بخش 29 - لم یلد و لم یولد

اے مسلمان! تیری قوم رنگ اور خون سے بہت اونچی ہے ۔ اور اس کے ایک کالے کی قیمت سینکڑوں گورے ہیں ۔ عموماً گورے کو کالے پر ترجیح دی جاتی ہے لیکن اقبال کہتے ہیں کہ اسلام کا ایک کالا سینکڑوں گوروں پر ترجیح کا مستحق ہے ۔ یہ فضیلت اسلام کی بدولت ہے نہ کی رنگ کی بدولت ۔

ہمارے کسی قنبر یعنی غلام کے آب وضو کا ایک قطرہ قیمت میں قیصر جیسے شہنشاہ کے خون سے زیادہ گراں ہے ۔

تو باپ، ماں اور چچاؤں کے رشتے سے آزاد ہو جا ۔ حضرت سلمان کی طرح اپنا رشتہ اسلام سے جوڑ لے اور اسلام کا فرزند بن جا ۔

اے عقلمند دوست ۔ میں تجھے ایک نکتہ بتاتا ہوں توچھتے کے خانوں میں شہد پر نظر ڈال ۔ مکھیاں رس چوس چوس کر شہد بناتی ہیں ۔

کوئی قطرہ لالے کے سرخ پھول سے لیا جاتا ہے ، کوئی نرگس شہلا سے ۔

لیکن کبھی سنا ہے کہ کسی قطرے نے کہا ہو میری اصل نرگس ہے اور دوسرے نے کہا ہو میں نیلوفر کے رس سے بنا ہوں ( گویا شہد مختلف قسم کی پھولوں سے تیار ہوا مگر چھتے میں پہنچا تو ایک جنس ہو گیا ۔ یہی کیفیت ملت اسلامیہ کی ہونی چاہیے ۔ )

ہماری ملت شہد کا وہ چھتہ ہے جو حضرت ابراہیم کے ہاتھوں تیار ہوا اور اس میں شہد وہ ایمان ہے جس کا عملی ثبوت حضرت محمد نے دیا اور اسی ایمان کی دعوت حضرت کی زبان پر جاری ہوئی ۔

اگر تو نسب اور نسل کو ملت کا جزو بنائے گا تو ظاہر ہے کہ اخوت کے کاروبار میں رخنہ پیدا ہو جائے گا یعنی برادری کی وہ شان کیوں کر قائم رہے گی جو رنگ ، نسب اور خون سے بہت بالا ہے ۔

یاد رکھ کہ ہماری زمین میں تیرا ریشہ جڑ نہیں پکڑ سکتا کیونکہ تیرے افکار و خیالات ابھی تک نامسلم ہیں ۔

مشہور صحابی حضرت عبداللہ ابن مسعود عشق کا چراغ جلانے والے تھے ۔ ان کا جسم اور جان دونوں سراپا عشق کی حرارت تھے ۔ ان کی مقدس ذات عشق حق کے لیے وقف ہو چکی تھی ۔

ان کے بھائی نے وفات پائی، اس صدمہ سے ان کا سینہ جل اٹھا اور دل کا آئینہ پگھل کر پانی ہو گیا ۔

ان کا رونا دھونا ختم ہی نہ ہوتا تھا اور بھائی کے غم میں وہ ماؤں کی طرح آہ و فغان کرتے تھے ۔

(کہتے تھے) افسوس، وہ عقیدت کا سبق لینے والا، جو نیاز مندی کی درس گاہ میں میرا رفیق تھا ۔

افسوس! سرو کی طرح بلند قامت میرا بھائی ، جو رسول اللہ ﷺ کے عشق میں میرے برابر چلتا تھا ۔

افسوس وہ رسول اللہ ﷺ کے دربار سے محروم ہو گیا اور میری آنکھیں حضور ﷺ کے دیدار سے روشن ہیں ۔

ہمارا باہم رشتہ روم اور عرب پر موقوف نہیں اور نہ اس سے نسب کا کوئی تعلق ہے ۔ یعنی نہ ہمارے نزدیک جغرافیائی حدود کوئی حیثیت رکھتے ہیں اور نہ نسب و خون ۔

ہم نے حجازی محبوب (رسول اللہ ﷺ) سے دل لگایا ہے ۔ اسی سبب سے ایک دوسرے کے ساتھ ہمارا رشتہ جڑ گیا ہے ۔

یہی محبت ہمارے نزدیک ایسا تعلق ہے کہ اس سے زیادہ کسی تعلق کی ضرورت نہیں ۔ ہماری آنکھوں کے لیے حضور کی شراب کا نشہ کافی ہے ۔

جب اس شراب کی مستی ہمارے خون میں دوڑی تو جتنے پرانے تعلقات اور پرانے رشتے تھے اس نے جلا دییے اور ایک نیا رشتہ پیدا کر دیا ۔

رسول اللہ ﷺ کا عشق ہی ہمارے لیے یکجا رہنے کا سامان ہے ۔ یہ عشق خون کی طرح ملت کی رگوں میں دوڑ رہا ہے ۔

عشق جان میں اتر جاتا ہے اور نسب صرف جسم تک محدود رہتا ہے ۔ اس سے ثابت ہے کہ عشق کا رشتہ نسب کے رشتے سے زیادہ مضبوط ہے ۔

اگر تو نے رسول اللہ ﷺ سے لو لگائی ہے تو نسب سے بے تعلق ہو جا ، بلکہ ایران و عرب سے بھی رشتہ توڑ لے ۔

رسول اللہ ﷺ کی امت بھی رسول اللہ ﷺ کی طرح اللہ کا نور ہے ۔ ہماری ہستی حضور ﷺ ہی کے عشق سے پیدا ہوئی ۔

جس خلعت کا تعلق حق سے ہو اسے تانے بانے کی کیا ضرورت ہے

جس شخص کے پاؤں ملک اور باپ دادا کے بندھنوں میں جکڑے ہوئے ہیں یقین کر لینا چاہے کہ وہ لم یلد ولم یولد کی حقیقت سے بالکل بے خبر ہے ۔ یعنی سورہ اخلاص کے اس ٹکڑے کا مطلب ہی یہ ہے کہ نہ تو مسلمان کسی جغرافیائی کشور اور ولایت کا پابند ہے نہ نسب اور رنگ کا ۔ جو مسلمان ان رشتوں میں جکڑا رہے گا وہ لم یلد ولم یولد پر سچے ایمان کامستحق نہیں سمجھا جا سکتا ۔