بخش 7 - حکایت درین معنی که مسئلهٔ نفی خودی از مخترعات اقوام مغلوبهٔ بنی نوع انسان است که به این طریق مخفی اخلاق اقوام غالبه را ضعیف میسازند

کیا تو نے سنا ہے کہ قدیم زمانے میں بہت سی بھیڑ بکریاں ایک چراگاہ میں رہتی تھیں ۔

گھاس چارے کی کثرت کی وجہ سے ان کی نسل خوب بڑھ رہی تھی اور وہ دشمنوں کے ڈر سے بھی بے فکر تھیں ۔

یہ حالت تھی کہ آخر بھیڑ بکریوں کی تقدیر یکایک بگڑی اور مصیبت کے تیروں سے ان کے سینے زخمی ہو گئے ۔

(ہوا یوں کہ) چند شیر کسی جنگل سے ادھر آ نکلے اور انھوں نے رات کے وقت ان بھیڑوں پر حملہ کر دیا ۔

(حقیقت یہ ہے کہ) اپنی طرف کھینچ لینا اور غلبہ پا لینا قوت کا (پرانا ) طریق کار ہے اور فتح ، قوت ہی کا ایک کھلا بھید ہے ۔

شیر نر (شیروں ) نے اپنی شہنشاہی کا ڈنکا بجایا اور بھیڑوں کو آزادی سے محروم کر دیا ۔

شیر چونکہ شکار کرنا ہی جانتے ہیں ( اس لیے) وہ چراگاہ بھیڑوں کے خون سے سرخ ہو گئی ۔

ایک بھیڑ بڑی دانا اور سمجھ بوجھ والی تھی، باشعور تھی، پختہ عمر کی اور جہاں دیدہ تھی ۔

وہ اپنی قوم کے حالات سے پریشان تھی، اس کا سینہ شیروں کے ظلم و ستم کے سبب زخمی تھی ۔

بھیڑوں کی گردش تقدیر کے شکوے کرتے ہوئے اپنے معاملے کو تدبیر سے مستحکم کیا (اپنا کام تدبیر سے مضبوط کیا) ۔

(حقیقت یہ ہے کہ) کمزور آدمی اپنی حفاظت کیلئے آزمودہ اور معاملہ فہم عقل سے کام لینے کے انداز سوچتا ہے (حیلہ سازی کرتا ہے) ۔

غلامی میں نقصان اور تکلیف کو دور رکھنے (اس سے بچنے) کے لیے تدبیر کی قوت تیز ہو جاتی ہے ۔ (بہت بڑھ جایا کرتی ہے) ۔

جب انتقام کا جنون پختہ ہو جاتا ہے تو غلام کی عقل نت نئے مکر و فریب سوچنے لگتی ہے ۔ (ان اشعار میں بھیڑوں ہی کے حوالے سے یہ بتایا گیا ہے کہ کمزور اقوام کس طرح طاقت کے بجائے تدبیر سے کام لے کر غالب اقوام کو جہد و عمل سے بیگانہ کر دیتی ہیں ۔ ) ۔

اس نے دل میں کہا ہماری گتھی کا سلجھاوَ بہت مشکل ہے ، ہمارے غموں کا سمندر بے کراں ہے (اس کا کوئی کنارہ نہیں دکھائی دیتا) ۔

بھیڑ بکری میں اتنی طاقت نہیں کہ وہ اس کے بل پر شیر سے نجات حاصل کر سکیں ، ہم چاندی کی کلائی والی (بہت کمزور) ہیں اور وہ فولاد کے ہاتھوں والا (بہت طاقتور ) ہے ۔

وعظ و نصیحت سے ممکن نہیں ہے کہ بھیڑ ، بھیڑیئے کی سی خو خصلت پیدا کر لے ۔

ہاں شیر نر کو بکری بنا لینا ممکن ہے ۔ اسے اس کی اپنی ذات سے غافل کر دینا بھی ممکن ہے ۔

چنانچہ اس نے کچھ ایسا ڈھنڈورا پیٹ دیا جیسے اس پر وحی نازل ہوئی (الہام کا دعویٰ کیا) اور یوں وہ خون پینے والے شیروں کی واعظ بن گئی ۔

نعرہ لگایا کہ اے بے حد جھوٹی اور شیخی باز قوم، تم لوگ ہمیشہ ہمیشہ کی نحوست سے بے خبر ہو(غافل ہو) ۔

میں روحانی قوت سے مالا مال ہوں (مجھے بے حد روحانی قوت عطا ہوئی ہے) میں شیروں کے لیے خدا کی طرف سے بھیجی گئی رسول ہوں ۔

میں بصارت سے محروم آنکھوں کے لیے نور بن کر آئی ہوں ۔ میں شریعت لے کر اور خاص حکم و منصب کے ساتھ آئی ہوں ۔

(تو اے شیروں کی قوم) تو اپنے برے کاموں سے توبہ کرو، اے نقصان کی حامل سوچ رکھنے والی قوم اپنی بھلائی اور فائدے کا خیال کرو ۔

جو کوئی بھی غصیلا اور طاقت کے نشے میں چور ہے وہ بدبخت ہے ، زندگی کو استحکام تو اپنی ذات، اپنی قوت کی نفی ہی سے میسر آتا ہے ۔

دیکھو، نیک روحیں گھاس پات کھا کر گزارہ کرتی ہے جو گوشت کھانا چھوڑ دے وہ خدا کا مقبول بندہ بن جاتا ہے ۔

دانتوں کی تیزی تجھے رسوا کر رہی ہے اس سے عقل کی آنکھ اندھی ہو جاتی ہے ۔

جنت تو صرف کمزوروں اور ناتوانوں کے لیے ہے، جب کہ قوت و طاقت ہی خسارے کا سامان بن جاتی ہے ۔

شان و شوکت اور ہیبت و دبدبہ کی تلاش و کوشش تو نرا فساد (برائی ) ہے ۔ مفلسی (تنگ دستی) دولتمندی سے کہیں بہتر ہے ۔

جلا دینے والی بجلی اکیلے دانے کی گھات میں نہیں رہتی، سودانہ اگر فصل کی صورت اختیار کر لیتا ہے تو وہ دانشمند نہیں ہے (بجلی کے گرنے کا راستہ کھل جاتا ہے اس لیے انبار جمع نہ کیا جائے ) ۔

اگر تم عقل مند ہو تو ذرہ ہی بنے رہو ، صحرانہ بنو، تا کہ تو سورج کی روشنی سے فیض حاصل کر لو ۔

تو جو بھیڑ بکری کو مار کر فخر کرتا ہے اگر بلندی کا درجہ حاصل کرنا چاہتا ہے تو اپنے آپ کو ذبح کر، یعنی اپنے آپ کو مار ۔

ظلم و تشدد، سختی، انتقام اور قوت و قدرت زندگی کو ناپائدار بنا دیتی ہے(بنیاد کھوکھلی کر ڈالتا ہے) ۔

(دیکھو) سبزہ پاؤں تلے روندا جاتا ہے (لیکن پھر بھی) بار بار اگتا ہے اور اپنی آنکھوں سے موت کی نیند بار بار دھو ڈالتا ہے(یعنی پامالی اسے ختم نہیں کرتی بلکہ رہنے کی قوت عطا کرتی ہے) ۔

اگر تو عقل مند ہے تو اپنے آپ سے (اپنی اہلیتوں ) سے غافل ہو جا ۔ اگر تو خود سے غافل نہیں ہے تو پھر تو دیوانہ ہے ۔

آنکھ بند کر لے، کان بند کر لے اور ہونٹ یعنی منہ بند کر لے تا کہ تیری قوت ، فکر، بلند آسمان تک جا پہنچے ۔

دنیا کی چراگاہ کچھ بھی نہیں ہے (سراسر ناکارہ اور بے حقیقت ہے) تو اے پگلے ، اس خیالی دنیا سے مت لپٹ(یہ وہم کی پیداوار ہے اسے تعلق نہ رکھ) ۔

شیروں کا گروہ لگاتار جدوجہد اور محنت مشقت سے تھک کر چور ہو چکا تھا ۔ چنانچہ اس نے تن پرستی کا ذوق دل میں پیدا کر لیا (آرام طلب ہو گیا) ۔

اس گروہ کو جدوجہد سے بیگانہ کر دینے والی یہ نصیحت پسند آ گئی ۔ نادانی سے ان پر بھیڑ کا جادو چل گیا ۔

وہ گروہ جو کبھی بھیڑوں کا شکار کیا کرتا تھا اب اس نے بھیڑوں کی سی خصلت اپنا لی ۔

(نتیجہ یہ نکلا کہ) چیتوں یعنی شیروں کو اب گھاس مزہ دینے لگی اور یوں ان کے شیر پن کا گوہر بہا ٹھیکری بن کر رہ گیا (تمام جوہر زائل ہو گئے) ۔

گھاس کھانے سے دانتوں کی وہ پہلی سی کاٹ اور تیزی نہ رہی ۔ شعلے بکھیرنے والی آنکھ کی وہ پہلی سی ہیبت نہ رہی ۔

دل (جو جرات و دلیری کا منبع تھا) سینے سے نکل گیا، گویا آئینے کی چمک آئینے سے جاتی رہی ۔ آئینہ سے مراد دل اور جوہر آئینہ سے مراد جذبہ صادق ہے جس کی بدولت بڑے بڑے معرکے سر کئے جاتے ہیں ) ۔

وہ پورے طور پر جدوجہد کرنے کا شوق و جذبہ نہ رہا ۔ عمل کا وہ تقاضا دل سے جاتا رہا ۔

اقتدار، عزم اور ثابت قدمی سے وہ محروم ہو گئے ۔ ساکھ، عزت اور خوش بختی نے ساتھ چھوڑ دیا ۔

فولادی مضبوط پنجوں میں کمزوری آ گئی، دل مردہ ہو گئے اور جسموں نے قبر کی سی صورت اختیار کر لی ۔

جسم کی قوت و طاقت گھٹ گئی اور جان کا خوف بڑھ گیا ۔ جان کے اس خوف نے ہمت اور دلیری کی پونجی کو بھی ختم کر دیا ۔

بے ہمتی آئی تو سینکڑوں بیماریاں پیدا ہو گئیں مثلا ناکارگی، بیدلی اور پست فطرتی ۔

وہ شیر جو بیدار تھا (دلیر و قوی تھا) بھیڑ کے جادو نے اسے سُلا دیا ۔ اس کی قوت میں زوال آ گیا ۔ اس نے زوال کی حالت کو تہذیب کا نام دے دیا ۔اس سے مراد یہی ہے کہ وہ جذبوں اور قوت عمل سے عاری ہو کر اپنا تشخص کھو بیٹھا ۔ علامہ ایک جگہ کہتے ہیں دل مردہ دل نہیں ہے اسے زندہ کر دوبارہ کہ یہی ہے امتوں کے مرض کہن کا چارہ مجھے یہ ڈر ہے دل زندہ تو نہ مر جائے کہ زندگانی عبارت ہے تیرے جینے سے