بخش 5 - در بیان اینکه خودی از سؤال ضعیف می‌گردد

اے (مسلمان ) تو نے کبھی شیروں سے خراج حاصل کیا تھا ۔ (اب تو) ضرورت کے ہاتھوں تیری طبیعت لومڑی جیسی ہو گئی ہے ۔

تیری یہ بدحالی تیری مفلسی کی وجہ سے ہے ۔ تیرے دکھ کا بنیادی سبب تیری یہی بیماری ہے ۔

ناداری بلند فکری سے رفعت چھین لیتی ہے اور اعلیٰ درجے کے خیال کی شمع بجھا دیتی ہے ۔

تو زندگی کے مٹکے سے سرخ رنگ کی شراب حاصل کر، اپنی پونجی زمانے کی تھیلی (جیب) سے حاصل کر ۔

تو حضرت عمر فاروق کی طرح خود اونٹ سے اتر کر (اپنا کوڑا اٹھا) بچ، دوسروں کے احسان سے بچ ۔

تو کب تک مرتبہ و اقتدار (عہدوں ) کی بھیک مانگتا رہے گا، یعنی بچوں کی طرح بانس کے ڈنڈے کی سواری (فضول کاموں ) میں مصروف رہے گا (ان دنوں مسلمان انگریزوں کے ماتحت منصبوں اور خطابوں کی کشمکش میں گرفتار تھے) ۔

وہ فطرت جو آسمان (عظمت و بلندی) پر نظریں جمانے والی ہے وہ دوسرے کے احسان سے پست ہو کر رہ جاتی ہے ۔

نادار آدمی سوال کرتا ہے اس کی ناداری اور بھی ذلیل ہو جاتی ہے ۔ بھیک مانگنے والا بھیک مانگ کر اور بھی نادار بن جاتا ہے ۔

سوال کی وجہ سے خودی کے اجزا برہم ہو جاتے ہیں ، یوں خودی کے کوہ و طور کا درخت (جس پر خدا کا جلوہ ظاہر ہوا تھا) تجلی سے محروم رہ جاتا ہے(بے نور رہ جاتا ہے) ۔

تو اپنی مٹھی بھر خاک کو زیادہ پریشان نہ کر ، چاند کی طرح اپنی روزی اپنے پہلو سے پیدا کر ۔ چاند بدر بننے کے بعد وہ برابر گھٹتا ہے ۔ گویا پہلو کاٹ کر اپنا رزق مہیا کرتا ہے ۔

اگرچہ تیرے دن کتنی ہی تنگی ترشی میں گزریں تو بدحالی کا شکار ہو، اس طرح کی مصیبتوں کے سیلاب کے راستے میں تو نے اپنا سامان اسباب ڈال رکھا ہو ۔

(پھر بھی) تو اپنی روزی کسی دوسرے کے مال و دولت میں مت تلاش کر اور مشرق کے چشمے سے پانی کی موج کا طلب گار نہ ہو ۔

تا کہ کل قیامت کے دن، جو بڑا ہی جان توڑ اور عذاب کا دن ہو گا ، تجھے رسول اللہ کے سامنے شرمندہ نہ ہونا پڑے ۔

چاند کو سورج کے دسترخوان سے رزق پہنچتا ہے(روشنی ملتی ہے) ۔ سورج کے اس احسان کے سبب اس کے دل پر داغ ہے(اشارہ ان دھبوں کی طرف ہے جو چاند میں نظر آتے ہیں ) ۔ ۔

ہمت خدا سے مانگ اور آسمان سے الجھ جا (تقدیر کو خود سنوار) ملت روشن یعنی ملت اسلامی کی عزت و آبرو خاک میں نہ ملا ۔

جس ذات گرامی نے کعبے کو بتوں کے خس و خاشاک سے پاک کیا ۔ اس ہستی نے محنت مزدوری کرنے والے کو اللہ کا دوست کہا ہے(الکاسب حبیب اللہ ، یعنی جو شخص اپنے ہاتھ سے روزی کماتا ہے وہ اللہ کا دوست (پیارا) ہے ۔ ) ۔ اپنی تقدیر انسان خود بناتا ہے اپنی جدوجہد سے، اپنے عمل پیہم سے، اسی لیے علامہ کو یہ کہنا پڑا: عبث ہے شیوہ تقدیر یزداں تو خود تقدیر یزداں کیوں نہیں ہے

اس آدمی پر افسوس ہے جو غیروں کے دسترخوان کا احسان مند ہے ۔ دوسروں کا احسان اٹھانے کے سبب اس کی گردن جھکی رہتی ہے ۔

اس نے دوسرے کی مہربانی کی بجلی سے اپنے آپ کو جلا لیا ۔ اس نے معمولی شے کے عوض اپنی غیرت کا سرمایہ بیچ ڈالا ۔

(اس کے برعکس) و ہ پیاسا بڑا ہی مبارک انسان ہے جو کڑکتی دھوپ میں بھی خضر سے پانی کا ایک پیالہ بھی لینے کو تیار نہیں ہے ۔

وہ (مبارک انسان) سوال کرنے کی ذلت سے بچا اور شرمندگی کے پسینے سے اس کی پیشانی نہ بھیگی ۔ وہ ایک انسان کی صورت جیا اور مٹھی بھر مٹی نہ بنا (آدمیت کو برقرار رکھا ۔ )

اس دنیا میں ایسا باوقار جوان اپنی گردن صنوبر کے درخت کی طرح اٹھا کر چلتا ہے ۔

اگر وہ خالی ہاتھ ہو تو اور زیادہ خوددار بن جاتا ہے ۔ ہر چند اس کے مقدر سوئے ہوتے ہیں وہ خود کہیں زیادہ بیدار ہو جاتا ہے ۔

گدائی کے تھیلے کا سمندر گویا آگ کا طوفان ہے، ہاں اگر اپنے ہاتھوں سے شبنم بھی حاصل کر لی جائے تو وہ خوب ہے(گدائی کے سمندر سے بہتر ہیں ) ۔

تو مردانہ غیرت (خود میں پیدا کر کے) بلبلے کی طرح ہو جا، یعنی اس (بلبلے) کی طرح تو سمندر میں بھی رہتے ہوئے اپنا پیالہ اوندھا رکھا ۔ یہ خیال اقبال نے شمع اور شاعر میں پیش کیا ہے: تو اگر خوددار ہے، منت کش ساقی نہ ہو عین دریا میں حباب آسانگوں پیمانہ کر