بخش 14 - در معنی اینکه وطن اساس ملت نیست

اہل یورپ نے وطن کی بنا پر قوم کی تعمیر شروع کی، اس طرح اخوت کی جڑ کاٹ کر رکھ دی ۔

جس سے ان لوگوں نے وطن کو اپنی محفل کی شمع بنا لیا ، عالم انسانیت کو قبیلوں میں بانٹ کر رکھ دیا ۔

انھوں نے برے ٹھکانے میں بہشت کی تلاش شروع کی ۔ یہاں تک کہ اپنے گروہ کو ہلاکت میں کے گھر میں جا اتارا

اس شجر (نظریے) نے دنیا سے جنت کا وجود مٹا کر رکھ دیا (بہشت اس دنیا سے رخصت ہو گئی ) اور اس درخت میں قتل و خون کی تلخی کا پھل آنے لگا ۔

اس دنیا میں آدمیت افسانہ بن گئی اور یوں انسان ، انسان سے بیگانہ غیر ہوتا چلا گیا ۔

روح جسم سے نکل گئی اور صرف جسمانی اعضا باقی رہ گئے ۔ بے شک قو میں موجود ہیں لیکن آدمیت ختم ہو گئی (یورپ رقبے کے لحاظ سے بہت چھوٹا بر اعظم ہے اور قدم قدم پر وہاں مستقل حکومتیں موجود ہیں ۔ ہر حکومت کی ایک جغرافیائی حد ہے جس کے اندر کے باشندے ایک خاص قوم کہلاتے ہیں ، گویا چھوٹے سے براعظم میں بہت سی قو میں پیدا ہو گئیں اور ہر قوم ایک دوسرے کی رقیب اور دشمن ہے ۔ ان میں بار ہا لڑائیاں ہوتی رہتی ہیں ۔ اقبال فرماتے ہیں کہ یہ تمام مصیبتیں وطن کی بنا پر تنظیم ملت کے باعث پیدا ہوئیں ۔ انسانیت گروہوں میں بٹ کر رہ گئی ۔ انسانوں میں وہ جذبات باقی نہ رہے جو انسانیت کے لیے باعث شرف تھے ۔ اقبال نے سچ کہا ہے کہ مذہب حق نے انسانوں کو صلح دامن اور عدل و حق رسی کی تعلیم دے کر اور دنیا میں بہت کا سروسامان کیا تھا ۔ لیکن یورپ کی ملعون قومیت اس بہشت کو بھی کھا گئی اور اس کی جگہ خونریزی کی تلخی چھوڑ گئی ۔

سیاست نے مذہب کی گدی سنبھال لی یعنی مذہب کی جگہ سیاست نے لے لی تو یہ درخت جس نے دنیا کو جنت سے محروم کیا تھا یورپ کے باغ میں جا لگا ۔

نتیجہ یہ نکلا کہ مسیحی مذہب کا قصہ تمام ہوا اور کلیسا نے جو چراغ جلایا تھا اس کا شعلہ بجھ گیا ۔

لاٹ پادری بے طاقتی کے باعث عاجز اور بے بس ہو کر رہ گیا ۔ اس نے سارے مہرے ہاتھ سے پھینک دیے۔ یعنی پوپ کا اقتدار باقی نہ رہا اور وہ بے دست و پا اور عاجز ہو کر بیٹھ گیا ۔

مسیحیت کے پیرووَں نے کلیسا کو ٹھکرا دیا اور صلیبی دین کے سکے کھوٹے قرار پائے (وہ مذہب سے دور ہوتے گئے)

دہریت نے مذہب کا لباس پھاڑ ڈالا اور شیطان کی بارگاہ سے ایک قاصد آ پہنچا (یہ قاصد کون تھا) ۔

فلارنس کا وہ باطل پرست میکاوَلی جس کے سرمے نے انسانوں کی آنکھیں پھوڑ کر رکھ دیں ۔

اس باطل پرست نے بادشاہوں کے لیے ایک کتاب لکھی اور ہماری زمین میں جنگ و خونریزی کا بیج بو دیا (انسانیت ختم ہو گئی اور جھوٹ اور فریب میں اضافہ ہوا ) ۔

اس کی فطرت انسانیت کے قافلے کو تاریکی کی جانب لے گئی ۔ حق اس کے قلم کے تلوار سے ٹکڑے ٹکڑے ہو گیا ۔

آزر کی طرح اس کا پیشہ بھی یہی بت تراشی تھا ۔ چنانچہ اس کی قوت فکر نے ایک نیا نقشہ تیار کیا ۔ وہ نقشہ کیا تھا ۔

اس نے ایک نیا دین پیدا کیا جس میں مملکت کو معبود بنا دیا ۔ یعنی خدا کی جگہ مملکت کو دے دی ۔ اس کی حق ناشناس فکر نے نہایت بری چیز کو نہایت اچھی چیز بنا کر پیش کیا ۔

اس معبود کے پاؤں چومنے کا نتیجہ یہ نکلا کہ اس نے نقد حق کو نفع کی کسوٹی پر پرکھنا شروع کیا (مراد یہ ہے کہ انسانوں کے تمام اعمال میں بنیادی حیثیت حق کو حاصل تھی لیکن میکاوَلی نے سیاست کو ایک ایسا مسلک پیش کیا جس میں مملکت کو مرکزی حیثیت دی گئی ۔ یعنی اس کو معبود بنا لیا گیا اور حق کے بجائے مملکت کے نفع اور فائدے کو اچھائی اور برائی کا معیار قرار دیا)

(میکاوَلی کی تعلیم کا نتیجہ یہ نکلا کہ ) اس سے باطل کو خوب فروغ حاصل ہوا ۔ حیلہ گری اور فریب کاری ایک فن بن گئی

میکاوَلی نے ایک ایسے مسلک کی بنیاد رکھی جس کا انجام بہت برا تھا ۔ گویا اس نے زمانے کے راستے پر کانٹے بکھیر دیے ۔

اس نے اہل جہان کی نگاہوں کے سامنے رات کی تاریکی پھیلا دی ۔ دھوکے اور فریب کا نام مصلحت رکھ دیا ۔