بخش 17 - اندرز میر نجات نقشبند المعروف به بابای صحرائی که برای مسلمانان هندوستان رقم فرموده است

میر نجات بقشبند بظاہر ایک فرضی شخصیت ہے جس کے پردے میں اقبال نے اپنے افکار مسلمانوں کے سامنے پیش کئے ۔ قیاس ہے کہ اس سے خود علامہ کی اپنی ذات مراد ہے مطلب: اے (مسلمان) تو جو پھول کی صورت خاک سے پھوٹا ہے (تو نے نشوونما پائی ہے) تو بھی خودی ہی کے بطن سے پیدا ہوا ہے ۔

تو خودی کو نہ چھوڑ (خودی پر قائم رہ) اور اس طرح خود کو ایسا بنا لے جس کا انجام بقا پر ہو (دوام حاصل کر لے) تو ایک قطرہ بن جا اور سمندر پی جانے والا بن جا ۔

تیری چمک خودی کے نور سے ہے اگر تو اپنی خودی کو مضبوط مستحکم کر لے تو تجھے دوام حاصل ہو جائے(تو خود بھی استوار و پائندہ رہے گا) ۔

اسی سودے کی جیب میں منافع ہے ۔ امیری اسی سامان تجارت کی حفاظت کی وجہ سے ہے ۔

تو تو زندہ ہے (تیرا وجود ہے) اور عدم و نبود (نیست) ہونے سے تو ڈر رہا ہے ۔ میں تیرے صدقے جاؤں ، تو نے غلط سمجھا ہے ۔

چونکہ میں زندگی کے ساز سے آگاہ ہوں اس لیے تجھے بتاتا ہوں کہ زندگی کا راز کیا ہے ۔

زندگی کا بھید یہ ہے کہ پہلے موتی کی طرح اپنی ذات (خودی) میں غوطہ لگانا، اس کے بعد اپنی خلوت گاہ میں سے سر باہر نکالنا ۔

راکھ کے نیچے چنگاریاں جمع کرنا، پھر یکایک شعلے کی صورت اختیار کر لینا، دیکھنے والوں کی نظریں جلا ڈالنا (زندگی کا راز ہے) ۔

چالیس سالہ محنت و مشقت کا گھر پھونکنے والا بن جا، اپنے گرد چکر لگا (خودی میں محو ہو جا) اچھلنے اور بھڑکنے والا شعلہ بن جا ۔

زندگی نام ہے دوسروں کے گرد چکر لگانے سے نجات پانے کا، اپنی ذات ہی کو بیت الحرم جاننے کا (تاکہ دوسرے تیرے اردگرد چکر لگائیں ) ۔

تو پَر کھول (اڑ) اور زمین کی کوشش سے آزاد ہو جا، پرندے کی طرح گرنے سے محفوظ ہو جا ۔

عقل مند! اگر تو پرندہ ہے اور اڑ نہیں سکتا تو پھر غار کے منہ پر اپنا گھونسلہ نہ بنا (کیونکہ اگر اڑ نہ سکے گا تو غار میں گر جائے گا) ۔

تو علم حاصل کر رہا ہے میں تجھے مرشد روم یعنی مولانا روم کا پیغام سناتا ہوں (وہ فرماتے ہیں کہ) ۔

اگر تو علم سے تن پروری کا کام لے گا تو یہ تیرے لیے ایک سانپ کی مانند ہو گا ( جو تجھے ڈسے گا) ۔ اور اگر تو علم کو دل کی اصلاح کے کام میں لائے گا تو یہ تیرے لیے ایک سچا اور اچھا رفیق ہو گا(یہ شعر مولانا روم کا ہے) ۔

کیا تو روم کے ملا یعنی مولانا جلال الدین رومی کے قصے سے تو واقف ہے وہ جو حلب کے شہر میں مختلف علوم کا درس دیا کرتے تھے ۔

ان کے پاؤں عقل کے استدلال کی بیڑیوں میں بندھے ہوئے تھے اور ان کی کشتی فلسفہ کی تاریکیوں کے طوفان میں تھپیڑے کھاتی رہتی تھی ۔

وہ ایک ایسے موسیٰ تھے جو عشق کے کوہ طور سے آشنانہ تھے، جو عشق سے اس کے جنون سے بالکل ناواقف تھے ۔

ان کا وعظ و درس تشکک اور اشراق ایسے نظریات سے متعلق ہوتا اور وہ حکمت و فلسفہ یا حکم کے بارے میں سینکڑوں دانائی کے موتی پروتے ۔

مولانا نے مشائین کے افکار و نظریات کی گھتیاں سلجھائیں (سلجھاتے رہتے) ۔ ان کے فکر کے نور نے ہر پوشیدہ معنی کو ظاہر کر دیا ۔

ان کے گرد اور سامنے کتابوں کے ڈھیر (انبار) لگے رہتے اور ان کے ہونٹوں (زبان) پر کتابوں کے معانی کی تشریح ہوتی (وہ کتابوں ہی کے اسرار بیان کرتے رہتے) ۔

مرشد تبریزی یعنی شمس تبریزی نے اپنے مرشد کمال کے ایما پر ملا جلال یعنی مولانا روم کے مدرسے کا پتہ چلا لیا (جہاں وہ درس دیتے تھے) وہ درس گاہ پہنچ گئے ۔

شمس نے مولانا سے کہاکہ یہ سب شورو غوغا اور بحث مباحثہ کیا ہے، یہ منطفبانہ اصلاحات قیاس، وہم اور استدلال جن کے حوالے سے یہ بحثیں ہو رہی ہیں ، سب کیا ہیں

مولانا روم نے جواب میں فرمایا او ناواقف منہ بند رکھ (خاموش رہ) تو عقلمندوں کی باتوں کا مذاق مت اڑا ۔

تو میرے مدرسے سے نکل جا، یہ بحث مباحثہ (قیل و قال) ہے، تجھے اس سے کیا مطلب

ہماری بحث و گفتگو تیری سمجھ سے بالکل باہر ہے، یہ قیل و قال ادراک کے شیشے کو چمکانے والی ہے ۔

شمس نے جو یہ جواب سنا تو ان کی گرمی (غصہ) بڑھ گئی، ان کی جان میں دبی ہوئی آگ باہر شعلہ زن ہو گئی ۔

زمین پران کی نگاہ کی بجلی گری، ان کی پھونک سے مٹی آگ کی صورت اختیار کر گئی ۔

دل کی آگ نے ادراک کا کھلیان جلا ڈالا، اس آگ نے اس فلسفی (مولانا روم) کی کتابوں کا پلندہ جلا کر راکھ کر ڈالا ۔

مولانا روم عشق کی کرامات سے بے خبر اور ناواقف تھے وہ عشق کے ساز کے نغموں سے ناواقف تھے ۔

بولے یہ آگ تو نے کیوں کر روشن کی، تو نے تو حکمت و فلسفہ کی کتابیں ہی جلا ڈالی ہیں ۔

شمس بولے، اے شرک میں گرفتار مومن، یہ سب ذوق اور وجد حال کا اثر ہے، تجھے ان سے کیا سروکار ۔

ہمارا وجد و حال تیری قوت فکر سے کہیں بڑھ کر ہے، ہمارا شعلہ سرخ کیمیا (پارس پتھر) ہے (جو تانبے کو سونا بنا دیتا ہے) ۔

تو نے تو حکمت و فلسفہ کی برف سے اپنا ساز و سامان تیار کیا ہے ۔ تیرے فکر کے بادلوں سے تو اولے برستے ہیں ۔

تو (رومی) اپنے خاشاک سے (عشق و جذبہ کی)کوئی آگ پیدا کر، اپنی خاک سے کوئی شعلہ بنا ۔

مومن کا علم تو دل کے سوز سے درجہ کمال پر ہوتا ہے، اسلام کے معنی غروب کر جانے والوں سے دور رہنے یا انہیں ترک کر دینے کے ہیں ۔

جب حضرت ابراہیم علیہ السلام نے اسی آفل (غروب کر جانے والوں ) سے نجات پا لی تو وہ آتش نمرود میں بڑے اطمینان سے بیٹھ گئے (اور شعلے انہیں کوئی نقصان نہ پہنچا سکے) ۔

تو نے وہ علم پس پشت ڈال دیا جو حق تک پہنچانے والا تھا، محض روٹی کی خاطر تو نے دین کی پونجی ہار دی ۔

تو سرمے کی تلاش میں تیز تیز ادھر اُدھر دوڑتا پھرا ۔ اپنی سیاہ آنکھوں کی تجھے خبر ہی نہیں (جو سرمے کی محتاج نہیں ) ۔

خنجر کی آب (دھار) سے آب حیات طلب کر،اژدہا کے منہ سے کوثر کا خواہاں ہو ۔

سنگ اسود، بت خانے کے دروازے سے لے اور مشک کا نافہ پاگل کتے سے حاصل کر ۔ (ایسی بدیہی ناممکن باتیں ممکن ہو سکتی ہیں ۔ مگر یہ ممکن نہیں کہ دور حاضر کے علوم و فنون سے تجھے عشق کا سوز اور محبت کی تپش مل جائے) ۔

دور حاضر کے علوم و فنون میں سوز حق کی جستجو نہ کر، حق کے سرور کی اس کافر کے جام سے توقع مت رکھ ۔

میں ایک عرصے تک دوڑ دھوپ اور تگ و دو میں رہا ہوں ، میں نے دور حاضر کے علوم و فنون کو بڑے قریب سے دیکھا ، جانا ہے( اس کے تمام بھید جانتا ہوں ) ۔

باغبانوں نے مجھے جانچا پرکھا ہے اور مجھے اس گلستان کا رازدان بنایا ہے ۔

(عہد حاضر کے علوم و فنون کا) گلستان ایک ایسا گلستان ہے جو عبرت کا ایک لالہ زار ہے، مراد سراپا عبرت و نصیحت ہے اس کی کیفیت کاغذ کے پھو ل کی مانند ہے یعنی خوشبو سے عاری اور خوشبو کا محض ایک فریب ۔

جب میں اس گلستان کی قید سے آزاد ہو چکا ہوں میں نے طوبیٰ کی شاخ پر اپنا گھونسلا بنا لیا ہے ۔

موجودہ زمانے کے علوم و فنون (ذہن و دماغ اور قلب روح کے لیے) بہت بڑا پردہ ہیں (یہ پردہ روشنی کو روک لیتا ہے) ۔ یہ علوم و فنون بت پرست ہیں ، بت فروش ہیں اور بت تراش ہیں ۔

دانش حاضر کی حالت ایسی ہے کہ یہ مظاہر کے قید خانے میں بیٹھ گئے ہیں اور محسوسات کی حدود سے باہر جا ہی نہیں سکتے ۔

یہ زندگی کے راستے پر چلنے سے عاجز ہے، اس نے اپنے ہی گلے پر خنجر رکھ لیا ہے ۔

اس میں جو آگ ہے وہ لالہ کے پھول کے رنگ کی طرح سرخ تو ہے لیکن گرمی سے خالی ہے ۔ اس کا شعلہ اولے کی طرح سرد اور ٹھنڈا ہے ۔

اس کی فطرت عشق کی تپش سے محروم رہی (عشق کا سوز نہ ملا) وہ جستجو کی دنیا میں ناخوش رہی ۔

عشق عقل کی بیماریوں کا علاج کرنے والا طبیب (افلاطون) ہے ۔ اس کے نشتر سے عقل کا سودا ٹھیک ہو جاتا ہے ۔

تمام کائنات سجدہ کرنے والی اور عشق مسجود (سب کی سجدہ گاہ ) ہے ، عقل کے سومنات (یعنی قلعے) کا محمود (فاتح) عشق ہے ۔

دور حاضر کے علوم و فنون کی صراحی میں پرانی شراب موجود نہیں ، یارب کا شور اس کی راتوں کے مقدر میں نہیں ہے ۔

(اے مسلمان) تو نے اپنے شمشاد یعنی اپنے علوم و فنون کی قدر و قیمت نہ پہچانی اور دوسروں کے سرو کو تو اونچا ماننے لگا ۔

بانسری کی طرح تو نے اپنی ذات کو اپنے آپ سے خالی کر لیا اور اب دوسروں کے نغمے سے دل لگائے ہوئے ہے ۔

اے دوسروں کے دستر خوان سے ایک ٹکڑے کی بھیک مانگنے والے تو اپنی جنس غیروں کی دکان سے خریدنے کا آرزومند ہے ۔

افسوس کہ مسلمان کی محفل بیگانوں کے چراغ سے جل بجھی ۔ اس کی مسجد کو بت خانے کی چنگاری نے راکھ کا ڈھیر بنا دیا ۔

حرم کی حدود سے جب ہرن بھاگ اٹھاتو شکاری کے تیر نے اس کا پہلو چیر کر رکھ دیا ۔

پھول کی پتیاں اپنی خوشبو کی طرح منتشر ہو گئیں ، اے اپنی ذات سے بھاگے ہوئے پھر اپنی طرف لو ٹ آ ۔

اے مسلمان! تو قرآن کریم کی حکمت کا امانت دار ہے تو اپنی گم گشتہ وحدت کو پھر سے پا لے، حاصل کر لے ۔

ہم کہ ملت کے قلعے کے محافظ و پاسبان ہیں ، ملت کے آداب و شعائر ترک کر کے ہم کافر ٹھہرے ہیں ۔

قدیم ساقی کا جام (پیالہ) ٹوٹ گیا، حجازی رندوں کی محفل درہم برہم ہو گئی ۔

کعبہ ہمارے بتوں سے آباد ہے، کفر ہمارے اسلام کا تمسخر اڑا رہا ہے، ہنسی اڑا رہا ہے ۔

شیخ بتوں کے عشق میں اسلام ہی سے ہاتھ دھو بیٹھا ۔ اس نے زنار کی تسبیح کے دھاگے کا کام لیا (اسلامیات غیروں کے شعائر و عقائد سے داغدار ہے) ۔

بوڑھے محض بالوں کی سفیدی کے سبب بزرگ ٹھہرے، ان کی عملی و عملی حالت یہ ہے کہ گلی کوچوں کے لونڈے ان کا مذاق اڑاتے ہیں ۔

ان کادل لا الہ کی تحریر سے عاری اور ہوس کے بتوں کا ٹھکانا بنا ہوا ہے ۔

ہر لمبے بالوں والا گدڑی پوش بن جاتا ہے ان دین فروش سوداگروں کی حالت قابل افسوس ہے ۔

(یہ نام نہاد صوفیا) شب و روز مریدوں کے ساتھ سفر میں رہتے ہیں ، ملت کے مسائل کیا ہے اس کی انہیں کچھ خبر نہیں (ہرگز واقفیت نہیں ۔

ان کی آنکھیں نرگس کی آنکھوں کی طرح بے نور ہیں ، ان کے سینے دل کی دولت (عشق ) سے خالی ہیں ۔

کیا واعظ اور کیا صوفی سبھی عہدوں کے بھوکے ہیں (ان لوگوں کی ان حرکات سے) ملت بیضا کی عزت و حرمت جاتی رہی ۔

ہمارے واعظوں کی آنکھیں بت خانوں پر جمی ہوئی ہیں ۔ ہمارے دین روشن کے مفتی فتوے بیچ رہے ہیں ۔

دوستو! اب اس کے بعد ہمارے لیے کیا چارہ کار ہے ہمیں کیا کرنا چاہیے ۔ کیونکہ ہمارے پیر ومرشد نے شراب خانے کا رخ کر لیا ہے (وہ راہ راست سے پھر گیا ہے) ۔