بخش 26 - خطاب به مخدرات اسلام

اے مسلمان خاتون! تیری چادر ہماری عزت و ناموس کا پردہ ہے ۔ اور تیری روشنی ہمارے فانوس کے لیے چمک دمک کا سامان بہم پہنچاتی ہے (قندیل کا سرمایہ ہے) ۔

تیری پاکیزہ فطرت ہمارے لیے باعث رحمت ہے ۔ اسی سے دین کی قوت ہے اور یہی ہماری قوم کی بنیاد ہے ۔

بچے نے جب تیرے دودھ سے لب تر کئے (دودھ پینا شروع کیا) تو تو نے سب سے پہلے اسے کلمہ توحید سکھایا ۔

تیری ہی محبت میں ہمارے طور طریقے ، ہماری سوچ بچار، ہماری بات چیت اور ہمار ے کردار ڈھلتے ہیں ۔

ہماری بجلی، جو تیرے بادل کی آغوش میں آرام پا رہی تھی وہ پہاڑوں پر چمکی اور صحراؤں میں کڑکی ۔

اے مسلمان خاتون! تجھے قدرت نے آئین حق کی نعمت کی امانت دار بنایا ۔ تیری سانسوں میں دین حق کی حرارت بھری ہوئی ہے ۔

دور حاضر بڑا مکار اور عیار ہے ۔ اس کی حقیقت کچھ ہے اور ظاہر کچھ ۔ اس کے قافلے میں دن کی متاع لوٹی جاتی ہے ۔

یہ اندھا ہے اور اس کا فہم خدا کو نہیں پہچانتا ۔ بے حقیقت لوگ اس کے چکروں میں پڑ کر قیدی بن چکے ہیں ۔

اس کی آنکھیں بے باک، شوخ اور بے پردہ ہیں ۔ اس کی پلکوں کا پنجہ جہاں پڑ جائے گڑ جاتا ہے ۔

جو وجود اس کا شکار ہو جاتا ہے عجیب بات یہ ہے کہ وہ اپنے آپ کو آزاد کہتا ہے جو اس کا کشتہ ہو جاتا ہے وہ اپنے آپ کو زندہ سمجھتا ہے ۔

اے مسلمان خاتون! تجھی سے امید ہے کہ اس فتنہ انگیز دور میں ہماری جمیعت کے نخل کی آبیاری کرے گی اور تو ہی ہماری ملت کے سرمائے کی نگہبان ہے ۔

تو نے نفع اور نقصان کے جو پیمانے سوچے ہیں انہیں نظر انداز کر اور صرف باپ دادا کے رستے پر ہی چلنا تیرے لیے مناسب ہے ۔

اے مسلمان خاتون! زمانے کی لوٹ مار سے ہوشیار رہ ۔ اپنے بیٹوں کو آغوش میں لے لے۔

یہ چمن میں پیدا ہوئے لیکن انھوں نے ابھی پر نہیں تولے اور اپنے گھونسلے سے بہت دور پڑے ہیں ۔ مطلب یہ کہ ان کی طرف توجہ کر ان کی صحیح اسلامی طریقے پر پرورش و تربیت کر ۔

اے مسلمان خاتون! تیری فطرت میں بڑے بلند جذبے موجزن ہیں ۔ تو ہوش کی نظر حضرت فاطمہ کے نمونے پر جما ئے رکھ ۔

تا کہ تیری شاخ میں بھی امام حسین جیسا پھل لگے اور ہمارے باغ میں پہلی سی بہار پھر آ جائے ۔