بخش 15 - حکایت شیخ و برهمن و مکالمه گنگ و هماله در معنی اینکه تسلسل حیات ملیه از محکم گرفتن روایات مخصوصه ملیه می باشد

بنارس شہر میں ایک معزز برہمن ہستی اور نیستی (فنا او ر بقا) کے سمندر میں ڈوبا رہتا تھا ۔ وہ بقا اور فنا کی فلسفیانہ گتھیاں سلجھانے میں مصروف رہتا تھا (کہ زندگی کی حقیقت کیا ہے) ۔

اسے دانائی کا بہت بڑا حصہ عطا ہوا تھا، اسے اللہ کی تلاش میں رہنے والوں (اللہ والوں ) سے عقیدت تھی ۔

اس کا ذہن مطلب کو پا جانے والا اور نت نئی نرالی بات نکالنے کی کوشش کرنے والا تھا ۔ اس کی عقل بلندی میں پروین کے برابر پہنچی ہوئی تھی ۔

اس کا آشیانہ عنقا ( کے آشیانے) کی طرح بلند تھا ۔ سورج اور چاند اس کے غور و فکر کے شعلے پر کالے دا نے کی مانند تھے ۔

مدت تک اس کی صراحی (دل) خون میں رہی (اس کا دل خون ہو گیا) (وہ مدت تک فکری منت و مشقت میں لگا رہا ) لیکن حکمت و دانائی کے ساقی نے اس کے جام میں شراب نہ ڈالی ۔

اس نے علم و حکمت کے باغ میں مسلسل جال بچھائے رکھا لیکن اس کے جال کی آنکھ نے حقیقت کا کوئی پرندہ نہ دیکھا ۔ یعنی کوئی پرندہ اس کے حلقہ دام میں نہ پھنسا ۔

اس کی فکر کا ناخن عقدے کھولتے کھولتے لہو سے آلودہ ہو کر رہ گیا(لیکن پھر بھی) ہستی اور نیستی (فنا و بقا) کے فلسفے کی گتھی سلجھ نہ سکی ۔

اس کے لبوں پر آہ تھی جو اس کی محرومی و ناکامی کی گواہ تھی ۔ اس کا چہرہ اس کے حیران دل کا غماز بنا ( اس کا چہرہ دیکھتے ہی دل کی حیرانی نمایاں ہو جاتی تھی) ۔

ایک روز وہ کسی کامل بزرگ کے پاس گیا ۔ ایسا بزرگ جس کے سینے میں حق شناس دل موجود تھا ۔

برہمن نے اس دانشمند کی باتوں پر کان لگا لیے اور اپنے لبوں پر خاموشی کی مہر لگا لی ۔

شیخ نے فرمایااے بلند آسمان کا طواف کرنے والے تھوڑی دیر کے لیے خاک (زمین) کے ساتھ بھی پیمان وفا باندھ لے ۔

جب تو صحرا و دشت میں آوارہ ہو گیا (مارا مارا پھرنے لگا) تیرا بیباک خیال آسمان سے بھی آگے گزر گیا ۔

اے آسمان کو طے کرنے والے تو زمین کے ساتھ بھی تعلق پیدا کر، ستاروں کے موتیوں کی تلاش میں پھرنا چھوڑ دے ۔

میں نہیں کہتا کہ تو بتوں سے بیزار ہو جا، تاہم تو کافر ہے تو کافر ہی رہ لیکن اپنے آپ کو زنار پہننے کے لائق تو کر لے ۔

تیرے پاس ایک پرانی تہذیب بطور امانت موجود ہے، اسکا حق ادا کر اور باپ دادا کے طور طریقے نہ چھوڑ ۔

اگر قومی زندگی جمیعت و اتحاد پر موقوف ہے تو ظاہر ہے کہ کفر بھی جمیعت کے بغیر زندہ نہیں رہ سکتا ۔

تو جو کفر میں بھی کامل نہیں ہے اس لیے تو دل کے حرم کا طواف کرنے کے قابل نہ ہو سکا (صاحب دل نہ بن سکا) ۔

ہم دونوں تسلیم و رضا کے راستے سے بھٹک گئے ہیں تو آزر (بت پرست) سے دور ہو گیا ہے اور میں ابراہیم سے دور ہو گیا ہوں ۔

ہمارا مجنوں محمل کا دیوانہ نہ بنا، وہ عاشقی کے جنون میں کمال حاصل نہ کر سکا ۔

جب خودی کی شمع ہی وجود میں بجھ گئی تو آسمانوں کی سی بلندی والے خیال کا کیا فائدہ حاصل ہو گا ۔

پانی نے پہاڑ کے پلو (دامن) پر پنجہ مارا (یعنی) ایک روز دریائے گنگا نے ہمالیہ پہاڑ سے کہا ۔

تو کہ کائنات کے وجود میں آنے کے دن سے کندھوں پر برف لیے ہوئے ہے، تیرا جسم ندی نالوں کی وجہ سے اس طرح ہے جیسے تو نے ان کی زنار پہن رکھی ہو ۔

خدا نے بلندی میں تجھے آسمان کا ہمراز بنا دیا، تیرے پاؤں کو خرام ناز سے محروم رکھا ۔

اس (خدا) نے تیرے پاؤں سے چلنے کی طاقت باقی نہ چھوڑی، تو اس وقار، اس بلندی اور شان و عظمت کا کیا فائدہ

زندگی تو مسلسل چلتے رہنے کا نام ہے، موج کے وجود کا سروسامان چلنے ہی پر ہے ۔

پہاڑ نے جب دریا سے یہ طعنہ سنا تو وہ غصے سے آگ کے سمندر کی مانند بھڑک اٹھا ۔

وہ بولا، اے دریا، تیری وسعت میرے لیے آئینے کا کام دے رہی ہے تجھ جیسے سینکڑوں دریا میرے سینے میں موجود ہیں ۔

تو جسے خرام ناز کہتا ہے وہ تو اپنے آپ کو ختم کر لینے کا ذریعہ ہے، جو کوئی اپنی ذات سے گیا وہ فنا ہی کے لائق ہے ۔

تجھے اپنے مقام سے آگاہی نہیں ہے تو اپنے مقام سے آگاہ نہیں تو اپنے نقصان پر فخر و ناز کر رہا ہے ، تو نادان ہے کہ اپنے نقصان پر نازاں ہے ۔

تو کہ گھومتے ہوئے آسمان کے شکم سے پیدا ہوا ہے، تجھ سے تو وہ ساحل ہی بہتر ہے جو اپنی جگہ پر جما کھڑا ہے ۔

تو نے اپنا وجود سمندر کی نذر کر دیا اور اپنی جان کا سرمایہ لٹیرے کے آگے ڈال دیا ۔

باغ میں رہنے والے پھول کی طرح خوددار بن جا، خوشبو پھیلانے کی غرض سے پھول توڑنے والے (مالی) کے پیچھے نہ جا ۔

زندگی اپنی جگہ پر رہ کر نشوونما کا نام ہے، یعنی خودی کی کیاری سے پھول توڑنے کا نام زندگی ہے ۔

(دیکھو) صدیاں گزر گئیں ہیں اور میں اپنی جگہ پر پاؤں جمائے کھڑا ہوں تو یہ خیال کرتا ہے کہ میں اپنی منزل سے دور ہوں ۔

میرا وجود بڑھتے بڑھتے آسمان تک جا پہنچا، اور ثریا جیسے بلند ستاروں نے میرے دامن میں آرام کیا ۔

تیرا وجود سمندر میں جا کر مٹ جاتا ہے، جب کہ میری چوٹی ستاروں کی سجدہ گا ہ ہے ۔

میری آنکھ آسمان کے بھید کو دیکھ لیتی ہے ، میرے کان فرشتون کے اڑنے کی آواز سے واقف ہیں ۔

میں مسلسل جدوجہد کرتا رہا اور اس آگ میں جلتا رہا تب کہیں میں نے لعل، ہیرے اور موتی حاصل کیے ۔

میرے اندر پتھر ہے اور پتھر کے اندر آگ ہے، پانی کی ہمت نہیں کہ وہ میری آگ پر سے گزر سکے ۔ یہ مولانا کا شعر ہے ۔

کیا تو قطرہ ہے اپنے آ پ کو اپنے پاؤں میں نہ گرا تھپیڑوں میں جدوجہد کر اور سمندر سے الجھ جا ۔

تو گوہر کی آب و تاب کا طالب بن اور موتی کا ریزہ بن جا، اس طرح کسی حسین کے کانوں کے لیے بندا بن جا ۔

یا تو اپنے آپ کوآگے بڑھا اور تیر رفتار ہو جا، بجلی گرانے اور چھاجوں مینہ برسانے والا بادل بن جا ۔

سمندر تجھ سے طوفان کی بھیک مانگے اور اپنے دامن کے تنگ ہونے کی شکایت کرے ۔

سمندر تیرے مقابل خود کو محض ایک موج سے بھی کم سمجھے اور اپنے آپ کو تیرے پاؤں میں ڈال دے ۔