بخش 23 - در معنی اینکه کمال حیات ملیه این است که ملت مثل فرد احساس خودی پیدا کند و تولید و تکمیل این احساس از ضبط روایات ملیه ممکن گردد

اے بلند نظر اور حقیقت شناس انسان! تو نے کبھی بچے کو دیکھا ہے جو اپنی حقیقت سے بے خبر ہو تا ہے

اسے نزدیکی اور دوری میں کوئی تمیز نہیں ہوتی ۔ چاندنی میں اسے لٹا دیا جاتا ہے تو اس کے انداز میں ہاتھ پاؤں مارتا ہے گویا چاند کو پکڑنا چاہتا ہے ۔

وہ ماں کے سوا کسی کو نہیں پہچانتا ۔ یا تو روتا ہے یا دودھ پیتا ہے یا سو رہتا ہے ۔

اس کے کان سروں کے اونچا نیچا ہونے سے بے بہرہ ہوتے ہیں ۔ دروازے کی زنجیر کھڑکا کر شور پیدا کیا جائے تو بچہ اسی کو نغمہ سمجھ لیتا ہے ۔

اس کے افکار بالکل سادہ اور اچھوتے ہوتے ہیں ۔ اس کی باتیں موتی کی طرح پاکیزہ ہوتی ہیں ۔

پھر اس کا شعور ترقی پاتا ہے تو اس کی سمجھ بوجھ کا سرمایہ یہ ہوتا ہے کہ ہر شے کی حقیقت معلوم کرے ۔ وہ پوچھتا رہے گا، یہ کیوں ہے، کب سے ہے کس طرح ہوئی، کہاں سے آئی ۔

اس کی فکر کے ورق پر مختلف چیزوں کے نقش بنتے جاتے ہیں ۔ وہ ہر وقت اس شغل میں رہتا ہے کہ اپنے سوا جو کچھ ہے اسے دیکھے اور اس کی حقیقت معلوم کرے ۔

اگر پیچھے سے کوئی اس کی آنکھیں اچانک بند کر لے تو وہ بیقرار ہو جاتا ہے ۔

اس کی ناپختہ فکر زمانے کی ہوا میں اس طرح اڑتی ہے جس طرح نیا نیا شکاری باز اڑتا ہے ۔

بچہ اس فکر کو شکار کے پیچھے چھوڑ دیتا ہے، پھر اسے واپس لے آتا ہے ۔ واضح رہے کہ جب باز کو شکار پر لگایا جاتا ہے تو اس کے پاؤں ایک ڈور میں بندھے رہتے ہیں تاکہ شکاری جب چاہے، اشارہ کر کے یا ڈور کھینچ کر اسے واپس لے آئے ۔

بچہ اپنی فکر کو شکار کے بعد اس لیے واپس لاتا ہے کہ اس کی فکر نے آگ پکڑ لی تھی اور وہ چاہتا تھا کہ اس کی سمجھ بوجھ سے پھلجھڑی کی مانند پھول جھڑنے لگیں ۔

جب اس کی پکڑنے والی نظر اپنے آپ پر پڑتی ہے تو وہ سینے پر ہاتھ مار کر کہتا ہے کہ میں ۔

اس کی یاد اسے خود اس کی ذات سے آگاہ کر دیتی ہے ۔ یوں اس کی گزشتہ اور آئندہ کل کے درمیان ربط پیدا ہو جاتا ہے ۔

اس سنہری سار میں اس کے دن پروئے جاتے ہیں ۔ بالکل اسی طرح جیسے موتی لڑی میں ایک دوسرے کے بعد ہوتے ہیں ۔

اگرچہ اس کا بدن ہر لحظہ گھٹتا بڑھتا رہتا ہے مگر اس کے دل سے یہ صدا بلند ہوتی رہتی ہے کہ میں وہی ہوں جو تھا یا جو کبھی میں تھا ۔ میں کا یہ احساس نیا نیا پیدا ہوا ۔

دراصل زندگی کا آغاز ہے اور سمجھنا چاہیے کہ زندگی کا ساز بجنے لگا اور اس سے نغمے پیدا ہونے لگے ۔

جو ملت نئی نئی پیدا ہوتی ہے اس کی حالت بھی ماں کی گود والے بچے کی سی ہوتی ہے ۔ جو بچہ اپنے آپ سے آگاہ نہیں ہوتا ۔

وہ موتی ہوتا ہے مگر ایسا جو راستے کی گرد میں لپٹا ہوا ہو ۔

اس قوم کے آج کا رشتہ آئندہ کل سے بندھا نہیں ہوتا اور دن رات کے حلقے سے اس کے پاؤں آزاد ہوتے ہیں ۔

اس کی مثال یوں سمجھو جیسے ہستی کی آنکھ میں پتلی کہ وہ دوسروں کو دیکھتی ہے اور اپنے آپ کو نہیں دیکھتی ۔

وہ اپنے دھاگے کی سینکڑوں گرہیں کھولتی ہے، پھر اسے خودی کے تار کا سرا ملتا ہے یعنی اس میں بھی کچھ دیر کے بعد خودی کا احساس پیدا ہوتا ہے ۔

پھر وہ دنیا کے کاروبار میں سرگرمی میں حصہ لیتی ہے تو خودی کا جو نیا نیا شعور پیدا ہوا تھا وہ پائیدار واستوار ہو جاتا ہے ۔

وہ نقش اٹھاتی اور بٹھاتی ہے اس طرح اپنی سرگزشت تیار کرتی ہے ۔

اگر فرد کے دنوں کا ربط و ضبط ٹوٹ جائے تو اس کے فہم و ادراک کا شانہ دندانوں سے محروم ہو جاتا ہے یعنی فہم و ادراک کچھ کام نہیں دیتے ۔ یہ ظاہر ہے کہ شانے کے دندانے ٹوٹ جائیں تو وہ کسی کام کا نہیں رہتا ۔

اسی طرح قوم بھی اپنی تاریخ سے روشنی حاصل کرتی ہے اور اپنی روایات کی یاد سے اس کے اندر خود شناسی پیدا ہوتی ہے۔

ترجمہ: میاں عبدالرشید

اگر وہ اپنی تاریخ بھول جائے گی تو پھر فنا کی تاریکی میں گم ہو جائے گی ۔

اے عقلمند! تیری زندگی کا نسخہ یہ ہے کہ اپنے دنوں کا شیرازہ باندھے ۔

یہی دنوں کا ربط و ضبط ہمارے لیے لباس ہے ۔ یہ لباس جس سوئی سے سلتا ہے وہ پرانی روایات کی حفاظت ہے ۔

تو اپنے آپ سے بیگانہ ہے ۔ کیا تجھے معلوم ہے کہ تاریخ کیا ہے کیا یہ کہانی ہےقصہ ہے افسانہ ہے

ہرگز نہیں ، یہ تجھے تیری حقیقی حیثیت سے آگاہ کرتی ہے ۔ تجھے بتاتی ہے کہ کیا کچھ کرنا چاہیے ۔ اس طرح تجھے صاحب عزم و ہمت بناتی ہے ۔

تاریخ روح کے لیے آب و تاب کا سرچشمہ ہے اور قوم کے جسم میں اسے رگ و پے کی حیثیت حاصل ہے ۔

یہ پہلے تجھے تلوار کی طرح سان پر لگاتی ہے ، پھر اٹھا کر دنیا کی کشمکش گاہ میں پھینک دیتی ہے کہ جو انجام دے سکتا ہے انجام دے ۔

واہ واہ! یہ کتنا راحت انگیر اور دل افروز ساز ہے، جس کے تاروں میں گزرے ہوئے زمانے کے نغمے بند ہیں ۔

تو اس کی جلن میں بجھا ہوا شعلہ دیکھ سکتا ہے ۔ امروز کی گود میں گزشتہ کل کے حالات کا نظارہ کر سکتا ہے ۔

تاریخ کی شمع قوموں کے نصیبے کا ستارہ ہے ۔ اس سے آج کی رات بھی روشن ہے اور گزشتہ کل کی رات بھی ۔

وہ گہری نظر والی آنکھ ہے جو دور ماضی کو دیکھتی اور اسے تیرے سامنے اصل صورت میں لا کر آراستہ کر دیتی ہے ۔

اس کی صراحی میں سینکڑوں سال کی شراب ہے اور اسکی شراب میں گزری ہوئی مستی محفوظ ہے ۔

تاریخ ایسی شکاری ہے کہ جو پرندہ ہمارے باغ سے اڑ گیا، اسے بھیاپنے جال میں پھانسے ہوئے ہے ۔

تو تاریخ کو یاد اور محفوظ رکھ اور مستحکم و استوار ہو جا ۔ جو سانس جا چکے ہیں ان سے فیضان حاصل کر کے نئی زندگی پیدا کر ۔

اگر تو اپنی گزشتہ کل کو امروز سے جوڑ لے گا تو زندگی تیرے ہاتھ کا سیدھایا ہوا پرندہ بن جائے گی ۔

اگر تو گزرے ہوئے زمانے کا رشتہ سنبھالے نہیں رہے گا تو اس بیمار کی طرٖح ہو جائے گا جسے دن کو نظر نہیں آتا اور چمگادڑ بن جائے گا جو روشنی سے بھاگتی ہے ۔

تیرے ماضی سے تیرا حال اور حال سے مستقبل پیدا ہو گا ۔

اگر تو ایسی زندگی کا خواہاں ہے جسے کبھی زوال نہ آئے تو ماضی کا رشتہ حال و مستقبل سے نہ توڑنا چاہیے ۔

زندگی اس کے سوا کچھ نہیں کہ تسلسل کی آگاہی کی ایک لہر ہے ۔ شراب نوشوں کے نزدیک قلقل کا شور ہی زندگی ہے ۔