بخش 3 - دربیان اینکه حیات خودی از تخلیق و تولید مقاصد است

زندگی کا وجود مقصد پر موقوف ہے اس (زندگی) کے قافلے میں مقصد کو جرس کی حیثیت حاصل ہے ۔

زندگی تلاش و جستجو میں پوشیدہ ہے اس کی اصل و اساس آرزو میں چھپی ہوئی ہے ۔

تو اپنے دل میں آرزو کو زندہ رکھ، تاکہ بصور ت دیگر تیری یہ مٹھی بھر خاک مزار کی صورت اختیار نہ کر جائے ۔

آرزو اس کائنات رنگ و بو کی جان ہے ۔ ہر شے کی فطرت آرزو کی امانت دار ہے ۔

تمنا و آرزو ہی سے دل سینوں میں دھڑکتے ہیں اور سینے، اسی آرزو کی بدولت چمک کر آئینے بنتے ہیں ۔

آرزو خاک میں پرواز کی قوت پیدا کر دیتی ہے ۔ یہ عقل و شعور کے موسیٰ کے لیے خضر (رہنما) بن جاتی ہے ۔

دل کی آرزو کی تپش ہی سے بقا میسر آتی ہے اور جب اسے حیات حاصل ہو جاتی ہے تو پھر ماسوا، یعنی اللہ کے سوا جو کچھ ہے مٹ جاتا ہے ۔ گویا آرزو کی تخلیق سے محروم ہو جانا انسان کی موت ہے ۔

جب وہ (دل) آرزووَں کی تخلیق سے رک گیا تو سمجھ لو کہ اس کا بڑا پر ٹوٹ گیا اور وہ پرواز کے قابل نہ رہا (مردہ ہو گیا) ۔ سوز آرزو کو دل کی زندگی کا باعث ٹھہرایا گیا ہے علامہ نے اردو میں ایک جگہ کیا خوب کہا ہے ۔ دل مردہ دل نہیں ہے اسے زندہ کر دوبارہ کہ یہی ہے امتوں کے مرض کہن کا چارہ

آرزو ہی خودی کیلیے ہنگامے آراستہ کرتی ہے ۔ اسے خودی کے سمندر کی ایک بے قرار موج سمجھنا چاہیے ۔

آرزو، مقاصد کے شکار کو پھانسنے والی کمند ہے (بلند مقاصد کے لیے کمند ہے) وہ کاموں اور کارناموں کی کتاب کی جز بندی کرنے والی ہے ۔

جب کوئی زندہ انسان آرزو اور تمنا سے خالی ہو تو وہ گویا مردہ ہو گیا ( اس کی مثال ) اس شعلے کی سی ہے جس میں جب جلنے کی کیفیت اور حرارت کم ہو جائے تو وہ بجھ جاتا ہے ۔ اس کی ہستی ختم ہو جاتی ہے ۔

ہماری بیدار یعنی دیکھتی آنکھوں کی اصل یا حقیقت کیا ہے یہی کی ہمارے دیدار کی لذت اور ذوق نے ( ان آنکھوں کی) شکل اختیار کر لی ۔

چکور کو جو پاؤں میسر آئے تو وہ اس کی چال کے البیلے پن کا نتیجہ ہے ۔ بلبل کو جو چونچ ملی ہے تو وہ اس کے نغمے الاپنے کے جذبے کا نتیجہ ہے ۔ گویا شوخی رفتار نہ ہوتی تو چکور کو پاؤں نہ ملتے اور نوا پرائی کا ذوق نہ ہوتا تو بلبل چونچ سے محروم رہتی ۔

بانسری نے اپنے جنگل سے باہر آ کر اپنی آبادی کا سروسامان کیا اور اس طرح اس میں مقید نغمہ آزاد ہو گیا ۔

یہ نت نئے انوکھے کام کرنے کی کوشش میں مصروف اور آسمان تک پرواز کرنے والی عقل کیا ہے کیا تجھے کچھ علم ہے کہ یہ کیا اعجاز ہے

زندگی نے آرزووَں کا سرمایہ فراہم کر لیا اور عقل بھی زندگی کے بطن سے پیدا ہوئی ۔

یہ قوم کی تنظیم، یہ اس کے دستور اور طور طریقے کیا ہیں ۔ علوم کا تروتازہ رہنا اور نت نئے علوم کا وجود میں آنا کیا ہے یہ سب آرزووَں کے کرشمے ہیں ۔

آرزوئیں پوری طاقت سے اچھل کر راہ پیدا کرنے کی کوشش کرتی ہیں اسی اچھلنے میں ٹوٹ جاتی ہیں ۔ پھر دل سے باہر نکل کر مختلف صورتیں اختیار کر لیتی ہیں ۔

ہاتھ اور دانت اور دماغ اور آنکھ اور کان، فکر و تخیل ، شعور اور حافظہ اور دانش (یہ سب کیا ہیں ، حقیقت یہ ہے کہ)جب زندگی نے میدان جنگ (عمل) میں گھوڑا دوڑایا تو اپنی حفاظت کے لیے اس نے یہ ہتھیار تیار کر لیے ۔

زندگی نے جب اپنا گھوڑا میدان جنگ میں دوڑایا ، تو یہ سب آلات اپنی حفاظت کے لیے بنائے۔

ترجمہ: میاں عبدالرشید

علم و فن کا مقصد، محض آگاہی یا معلومات حاصل کرنا نہیں ہے اور نہ چمن کو وجود میں لانے کا مقصد پھول اور کلیاں حاصل کرنا ہے ۔

علم تو زندگی کی حفاظت کے اسباب میں سے ہے، علم تو خودی کو مستحکم کرنے کا ایک ذریعہ ہے ۔

علم اور فن تو زندگی کے خدمت گار اور اسکے غلام ہیں ۔ (ان اشعار میں فن برائے فن اور فن برائے زندگی کا فرق بیان کیا گیا ہے) ۔

اے (وہ آدمی) تو جو زندگی کے راز سے ناواقف ہے، بیدار ہو جا اورر مقصد کی شراب پی کر مستی کے عالم میں اٹھ کھڑا ہو(مستی کی کیفیت طاری کر لے) ۔

وہ مقصد ایسا ہو جو صبح کی طرح روشن ہو، جو غیر اللہ جلا کر راکھ کر دینے والا ہو ۔ اللہ کی خوشنودی کے سوا کوئی دوسرا مقصد نہیں ہونا چاہیے ۔

ایسا مقصد جو آسمان سے بھی بلند تر ہو، جو دل کو لبھانے ولا، بہت ہی دل پذیر اور بہت ہی دل کش ہو ۔

ایسا مقصد جو قدیم باطل کر فنا کر دے ۔ اس کے گریبان میں قیامت کے ہنگامے موجود ہوں ۔

نت نئے مقصد پیدا کرتے رہنے ہی میں ہماری زندگی ہے، آرزو ہی کی کرن سے ہمیں چمک دمک نصیب ہے ۔