بخش 24 - در معنی اینکه بقای نوع از امومت است و حفظ و احترام امومت اسلام است

مرد کے ساز سے عورت کا زخمہ نغمہ پیدا کرتا ہے ۔ یا آدمی کا ساز عورت کی مضراب ہی سے نغمہ سرا ہوتا ہے ۔ عورت کی نیازمندی مرد کے ناز کو دوبالا کردیتی ہے ۔

قرآن مجید کے بیان کے مطابق عورتیں مردوں کی برہنگی کو چھپانے کے لیے لباس ہیں دل لبھانے والا حسن عشق کے لیے پیراہن بن گیا ۔ یہاں قرآن مجید کی اس آیت کی طرف اشارہ ہے ھن لباس لکم و انتم لباس لھن عورتیں تمہار لباس ہیں اور تم ان کا لباس ہو ۔

عشق حق عورت ہی کی آغوش میں پرورش پاتا ہے ۔ یہ نغمہ اسی کاخاموش زخمہ (مضراب)پیدا کرتا ہے ۔

اس پاک وجود نے جس پر کائنات فخر کر رہی ہے یعنی رسول اللہ ﷺ نے عورت کا ذکر خوشبو اور نماز کے ساتھ فرمایا ۔

جس مسلمان نے عورت کو لونڈی سمجھا ، سمجھ لینا چاہیے کہ اسے قرآن کی حکمت سے کوئی حصہ نہیں ملا ۔

اگر تو غور کرے تو امومت سراسر رحمت ہے کیونکہ اسے نبوت سے نسبت ہے ۔

وہ اس طرح کہ رسول اللہ ﷺ جس شفقت کا پیکر تھے اسی شفقت کا پرتو اللہ تعالیٰ نے ماؤں کے دلوں میں ڈالا ۔ پیغمبر قوموں کی سیرت کے سانچے تیار کرتے ہیں ۔ مائیں بھی اپنے دائرے میں یہی خدمت انجام دیتی ہیں ۔

امومت ہی کی بدولت ہماری حیثیت (تعمیر ) مستحکم ہوتی ہے ۔ ماں کی پیشانی پر جو خط ہوتا ہے وہی ہماری تقدیر ہے ۔

اگر تیری عقل بات کی تہ تک پہنچ سکتی ہے تو لفظ امت پر غور کر ۔ اس میں بڑے نکتے ہیں ۔ یہ امومت کے حوالے سے کہا گیا ہے کیونکہ ان دونوں لفظوں کا مادہ ایک ہی ہے۔

ماؤں کے قدموں میں جنت ملتی ہے ۔

قوم عورتوں کی عزت ہی سے قائم ہے ورنہ سمجھ لینا چاہیے کہ زندگی کا کام ناتمام ہے ۔

زندگی کی رفتار امومت ہی کی بدولت تیز ہے اور زندگی کے بھید امومت ہی سے کھلتے ہیں ۔

ہماری زندگی کی ندی میں جو پیچ و تاب یا گرداب پائے جاتے ہیں وہ سب امومت ہی سے ہیں ۔

وہ گنوار اور جاہل لڑکی جس کا قد چھوٹا، جسم موٹا اور خط و خال غیر موزوں ہیں وہ غیر مہذب بھی ہے ۔

اس کی صحیح معنوں میں پرورش نہیں ہوئی کوتاہ نظر ہے، کم گو ہے اور بالکل سادہ ہے ۔

تاہم وہ ماں بنی اور ماں کے تمام دکھ رنج سہہ کر دل کا خون کیا اور اس کی آنکھوں کے گرد نیلے حلقے پڑ گئے ۔

اگر قوم کو ایسی خاتون کے ہاتھ سے غیرت مند اور حق پرست مسلمان مل جائے ۔

تو ہمیں اقرار کرنا چاہیے کہ ہماری قومی ہستی اس خاتون کے رنج و غم اور درد و الم سے مستحکم ہے اسی کی شام سے ہماری صبح دنیا بھر کو چمکانے والی بنی ۔

لیکن وہ نازک جسم والی عورت جس کی گود بچے سے خالی ہے اور محشر جس کی نگاہ کا خانہ زاد ہے ۔ قیامت جس کی نگاہوں کی لونڈی ہے

اس کا دماغ (فکر اور سوچ) مغرب کی چمک دمک سے روشن ہے ۔ بہ ظاہر عورت نظر آتی ہے لیکن اس کے باطن کو دیکھا جائے تو اسے عورت ہونے سے کوئی مناسبت نہیں ۔

اس نے ملت بیضا کے قاعدے اور ضابطے توڑ دیئے اور اپنی آنکھوں سے حل کئے ہوئے عشوے گراتی رہی (اس کی آنکھوں کی شرم و حیا نہیں رہی) ۔

وہ شوخ چشم ہے اس کی آزادی فتنے پیدا کرنے والی ہے اور وہ شرم و حیا سے کبھی آشنا نہیں ہوتی ۔

اس نے علم تو پڑھ لیا لیکن ماں ہونے کا بوجھ برداشت نہ کیا ۔ اس کی شام کی پیشانی پر ایک بھی ستارہ نہ چمکا یعنی ایک بھی بچہ پیدا نہ ہوا(نہ وہ ماں بنی اور نہ کسی بچے کو جنم دیا) ۔

ایسا پھول ہمارے باغ میں پیدا ہی نہ ہو تو بہتر ہے اور قوم کے دامن سے ایسے دھبے کا دھل ہی جانا بہتر ہے ۔

لا الہ کہنے والے تاروں کی مانند اتنے زیادہ ہیں کہ ان کی گنتی نہیں ہو سکتی ۔ اور وہ ابھی تک زمانے کی تاریکی میں آنکھیں بند کئے پڑے ہیں ۔

انھوں نے ابھی تک عدم سے پاؤں باہر نہیں نکالا اور کیف و کم کی اس دنیا میں ابھی نہیں آئے غالباً مراد ہے کہ ابھی وہ اپنی ماؤں کے پیٹ میں ہیں ۔

جلووَں کی وہ کرنیں جو ابھی تک دیکھی نہیں گئیں ہماری موجود تیرگی کے اندر چھپی ہوئی ہیں ۔

پھول کی پنکھڑی پر ابھی شبنم نہیں گری اور صبا نے کلیوں کو ابھی تک زخمی نہیں کیا یعنی کلیاں ابھی تک کھلی نہیں ۔

ممکنات کا یہ لالہ زار ماؤں ہی کے باغ کی کیاریوں میں پھوٹے گا ۔

اے حقیقت پر نظر رکھنے والے جان لے کہ قوم کا اصل سرمایہ روپیہ ، سروسامان ، چاندی اور سونا نہیں ۔

اصل سرمایہ یہ ہے کہ اسے نوجوان ملیں ، جو تندرست ہوں ، ان کے دماغ تازہ ہوں ، سخت محنت و مشقت کے عادی ہوں اور چاق و چوبند رہیں ۔

مائیں اخوت کے بھید کی نگہبان (محافظ) ہیں ۔ قرآن مجید اور ملت کے لیے تقویت(قوت) کا باعث ہیں ۔ (ماؤں کی تربیت ہی سے اولاد میں بھائی چارے کا جذبہ پیدا ہوتا ہے ۔ وہ قرآن و ملت کی تقویت کا باعث بنتی ہیں ) ۔