زیارت ارواح جمال‌الدین افغانی و سعید حلیم پاشا

اس خاک کی مٹھی (اقبال) نے اپنی تجلیوں کے تماشا میں اپنے کام کو آگے بڑھایا (یعنی چاند سے فلک عطارد کا رخ کیا ) ۔

یا تو یہ کیفیت تھی کہ میں (اقبال) زمان و مکان کے جال میں گرفتار تھا اور اب یہ حالت ہے کہ وجود میرے جال میں گرفتار ہے ۔

کیا میں نے اس نیلے آسمان کے پردے کو چاک کر دیا کیا میں افلاک سے ہوں یا افلاک مجھ سے ہیں ۔

یا تو یہ بات ہے کہ فلک نے میرے ضمیر کو اپنے پہلو میں لیا ہے یا پھر میرے ضمیر نے فلک کو اپنے اندر سمو لیا ہے ۔

جو کچھ میں دیکھ رہا ہوں کیا یہ خود میرے اندر کا منظر ہے یا میرے باہر ہے، کیا ہے ۔ میری نگاہیں جو کچھ دیکھ رہی ہیں وہ کیسا ہے اور کیا ہے

اب میں ایک اور آسمان کی طرف پرواز کرنے لگا ہوں ۔ میں اپنے سامنے ایک اور جہان دیکھ رہا ہوں ۔

مطلب یہ جہان (جہاں میں اب جا رہا ہوں ) ایک ایسا عالم ہے جس میں پہاڑ، جنگل، سمندر اور خشکی یعنی سب کچھ موجود ہے اور یہ ایک ایسا عالم ہے جو ہماری زمین سے بہت قدیم ہے ۔

یہ عالم ایک چھوٹے سے بادل سے ابھرا ہوا ہے اور جس نے انسان کی لوٹ مار نہیں دیکھی ۔

اس عالم کے وجود کی تختی پر ابھی کوئی نقش ثبت نہیں ہوا اور وہاں ابھی کوئی بھی انسان فطرت تنقید کرنے والا نہ تھا ۔

یہاں آ کر میں نے رومی سے کہا کہ یہ صحرا بہت اچھا ہے اور اسکے پہاڑوں میں سمندر کا شور دل کو بھاتا ہے ۔

میں یہاں زندگی کا کوئی نام و نشان نہیں دیکھتا پھر یہ اذان کی آواز کہاں سے آ رہی ہے

رومی بولے یہ اولیا (اللہ کے دوستوں ) کا مقام ہے ۔ یہ زمین ہماری خاک سے آشنا ہے ۔

جب بوالبشر آدم نے فردوس سے اپنا سامانِ سفر باندھا تو انھوں نے دو ایک روز یہاں بھی قیام کیا تھا ۔

یہاں کی فضاؤں نے آدم کی آہوں کا سوز دیکھا ہے اور ان کے صبح کے نالے بھی سنے ہیں ۔

اس مقامِ ارجمند کی زیارت کرنے والے بلند مقامات والے پاک مرد لوگ ہیں ۔

وہ پاک مرد فضیل اور بوسعید جیسے ہیں اور جنید اور بایزید جیسے عارف ہیں ۔

تو (اقبال) اب جلدی سے اٹھ تاکہ ہمیں ان کے ساتھ نماز پڑھنے کا شرف حاصل ہو اور یوں کچھ دیر کے لیے ہم بھی سوز درد کی نعمت سے بہرہ ور ہو سکیں ۔

میں آگے بڑھا اور ایک جگہ دو آدمیوں کو نماز میں کھڑے دیکھا ۔ مقتدی تو تاتار تھے جبکہ امامت افغانی کر رہے تھے ۔

پیر رومی جو ہر وقت محبوب حقیقی کی حضوری میں رہتے ہیں ان کا چہرہ ذوق و سرور کی تجلی سے چمک اٹھا ۔

مطلب رومی نے کہا کہ سرزمین مشرق نے ان دو ہستیوں سے بہتر اور کوئی ہستی پیدا نہیں کی ۔ ان ہستیوں کے ناخنوں نے ہماری گتھیاں سلجھائیں ۔

ایک تو سید السادات مولانا جمال (جمال الدین افغانی) ہیں جن کی گفتگو سے مٹی اور پتھر جیسے لوگ زندہ ہو گئے ۔

دوسری ہستی ترک سالار (ترک قوم کے لیڈر ) وہ درد مند حلیم ہیں جن کی فکر ان کے مقام و رتبہ کی طرح بلند ہے ۔

ایسی عظیم ہستیوں کیساتھ ملکر دو رکعت نماز ادا کرنا صحیح معنوں میں عبادت ہے ورنہ یہ وہ کام ہے جسکی مزدوری جنت ہے ۔

اس سخت کوش پیر مرد کی قرات ، سورہ والنجم اور وہ خاموش دشت گویا افغانی نماز میں بطور امام سورہ والنجم پڑھ رہے تھے اور اس خاموش فضا میں ان کی پر تاثیر آواز کچھ اس طرح گونج رہی تھی کہ الفاظ میں اسے بیان کرنا ممکن نہیں ۔

افغانی کی قرات کچھ اس انداز کی تھی کی اس سے حضرت ابراہیم خلیل اللہ جیسے پیغمبر بھی وجد میں آ جائیں اور جبرئیل کی پاک روح بھی وجد میں آنے لگے ۔

ان کی ایسی قرات تھی جس سے دل سینے میں بیقرار ہو گیا اور قبروں سے الا اللہ کا شور اٹھ کھڑا ہوا ۔

یہ قرات دھوئیں کو شعلے کی بیقراری بخشتی اور حضرت داوَد کو سوز و مستی عطا کرتی ہے ۔

ان کی ایسی قرات سے ہر غیب ، ظاہر ہو رہا تھا اور اس کی قرات سے ام الکتاب بے حجاب ہو رہی تھی ۔

میں (اقبال) نماز کے بعد اپنی جگہ سے اٹھا اور نیازمندی کے ساتھ اس (افغانی) کے ہاتھ پر بوسہ دیا ۔

رومی (میرا تعارف کراتے ہوئے افغانی سے) کہنے لگے کہ یہ ایک ذرہ ہے جو آسمان کے سفر میں ہے اس کے دل میں سوز و درد کی ایک دنیا سمائی ہوئی ہے ۔

اس نے اپنے سوا کسی اور پر نظر نہیں ڈالی ۔ اس نے کسی اور کو اپنا دل نہیں دیا (یہ ایک آزاد انسان ہے) ۔

وہ کائنات کی وسعت میں سیر میں سرگرم ہے ۔ میں (رومی) اسے شوخی سے اقبال کہنے کی بجائے زندہ رود کہتا ہوں ۔

(افغانی بولے کہ) اے زندہ رود تو ہماری دنیا کے بارے میں کچھ بتا، ہمارے زمین و آسمان کے بارے میں کچھ بتا ۔

تو ہے تو مٹی سے تخلیق شدہ لیکن فرشتوں کی طرح روشن بصر ہے ۔ تو ہمیں مسلمانوں کے بارے میں کچھ بتا ۔

گیتی شکن ملت کے ضمیر کے اندر میں میں دین اور وطن کی کشمکش دیکھتا ہوں ۔

ایمان کی کمزوری سے اس کی روح بدن میں مر چکی ہے اور وہ دینِ مبین اسلام کی قوت سے نا امید ہے ۔

ترک ہو یا ایران یا عرب سب مسلم ممالک فرنگیوں کے افکار سے بری طرح سے سرمست ہیں ۔ ہر ایک کے گلے میں فرنگیوں کا پھندا پڑا ہوا ہے ۔

مشرق اہلِ مغرب کی حکومت سے برباد ہو چکا ہے ۔ اشتراکیت نے دین و ملت کی چمک دمک ختم کر دی ہے ۔