بخش 5 - در معنی اینکه یأس و حزن و خوف ام الخبائث است و قاطع حیات و توحید ازالهٔ این امراض خبیثه می کند

کیا تمہیں معلوم ہے کہ موت کا سروسامان کیا ہے یہ کہ آرزو کا رشتہ کٹ جائے (جو شخص آرزو سے محروم ہوا سمجھ لو کہ اس کی موت کے سامان جمع ہو گئے) زندگی کو مضبوط و مستحکم بنانے کا وسیلہ یہ ہے کہ اللہ تعالیٰ کی بشارت لاتقنطو کو سامنے رکھتا ہوا کبھی مایوس نہ ہو ۔

امید کا مطلب یہ ہے کہ انسان کے دل میں پے در پے آرزووَں کا ظہور ہوتا رہتا ہے ۔ نا امیدی زندگی کی لیے زہر ہے ۔

نا امیدی انسان کو قبر کی طرف بھینچ کر رکھ دیتی ہے ۔ اگر الوند پہاڑ کی مانند بھی مضبوط و مستحکم ہو تو اسے چت گرا کر دم لیتی ہے ۔

کمزوری نا امیدی کی بندہَ احسان ہے (احسان کی لونڈی ہے) نامرادی اس کے دامن سے بندھی چلی آ رہی ہے ۔ (مطلب یہ کہ کمزوری ، ناتوانی اور نامرادی نا امیدی ہی سے پیدا ہوتی ہے) ۔

مایوسی زندگی کو سلا دیتی ہے اور اس کے اجزا میں سستی کی رہبر بن جاتی ہے یعنی اس کے اجزا سست کر ڈالتی ہے ۔

مایوسی کا سرمہ جان کی آنکھ کو اندھا کر دیتا ہے ۔ روز روشن اس کی وجہ سے اندھیری رات بن جاتا ہے ۔

مایوسی کے سانس سے زندگی کی قوتیں مر جاتی ہیں اور اسکے چشمے خشک ہو جاتے ہیں ۔

مایوسی غم کے ساتھ ایک چادر میں سوتی ہے اور غم جان کی رگ کے لیے نشتر ہے (ایک چادر میں سونے کا مطلب یہ ہے کہ دونوں ایک دوسرے کے مستقل ساتھی ہیں ) ۔

اے مخاطب تو کیوں غم کے قیدخانے میں جکڑا بیٹھا ہے ۔ رسول اللہ ﷺ کی بارگاہ سے لاتحزن کا سبق حاصل کر یعنی حالات کتنے ہی ناموافق ہوں لیکن غمگین کبھی نہ ہو ۔

لاتحزن کا سبق صدیق نے صدیق کو پڑھایا تھا اور تحقیق کا جام پلا کر اسے مست کر دیا تھا ۔

مسلمان نے رضا کی بدولت روشن ستارے کی حیثیت اختیار کر لی ہے ۔ ہستی کے راستے میں اس کے لبوں پر ہمیشہ ہمیشہ تبسم رقصاں رہتا ہے ۔ مسلمان راہ رضا پر چلتا ہوا زندگی کی منزل طے کرتا ہے ۔

اگر خدا پر تیرا عقیدہ پختہ ہے تو غم کے بندھن سے آزاد ہو جا ۔ یہ کم ، زیادہ کا خیال کیوں تجھے پریشان کر رہا ہے ۔ اسے دل سے نکال ڈال ۔

ایمان کی قوت تیری زندگی بڑھاتی ہے ۔ تجھے چاہیے کہ لاخوف علیہم کا ورد جاری رکھے یعنی خوف تیرے پاس بھٹکنے نہ پائے ۔

جب اللہ کا کوئی پیغامبر حضرت موسیٰ کی طرح فرعون جیسے جابر کے پاس پیغام حق لے کر جاتا ہے تو اس کا دل لاتخف سے مضبوط ہو جاتا ہے ۔

اللہ کے سوا کسی اور کا خوف عمل کی قوت کا دشمن ہے ۔ اور زندگی کے قافلے کو لوٹ لیتا ہے ۔

بڑے مضبوط ارادے والے آدمی پر خوف چھا جائے تو وہ سوچنے لگ جائے گا اور اس کا عزم تذبذب میں پڑ جائے گا ۔ زیادہ سوچ بچار انسان کی قوت عمل کو شل کر کے رکھ دیتی ہے ۔

جب خوف کا بیج انسان کی مٹی میں جگہ پیدا کر لیتا ہے تو زندگی اپنے پورے جوہر نمایاں کرنے سے محروم ہو جاتی ہے ۔

خوف کی فطرت قوت اور توانائی سے محروم ہے ۔ وہ لرزنے والے دل اور کانپنے والے ہاتھ ہی سے سازگار ہوتی ہے ۔

خوف پاؤں سے چلنے کی قوت چرا لیتا ہے ۔ وہ دماغ سے سوچ بچار کی صلاحیت چھین لے جاتا ہے ۔

تیرا دشمن اگر تجھے خوف زدہ دیکھے گا تو وہ تجھے اسی طرح اچک لے جائے گا جس طرح پھول کیاری سے توڑ لیا جاتا ہے ۔

محض دشمن کی تلوار ہی تجھ پر زیادہ قوت سے نہیں پڑے گی بلکہ خوف کی حالت میں اس کی نظر بھی تیرے لیے تلوار بن جائے گی ۔

خوف نے ہمارے پاؤں زنجیر سے جکڑ رکھے ہیں ورنہ ہمارے دریا میں سینکڑوں طوفان اٹھ سکتے ہیں ۔

تیرے سانس سے لے کیوں نہیں اٹھتی صرف اس لیے کہ خوف نے تیرے ساز کے تار بہت ڈھیلے کر دیے ہیں ۔

تو وہ تار کس لے کہ ان سے نغمے اٹھنے لگیں اور آہ و نالہ سے آسمان پر محشر بپا ہو جائے

خوف موت کی ولایت کا جاسوس ہے یعنی وہ موت کی خاطر سرگرم عمل ہے ۔ اس کا باطن لفظ مرگ کے میم کی طرح تاریک ہے ۔

خوف کی آنکھ زندگی کا کارخانہ درہم برہم کر ڈالتی ہے ۔ اورا س کا کان زندگی کے اخبار کا چور ہے ۔ یعنی جو چیزیں زندگی کا سازوسامان ہیں انہیں چرا کر لے جاتا ہے ۔

جو برائیاں تیرے دل کے اندر چھپی ہوئی ہیں اگر تو غور کرے تو واضح ہو جائے گا کہ وہ سب خوف سے پیدا ہوئیں (ان کی اصل جڑ خوف ہی ہے) ۔

مکاری اور ریاکاری کے پردے سے خوف کا پیراہن تیار ہوتا ہے ، خوشامد، مکر و حیلہ ، کینہ ، جھوٹ یہ سب خوف ہی سے فروغ پاتے ہیں ۔

مکاری اور ریاکاری کے پردے سے خوف کا پیراہن تیار ہوتا ہے اور اس کا دامن فتنوں کے لیے ماں کی گود ہے ۔

جس شخص کا دل ہمت سے مضبوط و مستحکم نہیں ہوتا وہ ناموافق چیزوں کو بھی خوشی خوشی قبول کر لیتا ہے ۔

جس شخص نے رسول اللہ ﷺ کے ارشادات کی حقیقت سمجھ لی وہ یقینا شرک کو خوف میں چھپا ہوا پائے گا