بخش 25 - در معنی اینکه سیدة النساء فاطمة الزهراء اسوه کامله ایست برای نساء اسلام

حضرت مریم تو حضرت عیسیٰ سے (مادرانہ) نسبت کی بنا پر ایک وجہ سے عزیز ہیں جبکہ فاطمۃ الزہرا ایسی تین نسبتوں سے عزیز ہیں ۔

پہلی نسبت یہ کہ آپ حضرت رحمتہ اللعالمین کی نو ر نظر تھیں ، جو پہلوں اور پچھلوں کے امام تھے ۔

ان کی وجہ سے دنیا کے جسم میں جان پھونکی گئی اور ایک ایسا زمانہ معرض وجود میں آیا جس کے قاعدے ،قانون اور آئین بلکل نئے تھے ۔

دوسری نسبت یہ کہ حضرت فاطمہ ہل اتیٰ کے تاج دار کی حرم تھیں ۔ یعنی حضرت علی المرتضیٰ جو اللہ کے شیر تھے اور مشکلیں آسان کر دیتے تھے ۔

وہ بادشاہ تھے لیکن ایک تنگ و تاریک حجرہ گویا ان کا محل تھا ۔ ایک تلوار اور ایک زرہ کا کل سروسامان تھا ۔

تیسری نسبت یہ کہ آپ ان دو جلیل القدر بزرگوں کی والدہ تھیں جن میں سے ایک عشق حق کی پرکار کے مرکز تھے اور دوسرے کو عشق حق کی قافلہ سالاری ملی تھی ۔

پہلے حضرت حسن تھے جو حرم پاک کی شمع تھے ۔ انھوں نے بہترین امت یعنی ملت اسلامیہ کی جمیعت محفوظ رکھی ۔

اس لیے حکمرانی کو ٹھکرادیا کہ آپس میں جنگ اور عداوت کی جو آگ بھڑک اٹھی تھی وہ بجھ جائے ۔ یہاں اس خانہ جنگی کی طرف اشارہ ہے جو حضرت علی کے عہد خلافت میں شام کی طرف سے شروع ہوئی تھی ۔ حضرت علی کے بعد حضرت امام حسن خلیفہ منتخب ہوئے اور آپ کو خانہ جنگی روکنے کی اور کوئی صورت نظر نہ آئی تو خلافت چھوڑ دی ۔

دوسرے حضرت امام حسین دنیا بھر کے نیکو ں کے آقا اور احرار کے لیے قوت بازو تھے ۔

زندگی کے نغمے میں صرف حضرت امام حسین کی وجہ سے سوز پیدا ہوا اور اہل حق نے انہیں سے آزادی کا سبق لیا ۔

بیٹوں کی سیرتیں ماؤں کی آغوش میں تیار ہوتی ہیں ۔ انسانی فطرت میں سچائی اور پاکیزگی کے جو جوہر ہیں وہ ماؤں ہی کی تربیت سے چمکتے ہیں ۔

تسلیم کی کھیتی کا حاصل فاطمہ زہرہ تھیں اور آپ مسلمان ماؤں کے لیے اسوہَ کامل بن گئیں ۔

ایک محتاج کی خاطر حضرت فاطمہ کا دل کچھ اس طرح جلا (انھیں بے حد دکھ پہنچا) اتنی متاثر ہوئیں کہ اس کی امداد کے لیے اپنی چادر ایک یہودی کے ہاتھ بیچ ڈالی ۔

نوری اور ناری فرشتے اورر پری آپ کے فرمانبردار تھے ۔ شوہر کی فرمانبرداری کا یہ عالم تھا کہ آپ نے اپنی مرضی شوہر کی مرضی میں گم کر دی تھی (سراپا تسلیم و رضا تھیں ) ۔

آپ نے صبر و رضا کی ادب گاہ میں تربیت پائی تھی اور صبر و رضا کی کیفیت یہ تھی کہ چکی پیستی جاتیں اور کلام اللہ کی تلاوت کرتی جاتیں ۔

آپ کے آنسو کبھی تکیے پر نہ گرے ۔ نماز کے لیے کھڑی ہوتیں تو آنکھوں سے آنسو موتیوں کی طرح گرنے لگتے ۔

جبرئیل ان کے آنسووَں کو زمین سے اٹھا لے جاتے اور شبنم کی طرح عرش بریں پر ڈال دیتے ۔

اللہ تعالیٰ کے قانون کی ڈوری نے میرے پاتھ پاؤں باندھ رکھے ہیں ۔ رسول اللہ ﷺ کے فرمان کا پاس مجھے روک رہا ہے ۔

ورنہ میں حضرت فاطمہ کے مزار کا طواف کرتا اور اس مقام پر سجدہ ریز ہوتا ۔