بخش 11 - در شرح اسرار اسمای علی مرتضی

حضرت علی المرتضیٰ دلیروں کے سردار ہیں ، اسلام لانے والوں میں سرفہرست ہیں ۔ حضرت علی المرتضیٰ کی ذات عشق کے لیے سرمایہ ایمان تھی ۔

میں (اقبال) آپ کے خاندان (مبارک) کی محبت کے سبب زندہ ہوں اور (اسی برکت سے) میں دنیا میں موتی کی طرح چمک رہا ہوں ۔

میں نرگس ہوں (یعنی سراپا آنکھ ہوں ) اور نظارے میں کھویا ہوا ہوں (نظارے کے لیے بیخود ہوں ) میں آپ کی کیاری میں خوشبو کی طرح ادھر اُدھر پھرتا ہوں ۔

اگر میری خاک سے زمزم کا چشمہ پھوٹتا ہے تو یہ آپ ہی سے محبت اور برکت کے سبب ہے شراب ٹپک رہی ہے تو یہ بھی اسی باعث ہے ۔

میں خاک ہوں اور (حضرت علی ) سے محبت کے نتیجے میں آئینہ صفت ہو گیا ہوں ، چنانچہ میرے سینے میں آواز کو دیکھا جا سکتا ہے ۔

آپ کے (مبارک) چہرے سے رسول اللہ نے اچھا شکون لیا، ملت اسلامیہ کو آپ کے شکوہ و دبدبہ کے نتیجے میں شان وشوکت ملی ۔

آپ کے فرمودات، روشن دین (اسلام) کے لیے قوت کا باعث ہیں ۔ دنیا کو انہی کے خاندان سے آئین، قانون اور دستور ملا ۔

اللہ کے پیغمبر ﷺ نے آپ کو بوتراب کا نام (لقب ) دیا ۔ اللہ تعالیٰ نے قرآن کریم میں آپ کو ید اللہ (اللہ کا ہاتھ) قرار دیا۔

جو کوئی بھی زندگی کے بھید جانتا ہے اسے علم ہے کہ حضرت علی کے اسما و القاب کا راز کیا ہے ۔

وہ سیاہ خاک جسے بدن کہا جاتا ہے اورعقل جس کے ظلم سے نالاں ہے (آہ فریاد کر رہی ہے) ۔

آسمانوں کی سی بلندی کا حامل فکر اس کے ہاتھوں پستی کا شکار رہتا ہے اور دیکھنے والی آنکھ اس کے سبب اندھی ہے اور کان بہرے ہیں ۔

جس کے ہاتھ میں حرص و ہوس کی دو دھاری تلوار ہے اور اللہ کی راہ میں چلنے والوں (سالکوں ) کے دل اس سے خوف زدہ ہیں ۔

اللہ کے شیر (اسد اللہ، حضرت علی ) نے اس خاک (بدن) پر قابو پا لیا ۔ آپ نے اس سیاہ خاک کو جو بالکل بے نور تھی اکسیر یعنی کیمیا بدل دیا ۔

مرتضیٰ جن کی تلوار سے حق روشن ہے، جو بوتراب بنے یا کہلائے ہیں تو یہ جسم کی ولایت کو فتح کرنے کے نتیجے میں ہے ۔

دلیر اور شجاع آدمی کراری (بڑھ چڑھ کر دشمن پر حملہ کرنے ) کی بنا پر فاتح ملک بنتا ہے ۔ اس کے گوہر کی آب و تاب خودداری کے سبب ہے ۔

اس کائنات میں جو کوئی بھی بوتراب بنتا ہے (یعنی اپنے جسم اور ہوا و ہوس پر قابو پا لیتا ہے اسی کو یہ قوت میسر آتی ہے کہ) وہ چاہے تو سورج کو مغرب سے لوٹا لاتا ہے ۔

جس کسی نے بھی تن کی سواری پر کس کر زین باندھی اسی کو یہ مرتبہ ملا کہ وہ حکومت کی مہر میں نگینے کی طرح بیٹھ گیا ۔ یعنی سلطنت کا مالک بن گیا ۔

اس دنیا میں تو خیبر جیسے باشکوہ قلعے کی ساری شان و شوکت اس کے پاؤں کے نیچے ہوتی ہے اور دوسری دنیا (آخرت) میں اس کا ہاتھ حوض کوثر کا شیریں پانی تقسیم کرنے والا ہوتا ہے ۔

وہ اپنی ذات سے بخوبی واقف ہونے کے نتیجے میں اللہ کا ہاتھ بن جاتا ہے اور پھر اسی الوہی ہاتھ کے ساتھ وہ کائنات پر حکمرانی کرنے لگتا ہے ۔

اس کی ذات شہر علوم کا دروازہ (بن جاتی ) ہے اور حجاز، چین اور شام یعنی ساری دنیا اس کے زیر فرمان آ جاتی ہے ۔

اپنی خاک (بدن) پر حکم چلانے والا (حکمران) بننا چاہیے تاکہ تو اپنی تاک (انگور کی بیل) سے مصفا اور روشن شراب پیئے ۔

(جل کر) راکھ ہو جانا پروانے کا طریقہ ہے تو مٹی کا باپ (بوتراب) بن جا (اسے فتح کر اور قابو پا) کہ یہی شجاعت و دلیری ہے ۔

تیرا بدن پھول کی طرح نرم و نازک ہے ۔ پتھر بن جا(سخت جان ہو جا) تا کہ تو چمن کی دیوار کی بنیاد بن سکے ۔

اپنی مٹی گارے سے (ایک صاحب عمل) آدمی کی تعمیر کر(نیا آدم پیدا کر) ایسے آدمی کے لیے ایک عالم نو تعمیر کر(نئے جہان کی بنیاد رکھ) ۔

اگر تو خود کوئی دیوار اور دروازہ نہیں بنائے گا تو کوئی دوسرا آ کر تیری بیکار پڑی مٹی سے اپنی تعمیر کے لیے اینٹیں بنانے لگے گا ۔

اے (مخاطب، اس دور کے مسلمان) بے شک تو جو اس بے اصولے آسمان کے جور و ستم سے تنگ ہے تیرا جام پتھر کے ظلم و ستم کا فریادی ہے ۔

تو کب تک نالہ و فریاد اور ماتم کرتا رہے گا کب تک شب و روز سینہ پیٹتا جائے گا

عمل ہی میں زندگی کا مقصد پوشیدہ (چھپا ہوا) ہے تخلیق کا لطف، زندگی کا قانون ہے ۔

اٹھ اور نیا جہان پیدا کر ۔ آگ کو آغوش میں لے لے اپنے جسم میں آگ بھڑکا کر خود کو حضرت خلیل کی شہرت کا مالک بنا(نعرہ حق لگا) ۔

ناموافق دنیا سے نباہ یا موافقت پیدا کرنا ایسے ہی ہے جیسے میدان (جنگ) میں ہتھیار ڈال دینا(ہار قبول کر لینا) ۔

جو خود دار انسان عمل میں پکا اور تجربہ کار ہوتا ہے، زمانہ خود اس کے مزاج کے مطابق چلتا ہے ۔

اور اگر زمانہ اس (خوددار) کے مزاج سے نباہ نہیں کرتا تو وہ آسمان سے جنگ کرنے پر تیار ہو جاتا ہے ۔

وہ کائنات کو جڑ سے اکھاڑ ڈالتا ہے اور اسکی جگہ ذروں کو ایک نئی ترکیب (نئی دنیا) سے نئے سرے سے آراستہ کرتا ہے ۔

وہ زمانے کی گردش کو درہم برہم کر کے رکھ دیتا ہے ۔ وہ نیلے آسمان ہی کو باقی نہیں چھوڑتا جس سے گردش پیدا ہوتی ہے ۔

وہ اپنی قوت سے ایک ایسا نیا زمانہ وجود میں لے آتا ہے جو اس سے موافقت کے لیے تیار ہو ۔

اگر دنیا میں جوان مردوں کی طرح زندہ نہیں رہ سکتے تو پھر جوان مردوں کی طرح جان دے دیتے ۔ یعنی دلیرانہ موت کو سینے سے لگا لینا ہی زندگی ہے ۔

صحت مند و توانا دل والا بڑے بڑے کارنامے سرانجام دیتے ہوئے اپنی قوت و طاقت کی آزمائش کرتا ہے (اسے زور آزمانے کا موقع ملتا ہے) ۔

مشکلات سے دلچسپی و وابستگی ایک اچھی بات ہے(ایسی ہی زندگی کے لیے دل میں تڑپ ہونی چاہیے) حضرت ابراہیم خلیل اللہ کی مانند آگ سے پھول چننے کا عمل اچھا ہے(انھیں کے نقش قدم پر چلنا چاہیے) ۔

صاحبان عمل کی قوت کے ممکنات، ان کی کٹھن اور مشکل کاموں سے رغبت کی بناپر ظاہر ہوتے ہیں ۔

جو لوگ ہمت سے عاری ہیں ان کے پاس کینے کے سوا کوئی ہتھیار نہیں ۔ ان کی زندگی کا دستور یہی ہے

حالانکہ زندگی تو ایک واضح قوت ہے جس کی بنیاد غلبہ پا لینے کی فطری خواہش سے ہے ۔

بے موقع اور بے محل قسم کی درگزر اور (چشم پوشی سے) زندگی کا خون ٹھنڈا پڑ جاتا ہے ۔ (دوسرے لفظوں میں ایسی درگزر سے) زندگی کے عمدہ شعر میں ایک سکتہ پیدا ہو جاتا ہے ۔

جو کوئی بھی ذلت و پستی کے گڑھے میں گرا ہوا ہے وہ اپنی کمزوری اور ناتوانی کو صبر و قناعت کا نام دے دیتا ہے ۔

حالانکہ کمزوری اور ناتوانی زندگی کے راستے کی قراق اور رہزن ہے ۔ اس کا باطن ڈر اور جھوٹ سے پر ہے ۔ یعنی اس کے باطن سے ڈر اور جھوٹ پیدا ہوتے ہیں ۔

اس کا اندر (باطن، دل) اچھے اوصاف سے بالکل خالی ہوتا ہے ۔ اس (ناتوانی) کا دودھ بری باتوں کے موٹاپے (یعنی اضافے) کا باعث ہے(اس کے دودھ سے برائیاں پرورش پا کر موٹی ہوتی ہیں ) ۔

اے عقل سلیم رکھنے والے خبردار رہ یہ دشمن ( ہر وقت) گھات میں رہتا ہے ۔

اگر تو عقل مند ہے تو اس کا فریب کبھی نہ کھا اس لیے کہ یہ تو گرگٹ کی طرح ہر گھڑی اور ہر لمحہ رنگ بدلتی رہتی ہے ۔

اہل نظر نے کمزوری اور ناتوانی کی اصل صورت نہیں دیکھی ۔ اس کے چہرے پر رنگ رنگ کے پردے ڈال دیئے ۔

چنانچہ کبھی تو رحم اور نرمی اس کی پردہ داری کرتی ہے اور کبھی وہ عاجزی و مسکینی کی چادر اوڑھ لیتی ہے ۔

کبھی وہ مجبوری کے پردے میں چھپ جاتی ہے اور کبھی معذوری کی تہ میں چھپ جاتی ہے ۔

اس نے تن آسانی کے پردے میں اپنا چہرہ نمایاں کیا اور اس طرح صاحب قوت کا دل چھین لیا ۔

لیکن قوت اور توانائی سچائی کی جڑواں ہے ۔ اگر تو اپنی ذات حقیقت سے آگاہ ہو جائے تو پھر یہی جمشید کا پیالہ ہے ۔

زندگی کھیتی ہے اور اس کی فصل قوت ہے ، حق اور باطل میں جو بھید ہے قوت اس کی رمز یا شرح ہے ۔

اگر کوئی دعویٰ کرنے والا قوت کے دولت سے مالامال ہے تو اس کے دعویٰ کے اثبات کے لیے کسی دلیل یا ثبوت کی ضرورت نہیں رہتی ۔

باطل، قوت کی بدولت حق کی سی شان پیدا کر لیتا ہے اور حق کو باطل کہہ کر خود کو حق جاننے لگتا ہے ۔

اس کے کن (حکم) سے کوثر، زہر میں تبدیل ہو جاتی ہے وہ خیر کو شر کا نام دے کر اسے شر بنا دیتا ہے ۔

اے (انسان) تو امانت کے آداب سے نا آشنا ہے تو اپنے آپ کو دونوں جہانوں سے بہتر سمجھ (یعنی تو اشرف المخلوقات ہے، تجھے سب سے بلند درجہ عطا کیا گیا ہے) ۔

تو زندگی کے اسرار و رموز سے واقفیت حاصل کر اور خدا کے سوا جو کچھ ہے اس کے معاملے میں ظالم و جاہل ہو جا(اپنے آپ کو خداکے کاموں کے لیے وقف کر دے) ۔

اے عقلمند تو اپنے کان، ہونٹ اور آنکھیں کھول پھر اگر اس کے باوجود تجھے حق و صداقت کی راہ نظر نہ آئے تو اس وقت مجھ پر ہنس ۔