بخش 1 - تمهید

جب دنیا کو روشن کرنے والے سورج نے رات کو لوٹ لیا (صبح ہو گئی) تو میرے آنسووَں نے پھول کے چہرے پر پانی مل دیا ۔

میرے آنسووَں نے گل نرگس کی آنکھوں سے نیند دھو ڈالی ۔ سبزہ میرے شور شرابے کے باعث بیدا رہو کر اگ پڑا ۔

باغبان نے میری شاعری کے زور کو آزمایا، اس نے ایک مصرع بویا اور ایک تلوار کاٹی ۔ (میرے ہر مصرعہ میں تلوار کے جوہر درخشان تھے) ۔

اس نے باغ میں میرے آنسو کے بیج کے سوا اور کچھ نہ بویا، اور میری آہ و فغاں کا تانا باغ کے بان میں بنا ۔ پیوند کر دیا ۔

اگرچہ میں ذرہ ہوں لیکن اس زمانے کو روشن کرنے والا سورج میرا ہے ۔ سینکڑوں صبحیں میرے گریبان میں ہیں ۔

میری خاک جام جم سے بھی زیادہ روشن ہے( اس لیے کہ جام میں تو دنیا کے صرف موجودہ حالات دیکھے جا سکتے تھے) لیکن میری ذات کائنات کے ان حالات سے بھی واقف ہے جو ابھی تک عالم ظہور میں نہیں آئے ۔

میری قوت فکر نے اس ہرن کو اپنے شکار بند میں باندھ لیا ہے جس نے ابھی تک عدم سے باہر قدم نہیں رکھا ۔ ( میں وہ حقائق پیش کرنے والا ہوں جو پہلے کسی شاعر کو نصیب نہ ہوئے) ۔

جو سبزہ ابھی تک اگا نہیں وہ میرے باغ کے لیے زیب و زینت کا سامان بنا ہوا ہے ۔ وہ پھول جس کا وجود ابھی ٹہنی کے اندر ہی ہے وہ میرے دامن میں پہنچ گیا ہے ۔

میں نے ساز و نغمہ کی محفل درہم برہم کر دی ۔ میں نے کائنات کی رگ کے تار پر مضراب لگائی ہے (دوسرے شاعر صرف عیش و نشاط کا سامان بہم پہنچاتے ہیں ۔ میں زندگی کے حقائق سے پردہ اٹھا رہا ہوں ) ۔

میری فطرت کے باجے کا نغمہ بہت ہی انوکھی قسم کا ہے لیکن میرے رفیق میرے اس نغمے سے ناواقف ہیں ۔

میں دنیا میں نیا نیا وجود میں آیا ہوا سورج ہوں ۔ پرانے سورج کے برعکس (آسمان) کے طور طریقے میری نظروں سے نہیں گزرے ہیں ۔

ستاروں نے میرے سورج کی روشنی سے بھاگنا شروع نہیں کیا ۔ ابھی میرا پارا قرار پکڑے ہوئے ہے ۔ ابھی اس میں تڑپ اور بے قراری پیدا نہیں ہوئی ۔

ابھی تک سمندر میری روشنی کے رقص سے بے بہرہ ہے ۔ پہاڑ میری مہندی کے رنگ سے محروم ہے ۔

ہست و بود (زمانے) کی آنکھ مجھے دیکھنے کی ابھی عادی نہیں ہوئی، میں اظہار کے خوف سے کانپ اٹھتا ہوں ۔

میری صبح مشرق سے طلوع ہوئی اور رات بھاگ گئی (رات کا اندھیرا ختم ہوا) دنیا کے پھول پر تازہ شبنم آ گری ۔

میں صبح سویرے بیدار ہونے والوں (عابدوں ، کلام کا اثر لینے والوں ) کا انتظار کر رہا ہوں ۔ میری آگ کے پجاریوں کا کیا کہنا یا میری آگ کے پجاری کتنے مبارک ہیں ۔ ( جو میری روشن کی ہوئی آگ کی طرف اسی طرح کھچے چلے آ رہے ہیں جس طرح زرتشتی صبح سویرے آتش کدے کی طرف جاتے ہیں ۔

میں ایک ایسا نغمہ ہوں جو مضراب سے بے نیاز (مجھے مضراب کی ضرورت نہیں ) میں مستقبل کے شاعر کی نوا ہوں ۔

میرا زمانہ اسرار (رازوں ) سے آگاہ نہیں ۔ میرا یوسف اس بازار کے لیے نہیں ہے ۔ (میرا یوسف اس بازار کی صحیح قیمت نہیں پا سکتا) ۔

اپنے پرانے رفیقوں سے میں مایوس ہوں میرا طور جل رہا ہے کہ شاید اس کے لیے بھی کوئی کلیم آئے ۔

یاروں کا سمندر شبنم کی طرح طوفان سے عاری ہے جب کہ میری شبنم سمندر کی طرح طوفان آغوش میں لیے ہوئے ہے ۔

میرے گیت کا تعلق کسی دوسری دنیا سے ہے (نئی دنیا کی خوشخبری سناتا ہے) یہ گھنٹی کسی اور ہی قافلے سے متعلق ہے ۔

اے کہ اکثر ایسا ہوا ہے کہ کوئی شاعر اپنی موت کے بعد پیدا ہوا ہے( یا اکثر شاعر اپنے مرنے کے بعد پیدا ہوئے ہیں ) ۔ اس نے اپنی آنکھ بند کر لی اور ہماری آنکھیں کھول دیں ۔ (یعنی وہ خود تو مر گئے لیکن ہماری آنکھیں کھول گئے)

ایسا شاعر عدم سے اپنا سامان ناز باہر لے آیا وہ اپنے مزار کی مٹی سے پھول کی مانند پھوٹ پڑا ۔ (شاید میرے لیے بھی یہی مقدر ہے) ۔

اگرچہ اس صحرا سے کئی قافلے گزر چکے ہیں لیکن وہ سب اونٹنی کے قدموں کی طرح کسی آہٹ اور چاپ کے بغیر ہی گزر گئے( ان کے چلنے کی آواز کسی کے کان تک نہ پہنچی، کسی کو احساس تک نہ ہوا کہ انھوں نے کیا کہا اور کیا کر گئے) ۔

میں محض شاعر نہیں ، میں عاشق ہوں ، فریاد کرنا میرا ایمان ہے ۔ محشر کا شور میرے نقیبوں میں سے ہے ۔

میرا نغمہ تار کی گنجائش سے بڑھ کر ہے ، میں اپنے ساز کی ٹوٹ پھوٹ سے نہیں ڈرتا ۔ ( میں نغمہ ضرور سناؤں گا اگرچہ اس وجہ سے میرا ساز ٹوٹ بھی جائے تو مجھے پرواہ نہیں ) ۔

قطرہ میرے طوفان سے نا آشنا ہی رہے تو اچھا ہے ۔ سمندر کے لیے یہی بہتر ہے کہ وہ میرے طوفان سے دیوانہ ہو جائے ۔ (دیوانگی کی کیفیت طاری کر لے) ۔ قطرہ سے مراد کم ہمت اور فرومایہ افراد ہیں ۔ سمندر سے اشارہ ان لوگوں کی طرف ہے جو ہمت اور جوش عمل کے پیکر ہوں ۔

میرا سمندر کسی چھوٹی ندی میں نہیں سما سکتا؛ میرے طوفان کو سنبھالنے کے لیے کئی سمندر چاہئیں۔

ترجمہ: میاں عبدالرشید

وہ کلی جو نشو ونما پاتی ہوئی گلشن کی صورت اختیار نہیں کر سکتی وہ میرے ابر بہار سے فیض پانے کے لائق نہیں ۔

میری جان میں بجلیاں سوئی ہوئی ہیں ۔ پہاڑ اور صحرا تو میری جولانگاہ کا دروازہ ہیں ۔

اگر تو صحرا ہے تو پھر میرے سمندر سے پنجہ آزمائی کر، میری بجلی سے خود کو روشن کر لے اگر تو کوہ طور ہے ۔ (میری بجلی اپنے رگ و پے میں سمیٹ لے) ۔

قضا و قدر نے آب و حیات کا چشمہ میرے نصیب میں لکھ دیا ہے ۔ مجھے انھوں نے راز حیات سے آشنا کر دیا ہے ۔

میری نوا کے سوز سے ذرے کو زندگی مل گئی اس (ذرے) نے بال و پر نکالے اور وہ جگنو بن گیا ۔

وہ راز جو میں ظاہر کر رہا ہوں کسی نے بھی ظاہر نہیں کیا ، کسی نے بھی میرے فکر کی مانند معنی کا موتی نہیں پرویا ۔

تو ہمیشہ کی زندگی کا بھید جاننا چاہتا ہے تو میرے پاس آ، اگر زمین اور آسمان کا بھی تو طالب ہے تو آ ( یہ سب نعمتیں تجھے مل جائیں گی) ۔

یہ اسرار مجھے بوڑھے آسمان یعنی قضا و قدر نے بتائے ۔ دوستوں اور رفیقوں سے راز بھید چھپائے نہیں جا سکتے ۔

اے ساقی اٹھ اور شراب جام میں ڈال، اس طرح زمانے کے غم و رنج میرے دل سے دور کر دے ۔

ایسے پانی کا شعلہ عطا کر جس کا سرچشمہ زمزم ہے اگر وہ گدا ہو تو جمشید جیسا بادشاہ اس کا عقیدت مند یا غلام ہو ۔

جو قوت فکر میں اور تیزی پیدا کر دے اور جاگتی ہوئی آنکھوں کو اور زیادہ بیدار کر دے ۔

جو تنکے کو پہاڑ کی سی عظمت بخش دے ، جو لومڑی کو شیروں کی سی طاقت عطا کر دے ۔

جو خاک کو ثریا کی بلندی پر پہنچا دیتی ہے جو قطرے میں سمندر کی سی وسعتیں پیدا کر دیتی ہے ۔

جو خاموشی کو شور محشر کی صور ت د ے دے، جو چکور کے پنجے کو باز کے خون سے سرخ کر دے ۔

اے ساقی اٹھ اور میرے جام میں خالص شراب ڈال دے ۔ میری قوت فکر کی رات پر چاندنی بکھیر دے ۔ یعنی اسے نور سے چمکا دے ۔

تا کہ میں بھٹکے ہوئے (مراد بھٹکی ہوئی قوم) کو منزل (مقصود) کی طرف لے چلوں اور نظارے کو بیقراری کا ذوق پیدا کر دوں ۔

نئی جستجو کی تڑپ میں تیز رفتار ہو جاؤں اور ایک نئی آرزو سے آگاہ ہو جاؤں ۔

میں اہل ذوق (مراد جن کے دلوں میں ملت کا درد ہے) کی آنکھوں کی پتلی بن جاؤں ۔ آواز کی مانند دنیا کے کانوں میں گم ہو جاؤں ۔

شاعری کی جنس کی قیمت بڑھا دوں اور اپنے آنسو سامان تجارت میں رکھ دوں ۔

میں پیر روم (مولانا رومی) کے فیض سے پھر وہ دفتر دنیا کو سنا دوں جس میں علوم کے اسرار بند ہیں ۔ علوم کے رازوں کی سربمہر کتاب پھر پڑھوں ۔

مولانا کی جان تو دل کی تپشوں سے مالامال ہے ۔ (اپنے اندر شعلوں کا خزانہ لیے ہوئے ہے) جبکہ ان کے مقابلے میں میری حیثیت چنگاری کی مانند اس روشنی کی سی ہے جو ادھر چمکی ادھر بجھ گئی ۔

جلتی ہوئی شمع میرے پروانے پر چڑھ دوڑی ۔ شراب نے میرے جام پر شب خون مار ۔

پیر رومی نے خاک کو (علامہ کو جن کی حیثیت کچھ نہ تھی) اکسیر بنا دیا (انہیں باطنی طور پر جذب اور صاحب مقام بنا دیا) اور میرے غبار سے کئی جلوے تعمیر کئے ۔

ذرے نے صحرا کی خاک سے اپنا سامان سمیٹا تا کہ وہ سور ج کی کرن ہاتھ میں لے سکے ۔

میں لہر ہوں اور اس (پیر روم ) کے سمندر میں بسیرا کرتی ہوں تا کہ میں چمکتا ہوا موتی حاصل کر لوں ۔

میں جو اس کی شرابوں کی بدولت سرمستیوں میں کھویا ہوا ہوں ، اسی کے سانسوں سے زندگی بسر کر رہا ہوں ۔

رات میرادل فریاد پر مائل تھا میری یارب یارب کی پکار سے خاموشی میں بھی ایک شور سا تھا ۔ ( سب سور رہے تھے صرف میری زبان پر یارب یارب کی فریاد جاری تھی) ۔

میں زمانے کے دکھوں کا سخت شکوہ کر رہا تھا اپنے خالی پیمانے کی وجہ سے فریاد کناں تھا ۔ اشک بار تھا ۔

میں غور سے دیکھنے میں مصروف تھا کہ میری قوت بصارت گھٹ گئی، میرے بال و پر ٹوٹ گئے ، یعنی قوت پرواز جاتی رہی اور میں سو گیا ۔ (میری نگاہیں تڑپتے تڑپتے بال و پر توڑ بیٹھیں اور میں سو گیا ۔ )

(اسی اثنا میں ) حق کی فطرت رکھنے والے پیر (مولانا روم) خواب میں تشریف لائے ۔ وہ بزرگ جنھوں نے فارسی زبان میں قرآن لکھا ہے ۔ (جنھوں نے قرآن کے حقائق فارسی زبان میں پیش کئے ہیں ) ۔

انھوں نے فرمایا اے عشق والوں کے دلدادہ عشق کی خالص شراب سے تو بھی ایک گھونٹ پی لے ۔

تو اپنے جگر یعنی دل میں قیامت کا ہنگامہ برپا کر ، صراحی سر پر مار، آنکھیں نشتر پر مار (اور نشتر سے آنکھیں پھوڑ) دوسرے لفظوں میں عقل کو ایک طرف رکھ اور نظارے سے کام لینے کی بجائے عشق کو اپنا خضر راہ بنا ۔

ہنسی کو سیکڑوں نالوں کا سرمایہ بنا ۔ خون کے آنسووَں کو جگر کا ٹکڑا بنا ۔ خون کے آنسو اتنے سرخ ہوں گویا خون جگر کے ٹکڑوں سے نکل رہا ہو ۔

تو کب تک کلی کی طرح خاموش بیٹھا رہے گا، پھول کی طرح اپنی خوشبو ارزاں فروخت کر ، ہر طرف بکھیر دے ۔

تیرے دامن میں سپند کی طرح ہنگامہ موجود ہے تو اپنی محمل کی آگ پر باندھ ۔

جرس کی طرح تو اپنے بدن کے ہر حصے سے خاموش نالہ باہر پھینک ۔

تو آگ ہے ، دنیا کی محفل کو جگمگا دے، دوسروں کو بھی اپنے سوز سے پھونک ڈال ۔ جس جلن سے تو خود جل رہا ہے، اسی سے دوسروں کو بھی جلا کر رکھ دے ۔

پیر مے فروش کے راز کھول کر بیان کر دے ۔ شراب کی موج بن جا اور صراحی کا لباس پہن لے ۔

فکر و خوف کے شیشے کے لیے پتھر بن جا، شیشے کو چوراہے پر تو ڈال ۔ چکنا چور کر دے یعنی ر از چھپا کر نہ رکھ بلکہ ان کو سب کے سامنے کھول کر بیان کر دے ۔

نرکل کے جنگل سے بانسری کی مانند پیغام دے ۔ قیس کو قبیلہ حے کی طرف سے پیغام دے ۔

نالے آہ فغاں کے لیے نیا اندازہ ایجاد کر محفل کو ہائے و ہو سے آباد کر ۔

اٹھ اور زندہ شخص کو نئی جان عطا کر؛ لفظ '‍ قوم' کہہ کے زندوں میں اور زندگی بھر دے۔

ترجمہ: میاں عبدالرشید

اٹھ اور قدم ایک نئی راہ پر رکھ اپنے قدیم سودا کا ابال اپنے سر سے نکال دے ۔ (نئے مسلک کا کاربند ہو، پرانے مسلک سے کنارہ کش ہو جا) ۔

تو گفتار کی تاثیر سے آگاہ ہو جا، (بات کہنے اور پیغام پہنچانے میں بڑی لذت ہے) ۔ تو جو قافلے کے آگے آگے بجنے والی گھنٹی ہے، بیدا ر ہو جا ۔ (تیرا منصب یہی ہے کہ خود جاگ اور دوسروں کو جگا) ۔

اس (پیر روم) کی ان باتوں سے تو میں بڑا ہی مضطرب ہو گیا، بانسری کی طرح میں شور و غوغا سے پر ہو گیا ۔

میں اپنے باجے سے نغمے کی طرح پھوٹ پڑا، میں نے اپنے کانوں کے لیے ایک بہشت سجا لی ۔

میں نے خودی کے راز سے پردہ اٹھا دیا اور خودی کی کرامت کا بھید ظاہر کر دیا ۔

میرا وجود ایک ناتمام نقش تھا، جس کی حیثیت ایک بے رنگ خاکے کی تھی ۔ نہ کوئی اسے قبول کر سکتا تھا نہ اس میں کوئی خوبی تھی، نہ وہ کسی کام آ سکتا تھا ۔

عشق نے مجھ پر ریتی چلائی اور میں انسان ہو گیا، میں دنیا کے تمام احوال و اسرار کا جاننے والا بن گیا ۔

میں نے آسمان کے اندر جھانک کر اس کے نظام کا جائزہ لیا اور اس طرح چاند کی رگ میں خون کی گردش کا نظارہ کیا ہے(مراد چاند کے اندرونی نظام میں جھانک کر دیکھا ہے) ۔

انسان کے لیے میری آنکھیں کئی راتیں روتی رہیں ۔ جب کہیں جا کر میں نے ہستی کے رازوں کا پردہ چاک کر ڈالا(قدرت نے زندگی کے رازوں کا پردہ میرے لیے چاک کر دیا) ۔

ممکنات کے کارخانے کے اندر سے میں نے ہستی کی حقیقت کا بھید کھول دیا( بھید پا لیا) ۔

میں کہ جس نے اس رات کو چاند کی طرح آراستہ یا منور کیا ہے روشن ملت کے پاؤں کی خاک ہوں یعنی اسلام کا ایک انتہائی ادنیٰ فرد ہوں ۔

وہ ملت ایسی ہے جس کی شہرت باغ اور جنگل میں یعنی چہار دانگ عالم میں ہے، اس کے نئے نغموں سے دلوں کی آگ کا سامان پیدا ہوتا ہے ۔

(اس ملت نے) ذرہ بویا اور سورج حاصل کر لیا، جس کا کھلیان سینکڑوں رومیوں اور عطاروں سے بھرا پڑا ہے ۔

میں ایک گرم آہ ہوں ، آسمان کی طرف سفر کرتا ہوں ۔ اگرچہ میں دھواں ہوں ۔ آہ کو دھواں ہی قرار دیا جا سکتا ہے لیکن میرا تعلق آگ کے خاندان سے ہے ۔

میرے قلم نے فکر کی بلندی کے بل پر ان نو پردوں کے راز سب کے لیے کھول دیئے ( نو پروں سے مراد اصلاح ادب میں نو آسمان ہیں ) ۔

تا کہ قطرہ سمندر کا ہم پلہ ہو جائے اور ذرہ بڑھتے بڑھتے صحرا بن جائے ۔

میں نے جو یہ مثنوی لکھی ہے تو اس سے میرا مقصد کسی قسم کی شاعری کے کمالات دکھانا نہیں ۔ میں نہیں چاہتا کہ عا م شاعروں کی طرح بت بنا کر آراستہ کرتا جاؤں اور بت پرستی کی دعوت دیتا رہوں (الفاظ کی تراش، خراش، شعبدہ بازی فنی چابک دستی دکھانا میرا مقصود نہیں ہے) ۔ بلکہ میں قوم کی سربلندی کا طریقہ بتاتا ہوں َ

میں ہند کا رہنے والا ہوں ، فارسی زبان سے نا آشنا ہوں ۔ میں نیا چاند ہوں (یعنی جس طرح ہلال الٹے پیمانے کی طرح ہوتا ہے میں بھی اسی طرح ) خالی پیمانہ ہوں ۔

مجھ سے تو شاعرانہ انداز بیان کی خوبیاں مت مانگ میرے کلام میں خوانسار و اصفہان (بڑے بڑے شعرا کی سی فنی خوبیاں ) مت ڈھوند ۔

اگرچہ اردو زبان اپنی شیرینی اور مٹھاس کے لحاظ سے شکر جیسی ہے لیکن فارسی زبان اس سے کہیں زیادہ میٹھی ہے(فارسی کے طرز سخن میں زیادہ مٹھاس پائی جاتی ہے) ۔

میری فکر اس (یعنی فارسی زبان) کے جلوے سے مسحور ہو گئی ۔ اس جلوہ افروزی کی بدولت میر اقلم طور کے درخت کی شاخ بن گیا ۔

میرے افکار بہت بلند ہیں اور فارسی کی ان افکار کی فطرت سے بہت مناسبت ہے ۔

اے صاحب عقل و دانش تو صراحی پر اعتراض نہ کر( میری شاعری کی فنی کوتاہیوں کو نہ دیکھ) تو صراحی میں موجود شراب کے ذوق سے دل بستگی پیدا کر(اپنے دل کو شراب کی لذت سے وابستہ کر لے) ۔ -