بخش 6 - محاورهٔ تیر و شمشیر

تیر نے عین گھمسان کے رن میں سوفار کے لب سے کام لیتے ہوئے سچائی کا ایک راز تلوار سے بیان کیا ۔

اے تلوار! تیرے اندر جو جوہر موجود ہیں وہ تیرے کوہ و قاف کی پریاں ہیں ۔ حضرت علی علیہ السلام کی ذوالفقار بھی تیرے ہی آبا اجداد میں سے تھی ۔

تو نے اللہ کی تلوار یعنی خالد بن ولید کے بازو کی قوت دیکھی ہے ۔ کیونکہ انھوں نے تجھ سے کام لیا اور ملک شام کے سر پر شفق کا چھڑکاوَ کر دیا ۔

ایک طرف تیرا سرمایہ خدا کے قہر و غضب کی آگ ہے دوسری طرف تیرے سائے کے نیچے بہشت بریں ہے ۔

میں ترکش میں رہوں یا ہوا میں چلوں ، جہاں کہیں بھی ہوں سراپا آگ رہتا ہوں ۔

جب میں کمان سے نکل کر مقابل کے سینے کی طرف آتا ہوں تو سینے کی گہرائی میں خوب چھان بین کرتا ہوں ۔

اگر مجھے وہاں قلب سلیم نظر نہ آئے اور ایسا قلب ملے جو خوف اور مایوسی کی آلائشوں میں لتھڑا ہوا ہو ۔

تو میں اپنی نوک سے اسے ٹکڑے ٹکڑے کر کے موج خون کا کرتا پہنا دیتا ہوں ۔

اگر میں دیکھوں کہ اندر مومن کا دل ہے جس کی وجہ سے پورا سینہ آئینہ کی طرف صاف اور باطن کے نور سے اس کا ظاہر بھی روشن ہے ۔

تو اس کی حرارت سے میری جان پانی پانی ہو جاتی ہے اور میری نوک شبنم کی طرح قطرے بن کر ٹپک جاتی ہے ۔