بخش 6 - در بیان اینکه چون خودی از عشق و محبت محکم میگردد ، قوای ظاهره و مخفیه نظام عالم را مسخر می سازد

جب عشق و محبت کی بدولت خودی مضبوط پختہ ہو جاتی ہے تو اسکی قوت و طاقت کائنات پر حکمرانی کرنے لگتی ہے ۔

آسمان کے بزرگ نے ستاروں سے تصویریں بنائی، دراصل یہ تصویریں (ستارے) نہیں بلکہ خودی کی شاخ سے کلیاں پھوٹ نکلی ہیں ۔

اس (خودی) کا ہاتھ، خدا کا ہاتھ بن جاتا ہے ۔ اس کی انگلی سے چاند ٹکڑے ہو جاتا ہے ۔ اردو میں بھی علامہ نے ایک جگہ کہا ہے: ہاتھ ہے اللہ کا بندہ مومن کا ہاتھ غالب و کار آفریں کار کشا کار ساز

ایسا شخص دنیا کے معاملات کے فیصلے کرتا ہے؛ دارا و جم جیسے پادشاہ بھی اس کے حکم سے تابع فرمان ہوتے ہیں ۔

میں تجھ سے بو علی (قلندر پانی پت) کی بات کرتا ہوں جن کا نام ہندوستان کی سرزمین میں بہت روشن ہے ۔

قدیم باغ کے اس نغمہ الاپنے والے (قلندر) نے ہمیں شگفتہ و حسین پھول کی بات سنائی ۔

بہشت کا یہ خطہ جو کبھی اپنی اصل کے لحاظ سے آگ (کفرستان) تھا ۔ حضرت بو علی کے دامن کی ہوا سے واقعی بہشت کا ٹکڑا بن گیا ۔

(ان کا) ایک چھوٹا سا مرید بازار کی طرف گیا ( اس حالت میں کہ ) وہ حضرت بو علی کی شراب (محبت) سے سرشار تھا (اسے گردوپیش کی کچھ خبر نہ تھی) ۔

(اتفاق سے) اس شہر کے حاکم کی سواری ادھر سے گزر رہی تھی جس کے ساتھ اس کے غلام اور چوبدار بھی تھے

ان میں سے ایک نے آواز دی کہ اے بے سمجھ! حاکم کے ہمراہیوں کا راستہ نہ روک۔

وہ درویش اسی طرح سر جھکائے اپنے خیالات کے سمندر میں غوطہ لگائے ہوئے چلتا رہا (اسے پتا بھی نہ چلا کہ کون آ رہا ہے اور اسے کیا کہا گیا ہے) ۔

اس عصا بردار نقیب نے غرور کے نشے میں درویش کے سر پر اپنا عصا پورے زور سے مارا ۔

فقیر، حاکم کے اس رویے سے آرزدہ ہو گیا، اس کا دل بھاری تھا، وہ ناخوش تھا اور افسردہ ہو گیا

اس نے بو علی کی خدمت میں فریاد کی ۔ آنکھوں کے قید خانے سے آنسووَں کو بہایا (رو دیا) ۔

شیخ ( بو علی) نے اس بجلی کی طرح جو پہاڑوں پر گرتی ہے ، اپنی گفتگو سے آگ کا طوفان رواں کیا ( غصے میں آ گئے) ۔

انھوں (شیخ) نے شدت کے ساتھ منہ سے ایک اور آگ برسائی ( جلال آ گیا) اور اپنے منشی کو فرمایا

کہ قلم اٹھا اور فرمان لکھ، یہ فرمان ایک فقیر کی طرف سے سلطان کے نام جائے گا ۔

لکھ کہ تیرے حاکم نے میرے ایک خادم کے سر پر لاٹھی ماری ہے ۔ گویا اس نے اپنی متاع کو آگ دکھائی ہے (سروسامان کو آگ کی نذر کر دیا ہے) ۔

(اے بادشاہ) اس بدفطرت حاکم کو واپس بلا لے، ورنہ میں تیرا ملک کسی اور کو بخش دوں گا ۔

اس خدا رسیدہ( حق پرست) بندے کے خط نے بادشاہ کے جسم پر لرزہ طاری کر دیا ۔

اس کا جسم رنج و الم کا مجموعہ بن گیا ۔ شام کے (ڈوبتے) سورج کی طرح اس کا رنگ پیلا پڑ گیا ۔

اس (بادشاہ ) نے حاکم کو قید میں ڈال دیا اور قلندر سے اس قصور کی معافی طلب کی ۔

شیریں زباں اور رنگیں بیاں شاعر خسرو کو جس کے نغمے کن فکاں کے اسرار کے آئینہ دار ہیں ۔

جس کا باطن چاندنی کی طرح روشن اور نورانی ہے، سفارت کے لیے چنا گیا ہے ۔

جب اس (خسرو) نے قلندر کے سامنے ستار پر نغمہ چھیڑا تو اس نغمے سے (قلندر ) کی جان کا شیشہ پگھل گیا ۔

شان وشوکت جو پہاڑوں کی طرح مضبوط تھی اس کی قیمت، گفتار کا ایک نغمہ ٹھہری(یعنی اس میں نرمی پیدا ہو گئی) ۔

(دیکھو) درویشوں کے دل پر نشتر نہ لگائیے، اپنے آپ کو راکھ کر دینے والی آگ میں نہ پھینکیے ۔