدا کر لو اور دوئی سے بے تعلق ہو جاوَ، اپنی وحدت کو پارہ پارہ نہ کرو(ظاہر ہے کہ اسلامی ملت کے بجائے ترکی، افغانی، عربی ملت قرار دے لینے کا مطلب یہی ہے کہ وحدت کا شیرازہ بکھر جائے) ۔

اے وحدت کی پرستش کرنے والو! اگر تو حقیقتا تو ہے تو تو کب تک دوئی کا سبق پڑھتا رہے گا ۔

تم نے اپنا دروازہ اپنے آپ پر بند کر لیا ، جو کچھ زبان سے کہتے ہو چاہے کہ اسے دل میں جگہ دو ۔

تم نے ایک قوم کی سینکڑوں قو میں بنا ڈالیں ، گویا اپنے قلعے پر خود ہی شبخون مارا ۔

تم ایک ہو جاوَ اور توحید کا نقشہ عملی اعتبار سے دنیا کے سامنے پیش کرو ۔ کلمہ توحید میں جو مفہوم چھپا ہوا ہے اسے عمل کے ذریعےسے وجود میں لے آوَ ۔

عمل کے ذریعے سے ایمان کی لذت میں اضافہ ہوتا ہے ۔ وہ ایمان مردہ ہو جاتا ہے جس پر عمل نہ کیا جائے ۔