بخش 10 - در بیان اینکه تربیت خودی را سه مراحل است مرحلهٔ اول را اطاعت و مرحلهٔ دوم را ضبط نفس، و مرحله سوم را نیابت الهی نامیده اند: «مرحلهٔ اول اطاعت»

خدمت اور محنت مشقت کرتے رہنا اونٹ کا شیوہ ہے ۔ صبر اور ثابت قدمی ہی اس کا کام ہے ۔

راستہ چلتے ہوئے اس کے پاؤں سے شور کم پیدا ہوتا ہے ۔ وہ قافلے کے لیے صحرا کا جہاز ہے ۔

اسکے پاؤں کے نشان ہر جنگل اور صحرا کا مقدر ہیں ( ہر جگہ چلتا ہے) ۔ وہ کم کھاتا ہے، کم سوتا اور محنت و مشقت کو اپنی روش بنائے رکھتا ہے ۔

وہ محمل (کجاوے) کا بوجھ اٹھائے مزے مزے سے چلتا ہے، پاؤں چلاتے مارتے (رقص کرتا ہوا) منزل مقصود کی طرف بڑھا چلا جاتا ہے ۔

وہ اپنی رفتار کے نشے میں مگن ہو کر چلتا ہے ۔ سفر میں وہ اپنے سوار کے مقابلے میں زیادہ صبر سے کام لیتا ہے ۔ (ان اشعار میں علامہ نے اطاعت اختیار کرنے پر زور دیا ہے اور اس کے لیے وہ اونٹ کی مثال لائے ہیں ، جو ان کے نزدیک اطاعت کا ایک عملی نمونہ ہے) ۔

(اے انسان) ان فرضوں کے بوجھ سے سرتابی نہ کر، منہ نہ موڑ، جو خدا نے تیرے ذمے لگا دیئے ہیں ۔ تاکہ تو عندہُ حُسن المآب کا پھل پائے ۔ اس طرح تو اس بہترین ٹھکانے پر پہنچ جائے گا جو خدا کے پاس ہے ۔

اے غفلت کے عادی انسان تو اطاعت خداوندی کی کوشش کر، یاد رکھ کی جبر ہی سے اختیار پیدا ہوتا ہے ۔

سچے احکام کی پابندی ایسی شے ہے جو نکمے اور بے حقیقت آدمی کو بھی واقعی انسان بنا دیتی ہے ۔ اس کے برعکس سرکشی اور نافرمانی کا یہ حال ہے کہ اگر وہ آگ بھی ہے تو سرکشی کی بنا پر اس کی حقیقت تنکے کی سی ہو جاتی ہے ۔

جو کوئی چاند ستاروں کو تسخیر کرتا ہے وہ (پہلے) اپنے آپ کو آئین کا مقید و پابند بناتا ہے ۔

ہوا پھول کی قید خانے میں بند ہو کر خوشبو بن جاتی ہے ۔ یہی قید خوشبو کو ہرن کا نافہ بنا دیتی ہے ۔

ستارہ منزل کی طرف قدم اٹھاتا ہے تو اطاعت کا سر جھکائے ہوئے چلتا ہے ۔

سبزہ بڑھنے پھولنے کے نظام کے تحت اگتا ہے(اگر)وہ اس نظام سے پہلو تہی کرے تو وہ پاؤں کے نیچے روندا جاتا ہے ۔

لالہ یعنی گل لالہ کا آئین و دستور مسلسل جلتے رہنا ہے (اس کے رنگ کی طرف اشارہ ہے) اس کی رگوں میں اس کا خون دوڑتا رہتا ہے ۔

باہم مل جانے کے نظام کی بنا پر قطرے دریا کی شکل اختیار کر جاتے ہیں ۔ اسی باہمی ملاپ کے دستور کے سبب ذرے صحرا بن جاتے ہیں ۔

ہر چیز کا باطن کسی نہ کسی آئین کی وجہ سے مضبوط و مستحکم بنتا ہے ۔ (تو پھر) تو نے کس لیے اس پابندی اور فرمانبرداری کو پس پشت ڈال رکھا ہے کیوں غفلت برت رہا ہے ۔

اے پرانے آئین و دستور سے بے تعلق (مسلمان) تو پھر سے وہی چاندی کی زنجیر پاؤں میں ڈال لے ۔

آئین کی سختی کا گلہ شکوہ نہ کر، رسول اللہ ﷺ کے مقرر کردہ آئین و دستور کے دائرے سے باہر نہ نکل ۔

تیرا نفس اونٹ کی طرح اپنے آپ کو پالنے والا ہے، ساتھ ہی وہ خود پسند، اپنا سوار آپ (اپنے آپ پر کسی کا اقتدار روا نہیں رکھتا) اور ضدی اور سرکش بھی ہے ۔

تو مرد بن (اپنے اندر مردانگی پیدا کر) اور نفس کی لگام ہاتھ میں تھام لے ۔ اس پر قابو پا لے تا کہ اگر تو ٹھیکری ہے تو گوہر بن جائے ۔

جس کا بھی اپنے آپ (نفس) پر حکم نہیں چلتا وہ دوسروں ہی کا حکم ماننے پر لگا رہتا ہے (فرمانبردار بن جاتا ہے) ۔

تیرے وجود کی تعمیر مٹی سے ہوئی ہے ۔ یعنی تو آب وگِل سے بنا ہے اس تعمیر میں محبت اور خوف کی باہم آمیزش کی گئی ہے ۔

(تیرے دل میں ) دنیا کا خوف ہے، آخرت کا خوف ہے جان کا خوف ہے، زمین اور آسمان سے نازل ہونے والی آفتوں کا خوف ہے ۔

(اور محبت کی قسمیں کچھ اس طرح ہیں ) مال و دولت کی محبت اور وطن کی محبت، اپنے عزیزوں رشتہ داروں کی محبت اور عورت یا بیوی کی محبت ۔

پانی اور مٹی کا آمیزہ و مرکب جسم کی پرورش کرنے والا ہے ۔ وہ برائیوں اور بدکاریوں کا شکار بن جاتا ہے ۔

جب تک تیرے ہاتھ میں لا الہ (کلمہ توحید) کا عصا ہے تو خوف اور ڈر کے ہر طلسم کو توڑ کے رکھ دے گا ۔

جس کسی کے جسم میں حق جان کی طرح موجود ہے اس کی گردن کبھی باطل کے سامنے نہیں جھک سکتی ۔

اس کے سینے میں خوف کا گزر ہو ہی نہیں سکتا، اس کا دل خدا کے سوا کسی شے سے نہیں ڈرتا ۔

جو شخص لا کی مملکت میں آباد ہو گیا وہ بال بچوں (دنیوی دھندوں وغیرہ )کی زنجیر سے بالکل آزاد ہو گیا ۔

وہ جو غیر اللہ سے نظریں ہٹا لیتا ہے وہ اپنے بیٹے کے حلق پر چھرا رکھ دینے میں بھی پس و پیش نہیں کرتا ۔

اگرچہ وہ ایک تنہا ہونے کے باوصف ایک بہت بڑے لشکر کی صورت ہے، اس کی نظروں میں اس کی جان ہوا سے بھی کہیں سستی ہے( جو شخص جان سے بے پرواہ ہے ان کی قوت کا انداہ کون کر سکتا ہے ۔ ) آخری شعر میں اسی پختہ محبت و ایمان کی ایک اور مثال سے وضاحت کی گئی ہے ۔ ایسا شخص یعنی مرد مومن چونکہ باطل قوتوں سے خوف زدہ نہیں ہوتا اس لیے وہ ان قوتوں سے ٹکر لے لیتا ہے ۔ اس صورت میں اسے اپنی جان کا ذرا بھر بھی احساس نہیں ہوتا، بلکہ غالب کے لفظوں میں اس کا احساس کچھ اس طرح کا ہوتا ہے ۔ جان دی، دی ہوئی اسی کی تھی ۔ حق تو یہ ہے کہ حق ادا نہ ہوا تنہا ہونے سے مراد باطل قوت کے مقابلے میں بہت کم جمیعت ہونے والا بھی ہے ۔ اس کے بہترین مثال حضرت امام حسین علیہ السلام کی ہے جن کے بارے میں کہا گیا ہے ۔ سرداد، نہ داد دست در دست یزید حقا کہ بناے لا الٰہ ہست حسین یعنی جان دے دی لیکن یزید کی باطل قوت کی بیعت نہیں کی، بلا شبہ حسین لا الٰہ کی بنیاد ہیں ۔

لا الٰہ سیپی ہے تو نماز گوہر (موتی ) ہے ۔ مسلمان کے دل کے لیے نماز، حج اصغر کا درجہ رکھتی ہے ۔

(یہ نماز) مسلمان کے ہاتھ میں ایک خنجر کی مانند ہے ۔ یہ بُری اور بے حیائی کی باتوں ، خدائی احکام سے سر تابی اور برے کاموں کو ختم کر دینے والی ہے ۔

روزہ، بھوک اور پیاس پر شب خون مارتا ہے وہ (روزہ) صرف بدن کی پرورش کرنے والے خیبر کو فتح کرتا ہے ۔ یعنی تن پروری باقی نہیں رہتی ۔

حج مومنوں کی فطرت کو منور یعنی ان کے ایمان میں اضافہ کرنے والا ہے ۔ حج گھر بار چھوڑنے کی تعلیم دیتا ہے اور وطن کی محبت دل سے نکال دیتا ہے ۔

وہ (حج) ایک ایسی عبادت ہے جو (پوری ملت اسلامیہ) ایک لڑی میں پرونے والی اور ملت کی کتاب کی شیرازہ بندی کرنے والی ہے ۔

زکواۃ ، مال و دولت کی محبت کو مٹا دیتی ہے ۔ زکواۃ (ملت کے افراد کو) برابری سے بھی آگاہ کرتی ہے یعنی سب مسلمان برابر ہیں ۔

یہ (زکواۃ) حتیٰ تنفقو کے ارشاد ربانی سے دل کو مضبوط کرتی ہے ۔ دولت کو برکت عطا کرتی اور اس (دولت) میں محبت میں کمی کا باعث بنتی ہے ۔

یہ سب (ارکان اسلام) تیری پختگی و مضبوطی کا سامان ہیں ۔ اگر تیرا اسلام مضبوط ہے تو تو خود بھی مضبوط ہے ۔

یا قوی کے ورد سے اپنے آپ کو صاحب قوت بنا لے تا کہ تو مٹی کے اونٹ پر سوار ہو جائے(نفس پر قابو پا لے) ۔ ان اشعار میں اسلام کے پانچ بنیادی ارکان کا ذکر کر کے ان کی اہمیت و افادیت بیان کی گئی ہے ۔ ان پر عمل کرنے سے اسلامی معاشرہ دنیا کا ایک عظیم معاشرہ بن سکتا ہے) ۔

یا قوی کے ورد سے صاحب قوّت بن؛ تاکہ اپنے خاکی بدن کے اونٹ پر سواری کر سکے۔

ترجمہ: میاں عبدالرشید

اگر تو شتربان بن جائے (نفس کے اونٹ کو قابو میں لے آئے) تو دنیا پر حکم چلائے گا اور سلیمان کا تاج تیرے سر کی زینت بنے گا ۔

جب تک یہ دنیا قائم ہے تو اس کو سجانے والا رہے گا اور اس ملک کا تاجدار بن جائے گا جس پر کبھی زوال نہ آئے گا ۔

دنیا میں اللہ کا نائب بننا اچھی بات ہے ۔ عناصر پر حکمرانی کرنا کتنا اچھا ہے ۔

خدا کا نائب، دنیا کی روح کی مانند ہے، اس کا وجود اسم اعظم کا سایہ ہوتا ہے ۔

وہ اس کائنات کی ہر ہر شے کے تمام بھید جانتا ہے اور دنیا میں اللہ کی طرف سے مامور ہوتا ہے (اللہ کے حکم جاری کرنا اس کا اصل کام ہے) ۔

جب وہ کائنات (دنیا) کی وسعتوں میں خیمہ لگا لیتا ہے تو اس پر پرانی بساط کو الٹ کے رکھ دیتا ہے(درہم برہم کر دیتا ہے) ۔

اس کی فطرت برکتوں اور اچھائیوں سے بھری ہوتی ہے اس کا اظہار وہ ایک نئی دنیا کے وجود میں لانے سے کرنا چاہتا ہے ۔

اس کائنات جیسے سینکڑوں عالم اس کے خیالات اور افکار کی کھیتی سے پھول کی طرح اگتے رہتے ہیں ۔

وہ خام فطرت کو پختہ اور پائیدار بنا دیتا ہے، وہ حرم سے بتوں کو باہر نکال دیتا ہے ۔

اس کے مضراب سے دل کے ساز میں سے نغمے پھوٹنے لگتے ہیں ۔ اس کا جاگنا اور اس کا سونا سب اللہ کے لیے ہوتا ہے ۔

وہ بڑھاپے کو جوانی کی لے (جوانی کا سا عزم و ولولہ) سکھا دیتا ہے وہ ہر چیز کو شباب کے رنگ میں رنگ دیتا ہے ۔

وہ بنی نوع انسان کے لیے خوش خبری دینے والا بھی ہے اور اسے برائی سے ڈرانے والا بھی وہ سپاہی بھی ہوتا ہے وہ فوج کا سپہ سالار بھی ہے اور سردار بھی ۔

وہ علم الاسماء کا مقصود و مدعا ہوتا ہے وہ (نائب خدا) سبحان الذی اسرا کا بھید (راز) ہوتا ہے ۔

عصا سے اس کا سفید ہاتھ مضبوط ہے، اس کا مکمل اختیار قدرت اسکے علم کے ساتھ ملا ہوا ہے(اس کا علم اور قدرت کامل دونوں جڑواں ہوتے ہیں ) ۔

جب وہ شہسوار اپنے ہاتھوں میں زمانے کے گھوڑے کی باگ تھام لیتا ہے تو اس (گھوڑے) کی رفتار اور بھی تیز ہو جاتی ہے ۔

اس کا رعب و دبدبہ دریائے نیل کو خشک کر دیتا ہے، وہ اسرائیل کو لے کر مصر سے باہر نکل جاتا ہے (تاکہ فرعون کی غلامی سے نجات پائیں ) ۔

اس کے قم (اٹھ، اللہ کے حکم سے) کہنے سے مری ہوئی جانیں بدن کی قبر میں یوں اٹھ کھڑی ہوتی ہیں جس طرح صنوبر کا درخت باغ میں اگتا ہے ۔

اس کی شخصیت (اس کا وجود ) کائنات کے وجود کی دلیل یا تفسیر ہے ۔ اس کے جلال و عظمت پر دنیا کی نجات موقوف ہے ۔

اس کے سائے کی حفاظت سے ذرہ بھی خورشید آشنا (سورج سے شناسائی کرنے والا) بن جاتا ہے اس کے سرمایہ زندگی سے کائنات کی قدر وقیمت (علوم و روحانیت)بڑھ جاتی ہے ۔

وہ اپنے زور عمل کے اعجاز سے ہر شے کو زندگی عطا کرتا ہے وہ عمل کے انداز کو نئے سرے سے زندہ کر دیتا ہے (عمل کے طور طریقے سراسر نئے ہو جاتے ہیں ) ۔

اس کے پاؤں کے نقش سے کئی جلوے پھوٹتے ہیں ، سینکڑوں کلیم اس کے سینا پہنچنے کے لیے آوارہ پھرتے ہیں (بیتاب نظر آتے ہیں ) ۔

وہ زندگی کی نئی تفسیر کرتا ہے اور اس خواب کو نئی تعبیر دیتا ہے ۔

اس کی پوشیدہ شخصیت زندگی کا راز ہوتی ہے وہ زندگی کے ساز کا ایسا نغمہ ہے جو پہلے کبھی سنا نہ گیا ہو ۔

نئے نئے خیالات و مضامین باندھنے والی فطرت کی طبیعت خون ہو جاتی ہے کاوش کرتے کرتے گھل گھل کر لہو بن جاتی ہے تب کہیں اس کی ذات کے متعلق دو شعر موزوں ہوتے ہیں ۔

ہماری خاک کی مٹھی آسمان پر جا پہنچی (اب ) اس غبار سے وہ شہسوار (خدا کا خلیفہ) ظاہر ہو گا ۔

کائنات کو جلا دینے والا ہمارے ہمارے آنے والا کل کا شعلہ ہمارے آج کی راکھ میں سویا پڑا ہے ( جو کل چمکے گا تو دنیا کے لیے روشنی پہنچائے گا) ۔

ہمارا غنچہ اپنے دامن میں گلستاں سمیٹے ہوئے ہے ۔ ہماری آنکھ آنے والی صبح کے نور سے روشن ہے ۔

اے زمانے کے گھوڑے پر سوار، آ جا، اے امکان (اس کائنات) کی آنکھوں کا نور ہے ، روشنی ہے ، آ جا (نمودار ہو جا) ۔

تو ہنگامہ ایجاد (موجودات عالم) میں رونق پیدا کر دے ۔ آنکھوں کی پتلیوں میں آباد ہو جا ۔

دنیا کی قوموں نے جو ہنگامہ برپا کر رکھا ہے اسے ختم (خاموش) کر دے ۔ اپنے نغمے کو (انسانوں ) کی سماعت کے لیے بہشت کی سی تازگی والا بنا دے ۔

اٹھ اور بھائی چارے کا ساز چھیڑ، محبت کی شراب کا جام پھر سے دے(تقسیم کر دے) ۔

ایک مرتبہ پھر دنیا میں صلح اور امن کا دور لے آ، جنگ و فساد پر آمادہ لوگوں کو صلح کا پیغام دے ۔

بنی نوع انسان کھیت ہے اور تو اس کا حاصل ہے، تو زندگی کے قافلے کی منزل مقصود ہے ۔

درخت کے پتے، خزاں کے ستم سے جھڑ گئے ہیں تو پھر موسم بہار کی صورت بن کر ہمارے باغ میں سے گزر ۔

تو ہماری ندامت سے ، شرمسار پیشانیوں سے (ہمارے) بچوں ، جوانوں اور بوڑھوں کے سجدے لے (نذر عقیدت پیش کرنے کے لیے بے قرار ہیں تو وہ قبول کر) ۔

تیرے وجود سے ہمیں سربلندی میسر ہے، سو اس دنیا کے سوز سے ہم نباہ کرتے چلے جا رہے ہیں ( ہم اس انتظار میں ہیں کہ تو نمودار ہو، آج ہم دنیا میں گھرے ہوئے ہیں ۔ )