بخش 30 - ولم یکن له کفواً احد

مسلمان، جس نے دنیا کی طرف سے آنکھیں بند کر لی ہیں کیا ہےاللہ تعالیٰ سے اس لو لگانے والے کی فطرت کے بارے میں کیا سمجھا جائے ۔

اس کی مثال اس گل لالہ کی ہے جو پہاڑ کی چوٹی پر اگتا اور وہیں نشوونما پاتا ہے کسی پھول چننے والے کا گوشہ دامن اس نے نہیں دیکھا، یعنی اس تک چننے والے کا ہاتھ کبھی نہیں پہنچا ۔

اس گل لالہ کہ آگ صبح کی ابتدائی سانسوں سے بھڑکتی ہے ۔

آسمان اسے اپنی گود سے باہر نہیں جانے دیتا ۔ یہی سمجھتا ہے کہ وہ کوئی تارا ہے جو چلتے چلتے دوسروں سے پیچھے رہ گیا ہے ۔

سب سے پہلے سورج کی کرن اسے چومتی ہے اور شبنم اس کی آنکھوں سے نیند کا گردوغبار دھوتی ہے ۔

اے مسلمان تجھے خدا کی اس صفت سے رشتہ مستحکم کر لینا چاہیے جو لم یکن لہ کفو اً احد میں بیان ہوئی ہے ۔ یعنی اس کے برابر کوئی نہیں ۔ یہ رشتہ مستحکم ہو جائے تو تو دنیا کی قوموں میں بے مثال بن جائے گا ۔

وہ پاک ذات ہے جو اکیلی ہے اور کوئی اس کا شریک نہیں ۔ اس کا بندہ بھی کوئی شریک گوارا نہیں کر سکتا ۔

مومن ہر بلند تر سے بلند ہے ۔ اس کی غیرت کسی ہمسر کو برداشت نہیں کر سکتی ۔

وہ لا تحزنو کا خرقہ پہنے ہوتا ہے یعنی اسے کسی چیز کا غم نہیں ہوتا اور انتم الاعلون تمہیں سب سے سر بلند ہو کا تاج اس کے سر پر ہوتا ہے ۔ اشارہ ہے سورہ آل عمران کی اس آیت کی طرف ولا تھنو ولا تحزنو انتم الاعلون ان کنتم مومنین اور دیکھو ، نہ تو ہمت ہارو ، نہ غمگین ہو، تم سب سے سر بلند ہو بشرطیکہ تم سچے مسلمان ہو ۔

دونوں جہانوں کا بوجھ وہ اپنے کندھے پر اٹھا لیتا ہے ۔ خشکی اور تری دونوں اس کی آغوش میں پلتی ہیں ۔

بجلی کی کڑک کے شور پر اس کے کان لگے رہتے ہیں ۔ اگر برق گرتی ہے تو اسے اپنے کندھے پر اٹھا لیتا ہے ۔

باطل سے سامنا ہو جائے تو مومن تلوار بن جاتا ہے ۔ حق کی حفاظت کا موقع آ جائے تو وہ ڈھال کی شکل اختیار کر لیتا ہے ۔ اسی کے امر و نہی، نیک و بند کی کسوٹی ہے یعنی مومن جس چیز کا حکم دے وہ نیکی اور جس سے روکے وہ بدی ہے ۔

اس کے انگارے کی گرہ میں سینکڑوں شعلے ہیں اور زندگی کو اسی کے جوہر سے درجہ کمال حاصل ہوتا ہے ۔

ہائے و ہو کے اس جہان کی فضا میں مومن کی تکبیر کے سوا کوئی نغمہ پیدا نہیں ہو سکتا ۔

عفو و درگزر ، عدل و انصاف اور سخاوت و احسان میں اس کا درجہ بہت اونچا ہے بلکہ غصے کی حالت میں بھی اس کے مزاج پر لطف و کرم ہی غالب رہتا ہے ۔

مجالس میں مومن کا ساز ترانہ ریز ہوتا ہے تو دل خوش ہو جاتے ہیں ۔ میدان جنگ کا وقت آ جائے تو مومن کی حرارت ایمان لوہا پگھلا کر رکھ دیتی ہے ۔

باغ میں وہ بلبلوں کا ہم نوا بن جاتا ہے ، بیابان میں شکار پکڑنے والے شہباز کی شکل اختیار کر لیتا ہے ۔

اس کا دل آسمان کے نیچے آسودگی نہیں پاتا ۔ وہ اپنے جسم کے ساتھ آسمان پر پہنچ کر اطمینان کا سانس لیتا ہے ۔

مومن ایک ایسا پرندہ ہے جو تاروں کو دانے سمجھ کر ان پر چونچ مارتا ہے اوراس فضا میں اڑتا ہے جو اس آسمان سے آگے ہے ۔

تو نے تو پرواز کے لیے کبھی پر نہیں کھولے، تیری کیا حیثیت ہے تو ایک کیڑا ہے جو مٹی کے نیچے اطمینان سے بیٹھا ہے ۔

جانتا ہے تو کیوں ذلیل ہے تیری ذلت کا اصل سبب یہ ہے کہ تو نے قرآن کو چھوڑ دیا اور زمانے کی گردش کے شکوے کرنے لگا ۔

اے شبنم کی طرح زمین پر گرنے والے! تیرے پاس ایک زندہ کتاب قرآن مجید کی شکل میں موجود ہے تو اس سے زندگی کا سبق لے ۔

تو کب تک زمین سے چمٹا رہے گا اور ذلت و خواری کی موجودہ حالت برداشت کرتا جائے گا ۔ اٹھ، سروسامان اٹھا اور اسے اچھال کر آسمان پر پہنچا دے ۔