بخش 2 - در بیان اینکه اصل نظام عالم از خودی است و تسلسل حیات تعینات وجود بر استحکام خودی انحصاردارد

عالم موجودات خودی کے نشانوں میں سے ایک نشان ہے تو جو کچھ یہاں دیکھ رہا ہے اس کا تعلق خودی کے اسرار سے ہے(خودی کے رازوں کا کرشمہ ہے) ۔

جب خودی نے اپنے آپ کو جگایا تو اس نے عالم کبریائی کو آشکار کردیا ۔

اس کی ذات میں سینکڑوں عالم چھپے ہوئے ہیں ۔ اس کے ثبات ہی سے اس کا ماورا ظاہر ہے ۔ (جب خودی تعین کرتی ہے اور اس طرح اپنا ثبات و قیام چاہتی ہے تو غیر پیدا ہو جاتا ہے ۔ ) ۔

اس (خودی) نے اس کائنات میں دشمنی کا بیج بو دیا اور اپنے آپ کو اپنا غیر سمجھ لیا ۔

وہ اپنی طرف سے یا اپنی ذات سے غیروں کے وجود تیار کرتی ہے تاکہ پیکار کی لذت میں اضافہ ہو جائے ۔

وہ اپنے بازو کی قوت سے غیروں کو مار ڈالتی ہے تاکہ وہ اپنی طاقت اور توانائی سے آگا ہ ہو ۔

اس کی خود فریبیاں سراسر زندگی ہیں ۔ گلاب کی طرح خون سے وضو کرنا سراسر زندگی ہے ۔

ایک حسب منشا پھول کی خاطر وہ بیشمار گلشنوں کو اجاڑ دیتی ہے ۔ (سینکڑوں گلشنوں کا خون کر ڈالتی ہے) ایک نغمے کی ترتیب کے لیے سینکڑوں ماتم کرتی ہے ۔

ایک آسمان پر وہ (خودی، خدا کی خودی مطلق) سینکڑوں ہلا ل لائی ہے ۔ (طلوع کئے یا پیدا کئے ہیں ) ایک حرف (مطلب) کی خاطر اس نے سینکڑوں باتیں تخلیق کی ہیں ۔

اس ٖفضول خرچی اور سنگ دلی کا سبب اصل میں تخلیق کائنات اور جمال حقیقی کی تکمیل ہے

شیریں کا حسن وجمال فرہاد کے درد کا بہانہ بنا ہے تو ایک نافہ سینکڑوں ختنی ہرنوں کی ہلاکت کا سبب ہے ۔

مسلسل جلتے رہنا پروانہ کا مقدر ٹھہرا اور شمع پروانوں کے دکھ درد کا سبب بنی ۔

اس کے قلم نے سینکڑوں امروزوں کی تصویریں بنائیں تا کہ آنے والے کل کی صبح کو حاصل کر لے ۔

اس ( اناے مطلق یا خودی مطلق) نے سینکڑوں ابراہیم آگ میں جھونک دیے ہیں تب کہیں ایک محمد ﷺ کا چراغ روشن کیا ۔

وہ عمل کے مقاصد کی خاطر کبھی عامل (عمل کرنے والی) بن جاتی ہے اور کبھی معمول (جس پر عمل کیا گیا) اور کبھی وجوہات اور کبھی علتیں بن جاتی ہے(مختلف روپ دھارنے پڑتے ہیں ) ۔

وہ اٹھتی ہے، اچھلتی ہے، اڑتی ہے، چمکتی ہے چھلانگیں لگاتے ہوئے دوڑتی ہے ، چلتی ہے، روشن کرتی ہے، مار ڈالتی ہے، مر جاتی ہے اور پھوٹتی ہے(یہ سب مختلف روپ دھارتی ہے)۔

ساری کائنات کا پھیلاوَ اس کی دوڑ کا میدان ہے، آسمان اس کے راستے کی گرد کی ایک لہر ہے ۔

کائنات نے اس کی گل کاری کے سبب دامن میں پھول سمیٹ رکھے ہیں ۔ رات اس کی نیند کا اور دن اس کی بیداری کا نام ہے ۔

اس (خودی مطلق یا ذات خداوندی) نے اپنے شعلے کو چھوٹی چھوٹی چنگاریوں میں بانٹ دیا ۔ اس طرح عقل کو جز ہی پر توجہ رکھے رہنے کی تعلیم کی (اور عقل کو جزو پرستی کی تعلیم دی) ۔

اس نے اپنی ذات کو توڑ کر حصے یا اجزا پیدا کر لیے کچھ دیر کے لیے وہ بکھری (اپنے آپ آشفتگی طاری کی) تو صحرا کی صورت پیدا کر دی ۔

پھر وہ اس منتشر بکھری حالت سے بیزار ہو گئی اور اپنی ذات میں سمٹ کر پہاڑ کی صور ت اختیار کر گئی ۔ تمام اجزاء نئے سرے سے ایک دوسرے کے ساتھ پیوست ہو گئے اور پہاڑ نمودار ہوئے ۔

اپنے آپ کو نمایاں کرنا خودی کی عادت یا فطرت ہے ، ہر ذرے میں خودی کی قوت سوئی ہوئی ہے ۔

(خودی ایک) خاموش قوت ہے اور کچھ نہ کچھ کرتے رہنے کے لیے بے قرار رہتی ہے ، وہ عمل کی غرض سے اسباب عمل کی پابند ہو جاتی ہے ۔

چونکہ کائنات کے وجود کے برقرار رہنے کا انحصار خودی کی قوت پر ہے (کائنات کی زندگی خودی کے بل پر قائم ہے) اس لیے خودی جس قدر مضبوط ہو گی، زندگی اسی قدر مستحکم ہو گی ۔

جب پانی کی ایک بوند خودی کا حرف یاد(حفظ) کر لیتی ہے یعنی اس میں خودی پیدا ہو جاتی ہے تو وہ اپنے بے حقیقت وجود کو موتی بنا لیتی ہے ۔

شراب اپنی خودی کی کمزوری کے سبب قالب سے عاری ہے (اس کی اپنی کوئی شکل نہیں ) وہ ہر پیالے یا ظرف کا احسان گوارا کر لیتی ہے اور اسی کی شکل میں ڈھل جاتی ہے ۔

گرچہ شراب کا پیالہ قالب قبول کرتا ہے یعنی اس کا قالب یا جسم ہے لیکن خود گردش نہیں کر سکتا وہ اپنی گردش ہم سے قرض لیتا ہے ہمارا محتاج ہے ۔ (پیالے کی خودی شراب سے زیادہ مستحکم ہے) ۔

پہاڑ جب اپنی ذات یا خودی سے غافل ہو جاتا ہے تو وہ بکھر کر صحرا کی صورت اختیار کر جاتا ہے اور سمندر کے طوفان کی شکایت کرنے لگتا ہے ( اس پر جو مصیبت آئی وہ خودی کو کمزور کر لینے کی وجہ سے آئی نہ اس کی خودی کمزور ہوتی نہ وہ ذروں میں بکھرتا اور نہ صحرا بنتا جب تک پہاڑ تھا، طغیانی یا تختہ مشق بن ہی نہیں سکتا تھا ۔ )

موج جب تک آغوش بحر میں موج کی صور ت ہے سمندر کے اندر ہے (یعنی وہ اپنی خودی سے باخبر ہے) وہ اپنے آپ کو سمندر کے کندھوں پر سوار رکھتی ہے ۔

نور (روشنی) نے ایک گھیرا یا دائرہ بنا لیا (خود کو مجتمع کیا) تو آنکھ بن گیا اور وہ آنکھ جلووَں میں سرگرم ہو گئی ۔

سبزے نے جب اپنے اندر آگ آنے کی قوت پیدا کر لی تو اس کی ہمت نے باغ کا سینہ چیرا اور باہر نکل آیا ۔

شمع نے آپ ہی زنجیر میں جکڑ لیا (اپنے دھاگے پر خود کو لپیٹ لیا) اس نے اپنی تعمیر ذروں سے کی (اس کی ہستی کا سروسامان فراہم ہو گیا) ۔

اس (شمع یا موم بتی) نے اپنے آپ کو پگھلانے کا شغل اختیار کر کے اپنی ہستی کھو دی اور آخر آنسووَں کی صورت اپنی آنکھ سے ٹپک پڑی ۔

اگر نگین اپنی فطرت میں زیادہ پختہ ہوتا تو وہ رگڑائی اور چھلائی کے زخموں سے محفوظ رہتا ۔

وہ (نگین) دوسرے کے نام کا سرمایہ دار تو بن جاتا ہے ( اس پر نام کنندہ کیا جاتا ہے) لیکن غیر کے نام کے بوجھ سے اس کا کندھا زخم کھاتا ہے ۔

چونکہ زمین نے اپنی ہستی یعنی خودی مضبوط رکھی ہے اس لیے چاند اسکے گرد مسلسل چکر لگانے کا پابند ہو گیا ہے ۔

سورج کی خودی زمین کی خودی سے زیادہ مضبوط ہے لہذا زمین مشرق کی آنکھ یعنی سورج کی گرویدہ ہے یعنی اس کے گرد چکر لگانے لگی ۔

چنار کے درخت کی دل کشی پلکیں جھپکنے کی فرصت نہیں دیتی (انسان کی آنکھ کھلی کی کھلی رہ جاتی ہے) پہاڑ اس (چنار) کی شان و شوکت سے مالا مال ہے (اس کی سطوت اپنی دولت سمجھتے ہیں ) ۔

اس (چنار) کے لباس کا تانا بانا آگ ہے جبکہ اس کی اصل ایک گردن کش بیج ہے ۔ (جس میں گردن اونچی رکھنے کی ہمت ہے) ۔

جب خودی زندگی کی قوت و طاقت متجمع کر لیتی ہے تو وہ زندگی کی ندی سے ایک بے کراں سمندر جاری کر دیتی ہے ۔