بخش 31 - عرض حال مصنف بحضور رحمة للعالمین

حضور والا! آپ کا ظہور (تشریف لانا) زندگی کا عہد شباب تھا اور آپ کا جلوہ زندگی کے خواب کی تعبیر تھا ۔

یا رسول اللہ! ہماری زمین نے صر ف اس وجہ سے اونچا درجہ حاصل کر لیا کہ آپ کی بارگاہ سے شرف پایا ۔ آسمان آپ کے لب بام کو چومنے کی بدولت سربلند ہوا ۔

اس کائنات کا ہر پہلو آپ کے روئے مبارک کی چمک دمک سے روشن ہے ۔ ترک ہوں یا تاجک ہو یا عرب ہوں سب آپ کے غلام ہیں ۔

اس کائنات کا رتبہ صرف آپ کی بدولت اونچا ہوا اور اس کی دولت آپ کے فقر کے سوا کچھ نہیں ۔

یا رسول اللہ آپ نے دنیا میں زندگی کا چراغ روشن کیا اور غلاموں کو آقائی کا طریقہ سکھایا ۔

آب و گِل کے اس مقام یعنی دنیا میں جتنے بھی وجود تھے وہ رسول اللہ ﷺ کے بغیر اپنی بے مایگی اور بے حقیقتی پر شرمسار تھے وہ خاک کے ڈھیر معلوم ہوتے تھے ۔

آپ کے نفس ِ گرم نے مٹی سے آگ پیدا کی تو وہ سب آدمی بن گئے ۔

بے حقیقت ذرے اپنی خداداد قوتوں سے آگاہ ہو گئے اور انھوں نے اڑ کر چاند اور سورج کے دامن تھام لیے ۔

جب سے میری نظر رسول اللہ کے روئے انور پر پڑی ہے ۔ رسول اللہ ماں باپ سے بھی زیادہ محبوب ہو گئے ہیں ۔ حدیث شریف میں آیا ہے کہ فرمایاتم میں سے کوئی شخص صاحب ایمان نہیں ہو سکتا جب تک میں اس کے نزدیک اس کے والدین ، اولاد اور تمام انسانوں سے محبوب تر نہ ہو جاؤں ۔

عشق نے میرے اندر آگ بھڑکائی ۔ اب اسے فرصت مبارک ہو کہ میری جان جل چکی ۔

اب میرے پاس ایک آہ کے سوا کچھ نہیں ۔ اسی کو میں اپنے اجڑے گھر کا دیا سمجھتا ہوں ۔

یا رسول اللہ جو غم میرے رگ و پے میں رچا ہوا ہے اسے عرض کرنے سے روکے رہنا مشکل ہے ۔ شراب کس طرح صراحی میں چھپی رہ سکتی ہے

مسلمان رسول اللہ ﷺ کی تعلیم سے بے بہرہ ہو گیا ۔ یہ حرم پاک پھر بت خانہ بن گیا ۔

قسم قسم کے بت ہیں ، منات ہے، لات ہے، عزیٰ اور ہبل ہے ۔ ہر شخص کوئی نہ کوئی بت بغل میں دبائے پھرتا ہے ۔

ہمارے مذہبی پیشوا کفر میں برہمنوں سے بھی آگے نکل گئے ۔ ان میں سے ہر ایک نے دماغ میں سومنات سجا رکھا ہے ۔

انھوں نے عرب سے سروسامان اٹھا لیا اور عجم کے شراب خانے میں جا کر سو گئے ۔

انکے اعضا عجم کے برف آمیز پانی سے بے حس و حرکت ہو گئے اور ان کی شراب انکے آنسووَں سے زیادہ سرد ہے ۔

وہ کافروں کی طرح موت سے ڈرتے ہیں اور ان میں سے کسی کے بھی سینے میں دل زندہ موجود نہیں ۔

میں نے ان نعشوں کو طبیبوں کے سامنے سے اٹھایا اور رسول اللہ کی پیش گاہ میں لے آیا ۔

یہ مر چکے تھے، میں نے انہیں آب حیات کی باتیں سنائیں اور قرآن کے بھیدوں میں سے ایک بھید انہیں بتایا کہ شاید یہ پھر زندگی سے بہرہ ور ہو جائیں ۔

میں نے نجد کے دوستوں اور رفیقوں کی داستانیں سنائیں اور نجد ہی کے باغ سے ان کے لیے خوشبو لایا ۔

میں نے نغمے کی شمع روشن کر کے مجلس کو جگمگادیا اور قوم پر زندگی کا راز آشکار کرنا چاہا ۔

انھوں نے سنتے ہی کہا کہ یہ شخص تو ہم پر فرنگیوں کا منتر پھونک رہا ہے اور جن ترانوں کا شور اس نے بپا کر رکھا ہے وہ تو فرنگیوں کے ساز سے اٹھ رہے ہیں ۔

آپ نے بصیری کو چادر مرحمت فرمائی تھی اور مجھے سلمیٰ کا ساز عطا کیا ۔

ان غلط اندیشوں کو ذوق حق عطا کیجیے ۔ افسوس کہ یہ اپنی متاع کو نہیں پہچانتے ۔

اگر میرے دل کا آئینہ جوہروں سے خالی ہے، اگر میری باتوں میں قرآن مجید کے سوا بھی کچھ ہے ۔

تو یا رسول اللہ آپ کی روشنی تمام زمانوں کے لیے صبح کا سروسامان ہے اور آپ کی آنکھ سینے کے اندر کی سب چیزیں دیکھ رہی ہے ۔

آپ میری فکر کی عزت و حرمت کا پردہ چاک کر دیجیے اور ایسا انتظام فرمائیے کہ میرے کانٹے سے پھولوں کی یہ کیاری پاک ہو جائے ۔

زندگی کا لباس میرے جسم پر تنگ کر دیجئے اور ملت کو میری برائیوں سے بچائے رہیے ۔

میرے بے سروسامان کھیت کو سبز نہ ہونے دیجیے اور اسے اپنے ابر بہار سے فیض نہ بخشئے ۔

میرے انگور کی رگوں میں شراب خشک کر دیجئے اور میری کافوری شراب میں زہر ڈال دیجئے ۔

قیامت کے دن مجھے ذلیل و رسوا ہونے دیجئے اور اپنے پاؤں کے بوسے سے بے نصیب رکھیئے ۔

اگر میں نے صرف قرآنی اسرار کے موتی پروئے ہیں اور مسلمانوں کے سامنے سچی باتیں کہیں ہیں ۔

تو یا رسول اللہ آپ کا احسان ہر بے حیثیت کو صاحب حیثیت بنا دیتا ہے ۔ میں نے جو کچھ کہا اس کے بدلے میں صرف آپ کی دعا کافی ہے ۔

عزو جلال والے خدا کی بارگاہ میں عرض کیجیے کہ میرا عشق حق عمل سے ہمکنار ہو ۔

مجھے غمگین جان کی دولت بخشی گئی ہے اور دین کے علم سے بھی حصہ ملا ہے ۔

خدا سے عرض کیجیے کہ مجھے عمل میں زیادہ استواری نصیب ہو اور میں ابر بہار کے پانی کا قطرہ ہوں مجھے گوہر بنا دیا جائے ۔

میں جب سے اس دنیا میں جان کا سامان لایا ہوں اس وقت سے ایک اور آرزو دل کی آغوش میں پرورش پا رہی ہے

وہ دل کی طرح میرے سینے میں مطمئن بیٹھی ہے اور صبح حیات سے محروم ہو رہا ہوں ۔

جب سے میں نے والد سے رسول اللہ کا نام مبار ک سیکھا تو ساتھ ہی اس آرزو کی آگ بھی روشن ہو گئی ۔

میری عمر بڑھتی گئی اور آسمان زندگی کے جوئے میں مجھ سے کام لیتا رہا ۔

میری یہ آرزو زیادہ جوان ہوتی رہی اور جوں جوں یہ شراب پرانی ہو تی گئی اس کی قیمت بڑھتی گئی (زیادہ قیمتی ہو گئی) ۔

اس آرزو کو میری مٹی کے نیچے گوہر کی حیثیت حاصل ہے اور میری رات کی تاریکی میں صرف اسی ایک ستارے کی روشنی ہے ۔

میں مدتوں لالہ رویوں سے ملتا جلتا رہا اور گھنگریالے بالوں والے حسینوں سے محبت کرتا رہا ۔

میں نے چاند جیسی پیشانی والے محبوبوں کے ساتھ بادہ نوشی کی اور اطمینان و سکون کا چراغ بجھاتا رہا ۔

میرے خرمن کے گرد بجلیاں منڈلاتی رہیں اور میرے دل کا سامان ڈاکو لوٹ کر لے گئے ۔

لیکن اس آرزو کی شراب میری جان کی صراحی سے گر نہ سکی اور یہ خالص سونا میرے دامن سے باہر نہ نکل سکا ۔

میری بت ساز عقل نے زنار پہن لیا اور اس کا نقش میری جان کی ولایت میں بیٹھ گیا ۔

سالہا سال میں شک میں مبتلا رہا اور یہ شک میرے خشک دماغ سے الگ نہ ہوتا تھا ۔

میں نے یقینی علم کا ایک حرف بھی نہیں پڑھا تھا اور فلسفے کے گمان آباد میں ہی رہا ۔

میری تاریکی حق کی روشنی سے ناواقف تھی اور میری شام کو شفق کا نور نصیب نہیں ہوا تھا ۔

اس حالت کے باوجود وہ آرزو میرے دل میں سوئی رہی ، گویا صدف کی آغوش میں موتی سویا ہوا تھا ۔

آخر یہ آرزو میری آنکھ کے ساغر سے ٹپک پڑی اور اس نے میرے ضمیر میں نغمے پیدا کئے ۔

اسے وہ پاک ذات! جس کے سوا کسی کی یاد میری جان میں سما نہیں سکتی ، اگر اجازت ہو تو وہ آرزو زبان پر لے آوَں

میری زندگی میں عمل کا کوئی سامان نہیں ہے ۔ اس لیے میں اپنے آپ کو اس آرزو کے لائق نہیں سمجھتا تھا ۔

مجھے اس آرزو کے ظاہر کرنے سے شرم آتی ہے ۔ البتہ حضور کی شفقت سے میرا حوصلہ بڑھتا ہے ۔

رسول اللہ آپ کی شان رحمت نے دنیا کو نوازشوں سے سرفرازی بخشی ۔ میری آرزو یہ ہے کہ آخری سانس حجاز میں پورا ہو ۔

ایک مسلمان جو اللہ کے سوا ہر شے سے بیگانہ ہے کب تک بت خانے میں زناری بنا بیٹھا رہے

کتنے افسوس کا مقام ہے کہ جب اس کی زندگی کے دن ختم ہوں تو اس کا وجود بت خانے کی آغوش میں رکھا جائے ۔

اگر میری خاک کے اجزا قیامت کے دن رسول اللہ کے دروازے سے اٹھیں تو میرا موجود دور کتنا ہی باث افسوس ہو لیکن آئندہ دور تو انتہائی خوش نصیبی کا ہو گا ۔

کتنا مبارک وہ شہر ہے جہاں آپ تشریف فرما تھے ۔ کتنی پاکیزہ ہے وہ خاک جہاں آپ آرام فرما ہیں ۔

عاشق کے لیے حب وطن کا مقصد یہ ہے کہ اپنے دوست کے مسکن اور اپنے بادشاہ کے شہر میں پہنچے ۔

یا رسول اللہ! میرے ستارے کو روشن آنکھ بخشیے اور میرے لیے اپنی دیوار کے سائے میں قبر کی جگہ عطا فرمایئے

تا کہ میرے بے قرار دل کو قرار نصیب ہو جو کہ پارے کی طرح بے قرار ہے ۔

میں آسمان سے کہوں کہ دیکھ، مجھے کیسا آرام نصیب ہوا ۔ تو میرا آغاز دیکھ چکا ہے اب میرا انجام بھی دیکھ ۔