بخش 33 - حکمت فرنگ

میں نے سنا کہ فارس میں ایک برگزیدہ آدمی ادا فہم رمز آشنا نکتہ بیں تھا ۔

اس نے مرنے سے پہلے جان کی بہت سختی دیکھی ۔ (اس لیے) وہ ناراضگی اور شکوہ سے لبریز جان لے کر یہاں سے رخصت ہوا ۔

موت کے بعد یہ فریاد لیکر وہ خدائے پاک کی جناب میں دعویٰ دائر کیا کہ فرشتہ اجل کی سختی سے میرا دل پاش پاش ہو گیا ہے ۔

وہ فرشتہ ایک ہی فن رکھنے کے باوجود کوئی مہارت نہیں رکھتا ۔ جان نکالنے کا نیا ہنر نہیں جانتا ۔

وہ روح قبض کرتا ہے مگر (اب تک) اس کام میں کچا ہے ۔ دنیا کہاں سے کہاں پہنچ گئی مگر وہ ویسا ہی لکیر کا فقیر رہا ۔

یورپ عجیب عجیب ہنر ایجاد کر رہا ہے ایک قطرے میں سے اتھاہ سمندر کھینچ لیتا ہے ۔

وہ فکر و خیال کے گرد موت کی پرکار گھماتا ہے اس کا سارا فلسفہ موت کا خدمتگار ہے ۔

اس کی آبدوز سمندر کے اندر مگر مچھ کی طرح چلتی ہے اس کے ہوائی جہاز ہوا کے طمانچے کھاتے ہیں ۔

کیا تو نہیں دیکھتا کہ سورج کی دنیا بھر کو دیکھنے والی آنکھ اس کی گیس سے اندھی ہو جاتی ہے ۔

اس کی بندوق جان لینے میں ایسی تیزی دکھانے والی ہے کہ موت کے فرشتے کا دم ٹوٹ گیا (موت کا فرشتہ بھی دم بخود رہ جاتا ہے) ۔

اس بوڑھے بیوقوف کو یورپ بھیج دے تاکہ یہ جھٹ پٹ مارنے کا فن سیکھ جائے ۔ نوٹ : اس طنزیہ نظم میں اقبال نے واضح کیا ہے کہ اقوام مغرب نے انسان کو ہلاک کرنے کے لیے بہت سے نئے آلات ایجاد کئے ہیں ۔