بخش 12 - حکایت نوجوانی از مرو که پیش حضرت سید مخدوم علی هجویری رحمة الله علیه آمده از ستم اعدا فریاد کرد

ہجویر کے سید اور مسلمانوں کے مخدوم (حضرت علی ہجویری) جن کا مزار حضرت معین الدین چشتی سنجری کے لیے ایک مقدس مقام تھا (انھوں نے اس مزار پر چلہ کشی کی) ۔

انھوں نے پہاڑوں کے کٹھن راستے آسانی سے طے کیے اور ہندوستان پنجاب کی سرزمین میں انھوں نے سجدے کا بیج بویا (اسلام کی تبلیغ کی) ۔

ان کے جمال سے حضرت عمر فاروق کے دور (عہد) کی یاد تازہ ہو گئی ۔ ان کی باتوں (تبلیغ) سے دین حق کا شہرہ عام ہو گیا ۔

حضرت، قرآن کریم کی عزت کے مخافظ تھے ۔ ان کی نگاہ سے باطل (کفر و شرک) کے گھروندے ویران ہوتے گئے ۔

پنجاب کی سرزمین ان کے دم سے زندہ ہو گئی ۔ ہماری صبح ان کے آفتاب سے منور ہو گئی ۔

وہ دین حق کے عاشق بھی تھے اور عشق کے ہمہ وقت تیز رفتار قاصد بھی ، ان کی پیشانی سے عشق کے بھید آشکار (بے نقاب) تھے ۔

میں ان کے ولی کامل ہونے کی ایک داستان بیان کرتا ہوں اور یہ اس طرح کہ میں ایک کلی میں ایک پورا باغ سمو رہا ہوں ۔

ایک نوجوان جس کا قد سرو سہی کی طرح بلند تھا (ایران کے ایک ) شہر مرو سے لاہور آیا(داخل ہوا) ۔

وہ (حضرت علی ہجویری) کی بلند مرتبہ شخصیت کی خدمت اقدس میں حاضر ہوا تاکہ سورج اس کی تاریکی کو دور کر دے ۔

اس نے عرض کیا کہ حضرت میں دشمنوں کے درمیان گھرا ہوا ہوں ، میری حالت ایسی ہے جیسے صراحی پتھروں کے درمیان ہو ۔

اے آسمان کی سی بلندی والے مرتبے کی حامل ذات مجھے دشمنوں کے درمیان رہ کر کامیاب زندگی بسر کرنے کا طریقہ سکھایئے ۔

اس دانا مرشد نے جن کی ذات میں حسن و خوبی اور شفقت نے دبدبہ وغیظ کے ساتھ محبت کا عہد باندھ رکھا تھا ۔

حضرت نے فرمایا اے زندگی کے بھید سے نا آشنا انسان تو زندگی کے انجام اور آغاز سے بے خبر ہے ۔

تو غیروں کا وسوسہ دل سے نکال دے، بے نیاز ہو جا، تو ایک سوئی ہوئی قوت ہے جاگ اٹھ (بیدار ہو جا) ۔

(دیکھو) پتھر جب خود کو شیشہ سمجھ لیتا ہے تو وہ شیشہ ہی بن جاتا ہے اور ٹوٹنا اس کی فطرت بن جاتی ہے ۔

اگر راستہ چلنے والے (مسافر) خود کو کمزور سمجھ لے تو اس نے اس باعث اپنی جان کی پونجی رہزن کے حوالے کر دی ۔ (حضرت علی ہجویری نے اس نوجوان کو خود میں قوت ارادی پیدا کرنے اور اپنی خوابیدہ صلاحیتوں کو بیدار کرنے اور بروئے کار لانے کا سبق مختلف استعاروں میں دیا ہے جو عام فہم اور واضح ہیں ) ۔

تو کب تک اپنے آپ کو پانی اور مٹی سمجھتا رہے گا، اٹھ اور اپنی مٹی سے طور کا سا شعلہ پیدا کر ۔

اپنوں سے ناراض ہونا، کس کی خاطر دشمنوں کی شکایت کرتے رہنا کیوں ، کس لیے

میں سچ کہتا ہوں کہ دشمن بھی (حقیقت میں ) تیرا دوست ہے ۔ اس کا وجود تیری زندگی کے بازار کی رونق اور گرمی سرچشمہ ہے ۔

جو کوئی خودی کے مقامات سے آگاہ ہے وہ اپنے طاقتور دشمن کو خدا کا فضل و کرم جانتا ہے ۔

دشمن تو انسان کی کھیتی کے لیے بادل کی حیثیت رکھتا ہے ۔ وہ (دشمن ) انسان کے ممکنات کو نیند سے بیدار کرتا ہے (انسان کی تمام سوئی ہوئی قوتیں جاگ اٹھتی ہیں ) ۔

اگر انسان کا حوصلہ مضبوط اور ہمت پختہ ہو تو راستے کا پتھر اس کے لئے پانی بن جاتا ہے (اس کی مثال اسی طرح ہے جس طرح) سیلاب کے لیے راستے کی نشیب و فراز کوئی اہمیت نہیں رکھتے ۔

راستے کا پتھر عزم و ہمت کی تلوار کے لیے سان بن جاتا ہے ۔ کٹھن راستوں کو کاٹنا مضبوط ارادے کی تلوار کی آزمائش ہے ۔

جانوروں کی طرح کھا پی کر لیٹنے رہنے سے کیا فائدہ ہے ۔ اگر تو اپنی ذات میں مضبوط و مستحکم نہیں ہے تو کیا فائدہ

جب تو خود کو خودی سے مضبوط مستحکم کر لے تو (اس قوت کی بدولت) اگر تو چاہے تو دنیا کو بھی تہہ و بالا کر ڈالے گا ۔

اگر تو فنا کا طالب ہے تو اپنی ذات (خودی) سے آزاد (بے تعلق ) ہو جا، اگر دوام (زندگی) کی خواہش ہے تو پھر تو اپنی ذات (خودی) میں آباد ہو جا ۔

مرنے سے کیا مراد ہے (یہی کہ) اپنی خودی سے غافل ہو جانا ۔ تو مرنے سے کیا مراد لیتا ہے، جان اور بدن کی ایک دوسرے سے دوری (الگ ہو جانے کا نام) ۔

تو حضرت یوسف علیہ السلام کی مانند خودی کو جائے قیام بنا لے (اور اس طرح) قیدی بننے سے شہنشاہی تک کے مرحلے طے کر لے (قید خانے سے اٹھ کر تخت شاہی پر پہنچ جائے گا ۔ ) ۔

خودی کے بارے میں غور و فکر کرا ور صاحب عزم و ہمت بن جا ۔ اس طرح مرد حق بن کر صاحب اسرار ہو جا (زندگی کے بھید خود بخود تجھ پر آشکار ہو جائیں گے ۔ ) ۔

میرے سینے میں جو راز ہے اس کی شرح کہانیوں کے ذریعے سے کروں گا ۔ کلی کو پھونک کے زور سے کھلاؤں گا(کلی کو پھول بناؤں گا) ۔

اچھی بات یہی ہے کہ دلبروں کی باتیں اور راز دوسروں کی باتوں یعنی اشاروں کنایوں میں بیان کی جائیں ( تو بہت دلکش دلاویز بن جاتے ہیں ) ۔ (آخری شعر مولانا روم کی مثنوی کا ہے) ۔