بخش 8 - رکن دوم: رسالت

زوال پذیر معبودوں کو ٹھکرا دینے والے حضرت ابراہیم خلیل جن کا نقش پا نبیوں کے لیے رہنما بن گیا ۔

حضرت ابراہیم جو خدائے لم یزل کا ایک نشان تھے، اپنے دل میں ایک فرمانبردار ملت کی آرزو رکھتے تھے (جو کفر و الحاد اور شرک سے پاک ہو ) قرآن مجید کے بیان کے مطابق حضرت ابراہیم اور حضرت اسماعیل نے ایک امت کے لیے دعا کی تھی ۔

حضرت ابراہیم کی بے خواب آنکھوں سے آنسووَں کی ندی بہتی رہی تاکہ اللہ تعالیٰ کی بارگاہ سے انہیں اور ان کے فرزند اسماعیل کو حکم ہوا کہ ایک گھر خدا کے لیے بنائیں اور اسے پاک رکھیں کا پیغام سنا ۔

انھوں نے ہمارے لیے ایک ایسے مقام پر خانہ خدا تعمیر کیا جہاں دور دور تک ویرانہ تھا ۔ یہ گھر اس لیے بنایا کہ طواف کرنے والے، عبادت کی غرض سے ٹھہرنے والے اور رکوع و سجود کرنے والے اس میں مصروف عبادت رہیں ۔

جب تب علینا کے درخت میں غنچہ پیدا ہوا تو ہماری بہار کے لیے کارفرمائی کی صورت نکل آئی ۔

اللہ تعالیٰ نے ہماری ملت کا جسم پیدا کیا اور اس جسم میں رسالت کے ذریعے سے جان پھونکی ۔

ہم اس دنیا میں ایسے الفاظ تھے جن کی آواز کوئی نہ تھی ۔ رسالت کی برکت سے ہم نے ایک موزوں مصرع کی شکل اختیار کر لی ۔

ہمارا وجود اس دنیا میں رسالت سے ہے ۔ رسالت ہی سے ہمیں دین ملا ، رسالت ہی سے شریعت ملی ۔

رسالت ہی کی برکت ہے کہ ہم لاکھوں ہونے کے باوجود ایک ہیں ۔ ہمارا ایک جزو دوسرے جزو سے اس طرح جڑا ہوا ہے کہ اسے کبھی الگ نہیں کیا جا سکتا ۔

وہ پاک ذات جس کی شان یہ ہے کہ جسے چاہتی ہے کامیابی کی راہ پر لگا دیتی ہے ۔ اس نے ہمارے اردگرد رسالت کا حلقہ کھینچ دیا ہے ۔ یعنی ہم سب کو رسالت کے ذریعے سے باہم جوڑ دیا ہے ۔

وہ ایسا حلقہ ہے جس کا محیط ہر لحظہ بڑھتا جا رہا ہے اور اس کا مرکز وادی بطحا ہے ۔

ہم رسول اللہ ﷺ کی ذات گرامی کے ساتھ نسبت کی بنا پر ملت و قوم بن گئے اور دنیا والوں کے لیے رحمت کا پیغام دیا ۔

ہم رسول اللہ ﷺ کے سمندر سے موج کی طرح اٹھتے ہیں لیکن خدا کی ہم پر خاص رحمت ہے کہ موج کی طرح بکھر کر نابود نہیں ہوتے ۔

رسول اللہ ﷺ کی امت حرم پاک کی پناہگاہ میں اس طرح نعرے لگا رہی ہے جس طرح شیر جنگل میں دہاڑتے ہیں

اگر تو میری بات پر اچھی طرح غور کرے اور اس کے اندازے کے لیے حضرت ابوبکر صدیق کی نگاہ پیدا کر لے تو تجھ پر واضح ہو جائے گا کہ،

ان تمام حقائق کو سامنے رکھتے ہوئے رسول اللہ ﷺ کی ذات برکات انسان کے لیے قلب و جگر کی قوت بن جاتی ہے اور حضور اللہ تعالیٰ سے بھی زیادہ محبوب نظر آتے ہیں ۔

رسول اللہ ﷺ جو کتاب یعنی قرآن مجید لائے وہ مومن کے دل کے لیے قوت و استحکام کا سامان ہے اور جو حکیمانہ ارشادات حضور ﷺ کی زبان مبارک پر جاری ہوئے انہیں ملت کی زندگی میں شہ رگ کی حیثیت حاصل ہے ۔

رسول اللہ ﷺ کا دامن ہاتھ سے دینے کا مطلب یہ ہے کہ موت قبول کر لی جائے اور وہ حالت پیدا ہو جائے جو موسم خزاں میں پھول کی ہوتی ہے یعنی افسردہ ہو کر ختم ہو جاتا ہے ۔

قوم نے صرف رسول اللہ ﷺ کے دم سے زندگی پائی ۔ یہ صبح اسی آفتاب کی روشنی سے منور ہوئی ۔

افراد اللہ تعالیٰ کے حکم سے زندہ رہتے ہیں ، قوم کی زندگی رسول اللہ پر موقوف ہے ۔ یعنی قوم اس سورج کی کرن سے آب و تاب حاصل کرتی ہے ۔

رسالت نے ہمیں ہم نوا اور ہم آہنگ کیا ۔ رسالت ہی کی برکت سے ہم ایک دوسرے کے ساتھ، رفیق اور ہمدرد بنے ۔ اس کی برکت سے ہم سب کا نصب العین ایک ہو گیا ۔

جب ایک مدعا، ایک مقصد اور ایک نصب العین والے اکٹھے ہو جاتے ہیں تو ان میں ایک وحدت آ جاتی ہے، یہی وحدت پختہ اور پائیدار ہو جاتی ہے تو ملت کی شکل اختیار کر لیتی ہے ۔

ہر کثرت صرف وحدت کے بندھن کی بنا پر زندہ ہے اور مسلمان کی وحدت دین فطرت یعنی اسلام پر مبنی ہے ۔

ہم نے رسول اللہ ﷺ سے دین فطرت سیکھا اور اللہ کے راستے میں مشعل روشن کر کے کھڑے ہو گئے ۔

یہ وحدت کا راز ایک موتی ہے جو رسول اللہ کے بے پایاں سمندر سے نکلا، ہم یک جان ہیں تو یہ حضور ہی کا احسان ہے ۔

اگر وحدت کا یہ رشتہ ہمارے ہاتھ سے نہیں چھوٹے گا تو ہماری ہستی بحیثیت ملت و قوم رہتی دنیا تک باقی رہے گی ۔

خدا نے ہم پر شریعت ختم کر دی اور ہمارے رسول پر رسالت ختم ہو گئی ۔

اب زمانے کی مجلس میں رونق ہمارے ہی دم سے رہے گی ۔ ہمارے رسول رسولوں کے خاتم تھے، ہم قوموں کے خاتم ہیں ۔

اب اللہ تعالیٰ نے ساقی گری کی خدمت ہم پر چھوڑ دی ہے؛ اپنا آخری جام (ہدایت) ہمیں عطا فرمایا دیا۔

ترجمہ: میاں عبدالرشید

رسول اللہ ﷺ کا ارشاد ہے کہ میرے بعد کوئی نبی نہیں یہ خدا کا احسان ہے اور یہ دین مصطفی کے ناموس کا پردہ ہے ۔

قوم کو قوت ملتی ہے تو رسول اللہ ہی سے ملتی ہے اور ملت کی وحدت کا راز بھی اسی پاک ذات کی بدولت محفوظ ہے ۔

اللہ تعالیٰ نے ہر دعوے کا نقش مٹا دیا اور اسلام کا شیرازہ ابد تک کے لیے باندھ دیا ۔

مسلمان جب غیر اللہ سے دل کا تعلق توڑ لیتا ہے تو لا قوم بعدی کا نعرہ لگاتا ہے یعنی میرے بعد کوئی قوم نہیں ہے ۔