بخش 3 - در معنی اینکه ملت از اختلاط افراد پیدا میشود و تکمیل تربیت او از نبوت است

کچھ معلوم نہیں کہ انسانوں میں اول اول میل جول کا تعلق کس وجہ سے فائدہ مند ہے ۔ اس کہانی کا ابتدائی رشتہ بالکل غائب ہے ۔

ہم فرد کو جماعت میں دیکھتے ہیں اور باغ سے اسے پھول کی طرح چن لیتے ہیں (جماعت اگر چمن ہے تو فرد اس کا پھول ہے ) ۔

اس کی فطرت انفرادیت کی دلدادہ ہے لیکن اس کی حفاظت کا تقاضا یہ ہے کہ انجمن آراستہ کر کے زندگی بسر کرے یعنی بہت سے افراد مل جل کر رہیں ۔

زندگی کے میدان جنگ کی آگ فرد کو شاہراہ حیات میں جلا دیتی ہے ۔

انسان اسی وجہ سے ایک دوسرے کے ساتھ وابستہ یا عادی ہو گئے اور موتیوں کی طرح ایک رشتے میں پروئے گئے ۔

وہ زندگی کی جنگ میں ایک دوسرے کے ساتھی ہیں جس طرح ایک پیشے کے مختلف آدمی اکھٹے کام کرتے ہیں اسی طرح یہ بھی اکٹھے ہو گئے ۔

تاروں کی محفل بھی ایک خاص کشش کی بدولت قائم ہے ۔ ایک تارے کی ہستی دوسرے تارے کی وجہ سے استوار ہے ۔

قافلہ تو پہاڑ، پہاڑیاں ، چراگاہیں ، صحرا کا دامن اور ریت کے ٹیلے جہاں جی چاہے خیمے لگا لیتا ہے ۔

انسان کے کاروبار کا تانا بانا بہت ہی بے جان سا تھا گویا اس کے غور و فکر کی کلی کھل کر پھول نہیں بنی تھی ۔

اس کے جس ساز کی آواز سے بجلیاں پیدا ہونے والی تھیں وہ ابھی چھیڑا نہیں گیا تھا اور انسان کا نغمہ ابھی پردوں میں نامکمل پڑا تھا ۔

اس نے تلاش و جستجو کا تنبیہ کا تجربہ نہیں کیا تھا ۔ اور اس کے دل پر آرزو کی مضراب کی چوٹ نہیں لگی تھی ۔

جو محفل تازہ پیدا ہوئی اس کے پاس کوئی سازوسامان نہ تھا ۔ شراب اتنی کم تھی کہ چھوٹے سے پیالے میں جذب ہو سکتی تھی ۔

اس کی خاک سے سبزہ تازہ تازہ پھوٹا تھا ۔ اس کے انگور کی رگوں میں لہو سرد پڑا تھا ۔

اس کے فکر و خیال پر دیو و پری اور بھوت پریت چھائے ہوئے تھے ۔ وہ اپنے خیال سے ڈر کر اٹھ بھاگتا تھا ۔

اس کی ناپختہ زندگی کا میدان بہت تنگ تھا اور اس کی سوچ بچار نارسا تھی ۔ ابھی اس کے لب بام کے نیچے تھی ۔

جان کا خوف انسان کی آب و گل کا سرمایہ تھا ۔ تیز ہوا بھی چلتی تو اس کا دل لرز جاتا (کانپ اٹھتا) ۔

انسان کی جان محنت و مشقت سے دور بھاگتی تھی اور اس نے فطرت کے دامن میں کبھی پنجہ نہیں مارا تھا ۔

جو کچھ خود بخود زمین سے اگ آتا یا اوپر سے گر پڑتا ، اسی کو اٹھا کر گزارہ کر لیتا ۔

یہاں تک کہ اللہ تعالیٰ کوئی صاحب دل پیدا کر دیتا ہے جو ایک حرف سے ایک دفتر لکھوا دیتا ہے ۔

اس کی ساز نوازی میں ایسا اعجاز ہوتا ہے کہ دو مقاموں سے ترکیب پائی ہوئی ایک نوا سناتا ہے اور خاک کو نئی زندگی بخش دیتا ہے ۔

بے حس و حرکت خاک کی رگوں میں نیا زندگی کا خون دوڑ جاتا ہے ۔ بے حقیقت ذرہ اس صاحب دل سے نور حق کی روشنی حاصل کر لیتا ہے ۔

اور جو بھی جنس اس کے پاس ہو اس میں نئی قدر و قیمت پیدا ہو جاتی ہے ۔ اس کی ایک پھونک سے دو سو (ہزاروں ) پیکر زندہ ہو جاتے ہیں اس کے ایک پیالے سے پوری محفل میں رونق اور رنگینی پیدا ہو جاتی ہے ۔

صاحب دل کی نگاہوں میں خاص جذب و کشش کا اعجاز ہوتا ہے ۔ اس کے لبوں سے جو کچھ نکلتا ہے وہ سننے والوں میں نئی زندگی پیدا کر دیتا ہے ۔ اس کی مقدس تعلیمات کا نتیجہ یہ ہوتا ہے کہ انسانوں سے دوئی اور بیگانگی مٹ جاتی ہے ۔ وحدت اور یگانگی پیدا ہو جاتی ہے ۔

اس کا دھاگا جس کا سرا آسمان تک پہنچا ہوتا ہے زندگی کے اجزاکو رفو کر کے باہم جوڑ دیتا ہے ۔ اس صاحب دل کے فیض روحانی کا سلسلہ آسمان سے وابستہ ہوتا ہے وہ زندگی کے مختلف ٹکڑوں کو جوڑ کر ایک کل بنا دیتا ہے ۔

وہ انسانوں کی نگاہوں میں نیا انداز پیدا کر دیتا ہے اور صحرا اور کو گلزار بنا دیتا ہے ۔ جن سے رنگ رنگ کے پھولوں ، طرح طرح کی خوشبووَں اورگوناگوں پھلوں کی فراوانی ہو ۔

(آپ نے بار بار دیکھا ہو گا کہ ) حرمل کا دانہ آگ پر رکھا جائے تو اس سے ایک خاص آواز نکلتی ہے اور وہ اچھل کر باہر جا پڑتا ہے ۔ اقبال فرماتے ہیں کہ صاحب دل کی حرارت پوری قوم کو حرمل کے دانے کا مرقع بنا دیتی ہے یعنی قوم ایک نعرے اور ایک ہنگامے کے ساتھ خدا کی راہ میں ہمہ تن سرگرم عمل ہو جاتی ہے ۔

صاحب دل ایک چنگاری اس قوم کے دل میں ڈال دیتا ہے اور اس کی خاک کو ایک ایسا شعلہ بنا دیتا ہے جو ہر شے کو گرفت میں لے لینے کے لیے مضطرب ہو ۔

اس کے پاؤں کا نقش خاک میں بینائی کی صلاحیت پیدا کر دیتا ہے ۔ ذرے میں تجلیات کا ایسا سروسامان بہم پہنچا دیتا ہے کہ وہ طور سینا سے چشمک زنی کرتا ہے ۔

یہ صاحب دل برہنہ عقل کو لباس پہنا دیتا ہے تاکہ اس کی برہنگی چھپ جائے اور اس مفلس و قلاش کو سرمایہ بخش دیتا ہے ۔

اس عقل کے انگاروں کو دامن سے ہوا دیتا ہے اس طرح اس کے سونے کو پگھلا کر سارا کھوٹ باہر نکال لیتا ہے ۔ جب تک عقل آسمانی ہدایت سے فیضیاب نہ ہو وہ عقل محض رہتی ہے ۔

نبی کی تعلیم انسانوں کے پاؤں کو ان بیڑیوں سے آزاد کر دیتی ہے جو اس نے خود پہن لی تھیں ۔ اور جو انسان مختلف دیوتاؤں اور معبودوں کی پرستش میں لگا ہوا تھا اسے تمام پرستشوں سے نجات دلا کر ایک خدا کی چوکھٹ پر لے آتی ہے ۔

نبی ان سے کہتا ہے کہ تو خواہمخواہ دوسروں کا غلام کیوں بنتا ہے کیا تو ان بتوں سے بھی کمتر ہے جو بول نہیں سکتےیہاں حضرت ابراہیم کے اس واقعے کی طرف اشارہ ہے جس کا ذکر سورہ انبیاء میں آیا ہے ۔ یعنی حضرت ابراہیم قوم کو بت پرستی سے منع کرتے تھے ۔ قوم کہتی تھی کہ ہمارے باپ دادا انہیں بتوں کو پوجتے آئے ہیں اور ہم انہیں کے مذہب پر چلیں گے ۔ حضرت ابراہیم نے ایک دن موقع پا کر بڑے بت کو چھوڑا باقی تمام بتوں کو توڑ پھوڑ ڈالا ۔ اقبال فرماتے ہیں کہ نبی انسانوں سے یہی کہتا ہے کہ کیا تم ان بے زبان بتوں سے بھی فروتر ہو ۔

نبی انسانوں کو ایک مقصد کی طرف لے جاتا ہے ۔ ضابطے اور آئین کی زنجیر ان کے پاؤں میں ڈال دیتا ہے ۔ پھر ا ن کے دل میں توحید کا نکتہ بٹھاتا اور سکھاتا ہے تاکہ خدا کے سامنے جھکیں ۔

اسے از سر نو توحید کا سبق دیتا ہے اور اللہ تعالیٰ سے نیازمندی ، رسوم و آداب سکھاتا ہے۔

ترجمہ: میاں عبدالرشید