بخش 9 - در معنی اینکه مقصود رسالت محمدیه تشکیل و تأسیس حریت و مساوات و اخوت بنی نوع آدم است

انسان دنیا میں انسانوں کو پوجتے تھے ۔ ان کی کوئی حیثیت باقی نہیں تھی ۔ وہ عاجز و درماندہ تھے ۔

کسریٰ اور قیصر جیسے شہنشاہوں کا دبدبہ انہیں لوٹ رہا تھا ۔ ان کے ہاتھوں ، پاؤں اور گردنوں میں بندھن پڑے ہوئے تھے ۔

دینی بزرگ، پوپ ، بادشاہ اور امیر (گویا سینکڑوں شکاری) ایک شکار کے پیچھے لگے ہوئے تھے ۔ یعنی سب غریب انسانوں کو لوٹ رہے تھے ۔

تخت کے مالکوں اور بت خانہ و آتش کدہ کے پیشواؤں نے غریب انسانوں کی ویران یا اجڑی ہوئی کھیتی سے وصول خراج کا سلسلہ شروع کر رکھا تھا ۔

جنت کے پروانے بیچنے والے پیشوا کلیسا میں بیٹھا ہوا اس پریشان حال اور بے بس شکار کے لیے جال کندھے پر ڈالے ہوئے تھا اور ان کی جیبیں خالی کرتا تھا ۔

برہمن نے ان کی کیاریوں کے پھول چن لیے تھے اور آتش پرستوں کے مغ زادوں (پیشوا) نے غریبوں کے خرمن کو آگ کے حوالے کر دیا تھا ۔

غلامی نے ان انسانوں کی فطرت بہت پست کر دی تھی ۔ ان کی بانسری میں نغمے خون بن کر رہ گئے تھے (یہ حالت زار تھی جب رحمت عالم ﷺ جیسے امانت دار وجود کا ظہور ہوا) ۔

تمام حق داروں کو ان کے حق مل گئے اور جن لوگوں کو مختلف اشخاص غلام بنائے بیٹھے تھے انہیں بادشاہی کی مسند دے دی ۔

اس وجود پاک نے ٹھنڈی راکھ سے زندگی کے شعلے پیدا کئے ۔ پہاڑ کاٹنے والے مزدور کو پرویز جیسے بادشاہ کے برابر رتبہ دیا ۔

حضور کی برکت سے مزدوروں کی عزت بڑھ گئی، جو لوگ کارفرما بنے بیٹھے تھے ان سے آقائی اور برتری کا منصب چھین لیا ۔

رحمت عالم ﷺ نے ہر پرانے ڈھانچے کی قوت توڑ کر رکھ دی اور عالم انسانیت کے گرد ایک نیا حصار حفاظت کے لیے قائم کر دیا ۔

آدمی کے جسم میں نئی جان ڈال دی، غلاموں کو ان کے مالکوں سے خرید کر آزاد کر دیا ۔

اس وجود پاک کا ظہور پرانی دنیا کے لیے موت کا پیغام تھا ۔ آتش کدے سرد ہو گئے ، بت خانوں کا نام و نشان باقی نہ رہا ۔

اس وجود کے پاک ضمیر سے آزادی پیدا ہوئی، یہ لذیذ شراب اسی انگور سے نکلی ۔

عہد جدید نے جو سینکڑوں چراغ پیدا کئے اس عہد کی آنکھ اسی پاک وجود کی آغوش میں کھلی تھی ۔

رسول اللہ ﷺ نے ایک نیا نقش ہستی کے صفحے پر کھینچا اور ایک ایسی امت پیدا کی جو دنیا کو فتح کرنے والی تھی ۔

اس امت نے اللہ تعالیٰ کے سوا ہر شے کی طرف سے آنکھیں بند کر رکھی تھیں اور وہ رسول اللہ کے چراغ کے لیے پروانہ بنی ہوئی تھی ۔

اس امت نے حق کی حرارت سے سینہ گرما رکھا تھا اور اس کا ایک ذرہ سورج کے گھر کے لیے شمع کی حیثیت رکھتا تھا ۔

کائنات پر اس امت کے نشے سے رنگینی چھا گئی اور چین کے بت خانے اللہ کے گھر بن گئے ۔

اللہ کے تمام رسول اور نبی امت کے آبا و اجداد تھے اور اسکے سب سے زیادہ پرہیزگار افراد اللہ کے نزدیک سب سے بڑھ کر عزت والے تھے ۔

اس امت کے دل میں یہ پیغام پیوست تھا کہ تمام مومن بھائی بھائی ہیں اور آزادی اس کی آب و گل کی سرمایہ تھی ۔

اس کے نزدیک ہر امتیاز ناقابل برداشت تھا اور مساوات اس کی فطرت اس میں رچی ہوئی تھی ۔

اس امت کے افراد اسی طرح آزاد تھے جس طرح سرو باغو ں میں آزاد ہوتے ہیں اور ابتدائے آفرینش میں روحوں نے اللہ تعالیٰ سے جو عہد باندھا تھا اس پر قائم و استوار تھے ۔

اللہ تعالیٰ کے سامنے مسلسل سجدہ کرنے سے اس کی پیشانی پر پھول کا نقش بن گیا تھا ۔ چاند اور سورج اس کے پاؤں کو بوسہ دیتے تھے ۔