پیشکش به حضور اعلیحضرت امیرامان الله خان فرمانروای دولت مستقلهٔ افغانستان خلد الله ملکه و اجلاله

اے بلند اقبال (خوش نصیب) سردار ، اے بادشاہ (تو) نوجوان مگر بوڑھوں کی طرح جہاں دیدہ ہے ۔

تیری آنکھ چھپے ہوئے رازوں سے آشنا ہے (رازداں ہے) تیرے سینے میں دل جمشید کے پیالہ کی مانند ہے ۔

تیرا پکا ارادہ تیرے پہاڑ کی طرح اٹل ہے ۔ تیری سوجھ بوجھ تیری مشکل آسان کرتی ہے ۔

تیری ہمت میرے تخیل (فکر) کی طرح بلند ہے ۔ یہ ہمت تتر بتر ملت کو اکٹھا (متحد) کرنے والی ہے ۔ تو نے اپنی ہمت کو کام میں لے کر قبائل ، عقائد و نظریات اور زبان و نسب میں بٹی ہوئی افغان قوم کو جو صد ہا ٹکڑوں میں بٹی ہوئی تھی متحد کر دیا ۔

بڑے بڑے بادشاہوں نے تجھے نذریں گزاری ہیں تو بہت سے قیمتی اور انمول ہیرے موتی رکھتا ہے ۔

اے جدی پشتی سلطان (اے رئیس سرداروں کی اولاد) ایک (اس) فقیر بے سروسامان کی ناچیز نذر کو بھی قبول کر لے ۔

چونکہ مجھے زندگی کا بھید سکھایا گیا ہے اور میرے پیکر میں ایک آگ بھڑکائی گئی ہے ۔

( میں ) سینہ روشن کرنے والا ایک نغمہ لایا ہوں ۔ ( میں ) عشق کا عہد شباب واپس لایا ہوں ۔

(وہ) اہل مغرب کا گرو (استاد) المانوی شاعر (جرمن شاعر گوءٹے) وہ پہلوی اداؤں کا مارا ہو ا(فارسی شاعری کا فدائی) ہے ۔

اس نے اپنے کلام میں شوخ و شنگ حسینوں کا تصور باندھا اور مغرب سے مشرق کو سلام بھیجا ہے ۔ نوٹ: حکیم مغرب جرمن شاعر گوءٹے نے جو فارسی ادبیات کا دلدادہ تھا ، مغرابی دیوان کی وساطت سے اہل مشرق کو سلام محبت بھیجا تھا میں نے اس کے جواب میں پیام مشرق لکھا ہے ۔

میں نے اس کے جواب میں مشرق کا پیغام (پیام مشرق) کہا ہے ۔ (گویا) یورپ کے جھٹپٹے پر چاندی بکھیر دی ہے ۔

یہ تو ہے کہ میں خود شناس ہوں مگر خود پرست (مغرور) نہیں ہوں ۔ ( میں ) تجھے بتاتا ہوں کہ وہ (گوءٹے) کون تھا اور میں کون ہوں ۔

وہ بجلی ایسے فرنگی جوانوں میں سے تھا ۔ میرا شعلہ مشرق کے بوڑھوں نے دھونکا (پیران شرق کے فیض سے) ۔

وہ چمن کا بیٹا، چمن (بہار) کا پالا ہوا ۔ اور میں ایک مردہ زمین سے اگا ہوا (ایسے ملک میں پیدا ہوا جو غریب، غیر ترقی یافتہ اور غلام ہے) ۔

وہ چمن میں بلبل کی طرح کانوں کی جنت ہے (وہ چمن کے اس بلبل کی مانند ہے جس کے نغمے کانوں کے لیے جنت ہیں یعنی اس کے ملک کے لوگ اس کا کلام بڑے شوق سے پڑھتے ہیں ) ۔ میں صحرا میں جرس کے مانند شور مچاتا ہوا فریادی ۔ میں قافلے کے اس گھڑیال یا گھنٹی کی طرح ہوں جو صحرا میں شور کر رہی ہو(اور سننے والا کوئی نہ ہو) ۔

ہم دونوں ہی کائنات کا بھید جاننے والے ہیں ۔ (ہم) دونوں موت کے اندر زندگی کا پیغام (ہیں ) ۔ تبصرہ: اس کی قوم نے اس کے کلام کی قدر کی لیکن میری قوم میرے کلام سے غافل ہے ۔ ہم دونوں کائنات کی حقیقت سے آگاہ ہیں دونوں نے دنیا کو زندگی کا پیغام دیا ہے ۔

(ہم) دونوں صبح کی طرح روشن اور آئینہ کی طرح چمکدار خنجر ہیں ، یعنی اس کے پیغام کا چرچا اور اثر ہو چکا ہے ۔ وہ کھلا ہوا اور میں ابھی تک نیام میں ہوں یعنی میرا پیغام ابھی تک کانوں میں پہنچ کر اثر انگیز نہیں ہوا ۔

(ہم) دو قیمتی چمکدار موتی ہیں (جو) بیکراں سمندر کے پیدا کئے ہوئے ہیں یعنی ہم دونوں وہ موتی ہیں جو اس دریا میں پیدا ہوئے ہوں جس کا کوئی کنارہ نہیں ۔ ایسے دریا میں پیدا ہونے والے موتی زیادہ آب و تاب والے ہوتے ہیں ۔ تبصرہ: ہم دونوں باطل کے خلاف جنگ آزما ہیں ۔ دونوں کا کلام منور اور تابناک ہے ۔ فرق یہ ہے کہ اس کی قوم نے اس کو پہچان لیا ہے لیکن میری قوم میرے کلام سے نا آشنا ہے ۔ یہاں علامہ اقبال نے قوم کی تغافل شعاری اور کوتاہ نظری کا شکوہ کیا ہے ۔

وہ شوخی سے سمندر کی تہ میں تڑپا ۔ یہاں تک کہ گریبان چاک کر دیا ، پھاڑ دیا ۔ موتی نے سیپ کے اندر رہنا پسند نہ کیا اور نکلنے کے لیے بیتاب ہوا ۔

میں ابھی تک صدف کے آغوش میں الجھا ہوا چمک رہا ہوں ۔ (صدف کے اندر پیچ و تاب کھا رہا ہوں ) ۔ ( میں ) اب تک سمندر کے باطن میں نایاب ہوں ۔ تبصرہ: اس نے سیپ کے گریبان کو پھاڑ دیا ہے وہ اپنی قوم کو عمل کا پیغام دینے کے لیے بیتاب رہا ۔ میری قوم نے ابھی تک میری شاعری اور میرے پیغام کو نہیں پہچانا ۔ گوءٹے دنیا میں مشہور ہو گیا اور میں اپنے دیس میں اجنبی ہوں ۔

میرا آشنا بھی مجھے جانے بغیر چلا گیا (انجان بن کر گزر گیا) وہ میرے شراب خانے سے خالی پیالہ لے کرنکل آیا یعنی میرے اپنے بھی میری شاعری کی اصلیت سے ناواقف اور فائدہ اٹھائے بغیر رخصت ہو گئے ۔ حالانکہ میرے شراب خانے کے مٹکے شراب سے بھرے ہوئے تھے ۔ مراد میری شاعری اور پیغام سے کسی نے فائدہ نہ اٹھایا ۔

میں اسے خسرو کا جاہ و جلال پیش کرتا ہوں ۔ اس کے قدموں کے نیچے کسریٰ کا تخت رکھتا ہوں ۔

وہ مجھ سے دل لبھانے والی بات چاہتا ہے ۔ وہ مجھ سے شاعرانہ رنگینی اور چمک مانگتا ہے یعنی وہ مجھ سے عمل آموز شاعری کے بجائے ایسی شاعری کی مانگ کر رہا ہے جو محض تفریح طبع کے لیے ہو ۔ میں شاعری میں حسینوں اور محبوبوں کی دلبری کی بات بیان کروں ۔

کم نظر نے میری جان کی بیتابی کو نہ دیکھا، اس نے صرف میرا ظاہر دیکھا میرے اندرون کو نہ دیکھا۔

ترجمہ: میاں عبدالرشید

میری فطرت نے عشق کو آغوش میں لے لیا (اپنے اندر سمو لیا) آگ اور خاشاک کا یہ میل ٹھیک بیٹھا( میں نے تنکے اور آگ کو اپنے اندر اکٹھا کر لیا) ۔

اللہ تعالیٰ نے مجھ پر سلطنت اور دین کے بھید کھولے ہیں ۔ میری آنکھ کے پردے سے غیر کی صورت مٹا دی (غیر اللہ کا پردہ ہٹا دیا) ۔ یعنی اسرار جہاں بانی کے ساتھ ساتھ مجھے دین کی فہم بھی عطا کی گئی ہے ۔

گلاب کی پنکھڑی میرے مضمون سے رنگین ہے ۔ میرے ہر شعر کا مصرع میرے خون کا قطرہ ہے ۔

تاکہ تو یہ گمان نہ کرے کہ شاعری دیوانگی ہے ۔ یہ دیوانگی اپنی انتہا میں عقلمندی ہے ( میں نے یہ ثابت کیا ہے کہ) اس کے جنون کا کمال دانائی ہے ۔

مشیت نے مجھے ہنر (سخن) کی دولت سے مالامال کر رکھا ہے مگر سرزمین ہندوستان میں مجھے خوار کیا گیا ہے ۔ یعنی میرے ہنر کی قدر کرنے والا کوئی نہیں میری شاعری سے استفادہ کرنے والا کوئی نہیں ۔

یہاں کے لالہ و گل (عاشق و محبوب) میرے نغمے سے بے بہرہ ہیں ۔ میں اپنے ہی چمن میں اجنبی پرندہ ہوں ۔

غرضکہ آسمان انہی کمینوں اور رذیلوں کی پرورش کرتا ہے ۔ ا س شخص کی قسمت پر افسوس ہے جسے کوئی جوہر عطا کیا گیا ہو (کیونکہ اس کی قدر نہیں ہو گی بے جوہر کی ہو گی) ۔

اے بلند مرتبت بادشاہ تو نے دیکھا ہے کہ ہمارا سورج غروب ہو گیا ۔ پردے میں چھپ گیا ہے ۔ ملت اسلامیہ زوال کا شکار ہے ۔

وادی بطحا کے باشندے یعنی عرب اپنے ہی صحرا میں راہ سے بے راہ ہو گیا ۔ راہ گم کئے ہوئے ہے ۔ اسلام کے اصولوں سے بیگانہ ہو چکے ہیں ۔ اسکی روح سے الا اللہ کا سوز رخصت ہو گیا ۔ اس شعر میں تلمیح ہے عربوں کی اسلام کش روش کی طرف کی 1916-17 میں انھوں نے ترکوں کے خلاف ان ترکوں کے خلاف جنھوں نے چار سو سال تک اپنے خون سے سرزمین حجاز کی آبیاری کی تھی اور لفظ حرمین شریفین کو اپنے لیے سب سے بڑا اعزاز تصور کیا تھا اعلان جنگ کر کے دشمنان اسلام یعنی انگریزوں سے مل کر اپنے محسنوں کے سینوں کو گولیوں سے چھلنی کر دیا ۔

اہل مصر نیل کے بھنور میں پھنسے ہوئے ہیں ۔ مست ہاتھیوں ایسے تورانی کاہل اور بے حس ہو چکے ہیں کمزور پڑ چکے ہیں ۔ مصری، انگریزوں کی غلامی میں ہیں ، ترکمانستان کے باشندے اوسیوں کے زیر اقتدار ہیں ۔

عثمانی ترک (زمانے) کے شکنجے میں (ہیں ) ایشیا اور یورپ ان کے خون سے سرخ ہو چکا ہے ۔ ترکوں کے تحت یورپ، ایشیا اور افریقہ کا بہت سا علاقہ تھا وہ کمزور ہو گئے اب ان کی حالت یہ ہے کہ ان کے خون کی ندیاں بہہ رہی ہیں ۔

عشق کا سلمانی طریق (انداز) نہ رہا ۔ ایران کی بس سرزمین رہ گئی اور ایرانی نہ رہے ۔

اس کی مٹی (بدن) سے زندگی کی حرارت اور مستی کوچ کر گئی ۔ اس کے دل میں وہ قدیم آگ بجھ گئی ۔

ہندی مسلمان صرف پیٹ کا غلام ہے (وہ پیٹ بھرنے یا حصول دولت کے لیے ہر قدم اٹھانے کو تیار ہے) ۔ وہ خود فروش ہے جس کا دل دین سے اکھڑ گیا ہے ۔ اس میں حمیت و غیرت مر چکی ہے ۔

مسلمانوں میں شان محبوبی نہ رہی ۔ خالد، فاروق اور اصلاح الدین ایوبی کے اوصاف نہ رہے ۔

یہاں امیر امان اللہ کو خطاب کرتے ہوئے علامہ اقبال کہتے ہیں ۔ اے کہ قدرت نے تجھے پاک دل بخشا دین کے غم سے چاک چاک سینہ عطا کیا ۔

تو صدیق اکبراور عمر فاروق کا انداز تازہ کر ۔ صبا کی طرح لالہ صحرا پر سے گزر جا ۔

پہاڑوں اور وادیوں میں بکھری ہوئی افغان قوم ہے ۔ جس کے رگوں میں شیروں کا خون ٹھاٹھیں مارتا ہے ۔ وہ بہادر اور نڈر ہیں ۔ آپ کی قوم (افغان) عرصہ دراز سے منتشر اور غیر منظم ہے ۔ علم و فن سے عاری ہے آپ اس غیور قوم کی تعلیم اور تہذیب میں کوشش کریں ۔

یہ لوگ ہوشیار اور فولاد بدن اور روشن جبین ہیں ۔ ان کی آنکھ سفید شہبازوں کی طرح تیز ہے ۔

مگر انھوں نے اس دنیا سے اپنا پور ا حصہ نہیں پایا ۔ ان کی قسمت کا ستارہ ابھی نہیں چمکا ۔ مراد ہے وہ غیر ترقی یافتہ اور غریب ہیں اس کی قسمت کا ستارہ روشن نہیں ہوا ۔

وہ پہاڑوں میں الگ تھلگ رہ رہے ہیں ۔ وہ زندگی کے ہنگاموں سے انجان ہیں ۔ زندگی کی کشمکش نہیں دیکھی ۔

تیری جان لگاتار محنت کی سہار رکھتی ہے (سعی پیہم پر استقلال موجود) ان غیرت مند افغانیوں کی تراش خراش کے لیے کوشش کر ۔

تاکہ تو اس امت کے صدیقوں میں شامل ہو جائے اور دین کے لیے سرمایہ قوت بن جائے ۔

زندگی جدوجہد کا نام ہے ۔ اس پر کسی کو کوئی استحقاق نہیں ۔ یہ تو بس انسان اور کائنات کا علم ہے اس کے علاوہ کچھ نہیں ۔

حکمت کو خدا نے خیر کثیر (بہت بڑی بھلائی) فرمایا ہے ۔ رسول اللہ ﷺ کا ارشاد ہے کہ یہ دولت جہاں بھی نظر آئے حاصل کر لے، جہاں سے حکمت ملے اسے لے لو ۔

آپ کل کے (موجودات) کے سردار، اور صاحب ام الکتاب ہیں ۔ جن کے قلب (دل) پر چھپی ہوئی چیزیں آشکار ہیں ، پوشیدہ باتیں ظاہر ہیں ۔

اگرچہ انھوں نے خاص ذات باری تعالیٰ کو بالکل بے پردہ دیکھا (پھر بھی) ان کی زبان مبارک سے رب زدنی علماً ہی نکلا (اے میرے رب میرے علم کو زیادہ کر) ۔

اشیاء کا علم ہی علم الاسماء ہے (علم الاسماء کی تفسیر ہے) یہ عصا بھی ہے اور ید بیضا بھی ۔ مراد ہے اشیا ء کے خواص کا علم جو حیران کن ایجادات کے معجزے دکھا سکتا ہے ۔

علم اشیاء ہی نے مغرب (یورپ) کو فروغ بخشا (یورپ نے ترقی حاصل کی) اس کی حکمت چھا چھ سے پنیر جماتی ہے ۔ مراد مشکل باتیں بروئے کار لاتی ہے ۔

ہماری جان میں احساس کی لذت نہیں ہے ۔ (احساس کی لذت کا پتہ نہیں ) ۔ ہم یہ نہیں سمجھتے راستوں میں بچھی ہوئی خاک، خاک نہیں ہے بلکہ قیمتی ہیروں کے ریزے ہیں ۔ مراد تجسس اور تحقیق سے مٹی سے سونا نکالا جا سکتا ہے ۔

ملت کے معاملات علم اور دولت ہی کے سبب ہیں ۔ علم اور دولت ہی سے ملت کا وقار ہے ۔ مراد ہے قوم کی سربلندی اور راز تحقیق کے علوم اور اقتصادی خوشحالی پر ہے ۔

ایک (علم) کو آزاد قوموں کے سینے سے حاصل کر اور دوسری (یعنی دولت کو) پہاڑوں کی چھاتی سے، یعنی علوم سیکھو اور زمین کو چیر کر دولت حاصل کرو ۔

اس کائنات کے پیکر (جسم) میں خنجر گھونپ (اتار) ۔ سومنات کی طرح یہ بھی اپنے پیٹ میں بہت سے گوہر رکھتی ہے مراد ہے تو علم اشیا کی بدولت کائنات میں چھپے ہوئے خزانوں کو دریافت کر ۔

تیرے بدخشاں کے اندر قیمتی لعل ہیں ۔ تیرے پہاڑوں میں سینا کی برق (بجلی) ہے ۔ مراد تیرے ملک میں ہرقسم کے وسائل موجود ہیں ان سے فائدہ اٹھا نا تمہارا کام ہے ۔

تجھے ایک مضبوط سلطنت کی بنیاد درکار ہے۔ (تو پھر) تجھے آدمی کو پرکھنے والی (مردم شناس) نظر چاہیے ۔

بہت سے آدمی ہیں جو (اندر اندر) ابلیس کا کام کرتے ہیں ۔ اور بہت سے شیطان (ابلیس) ہیں جو ادریسی کے لباس میں نظر آتے ہیں ۔

ایسے شخص کا رنگ ڈھنگ دھوکا اور ظاہر دکھاوا ہے اس کا ہونا نہ ہونا ہے ۔ اس کے اندر لالے کے داغ کی طرح دھواں دھواں ہے (گل لالہ کا داغ نہیں بلکہ کینے کا دھواں ہے) ۔

بظاہر وہ پاکباز ہے مگراس کے دونوں پانسے کھوٹے ہیں ۔ (مگر وہ فریب کا کھیل کھیلتا ہے ) وہ دل میں فریب اور دوغلا پن رکھنے والا مکار ہے ۔

اے صاحب نظر بادشاہ! اچھی طرح سمجھ لے کہ ہر چمکنے والا پتھر موتی نہیں ہے ۔

مرشد رومی جو ربانی علم رکھنے والا پاک فطرت ہے ۔ اس نے ہم پر زندگی اور موت کا راز ظاہر کر دیا ہے ۔

پہلی قوموں پر جو بھی ہلاکت آئی اس کا سبب یہ تھا کہ انھوں نے پتھر کو عود سمجھ لیا تھا ۔

ہمارے دین (اسلام ) میں سرداری خدمتگاری (کا نام ) ہے ۔ فاروقی عدل اور حیدری فقر (سے عبارت) ہے ۔

دین اور سلطنت کے کاموں کے ہجوم میں پل بھر کو اپنے دل کے ساتھ تنہائی اختیار (کیا) کر ۔ مراد ہے اپنا احتساب نفس کرنا اچھائیوں اور برائیوں کا جائزہ لینا ۔

جو (شخص) بھی ایک پل کے لیے اپنی گھات میں بیٹھا (اپنا محاسبہ کیا) اس کے پھندے سے کوئی شکار بچ کر نہیں جا سکتا ۔

بادشاہی لباس میں درویش بن کر زندگی بسر کر ۔ بیدار آنکھوں والا اور خدا خوفی کے ساتھ جی (راتوں کو جاگ اور ہر دم اللہ تعالیٰ کو دیکھ) ۔

ملت کا رہنما سلطان مراد تھا ۔ بجلی کی کڑک اور بادلوں کی گرج جس کی تلوار کے غلام تھے ۔ مراد ہے اس کی ہیبت اور طاقت سے دشمن لرزتے تھے ۔

وہ فقیر بھی تھا اور آسمان جیسی عظمت والا بادشاہ بھی ۔ (وہ) گویا ابوذر کی روح رکھنے والا اردشیر کی مانند تھا ۔

وہ سر سے پاؤں تک زرہ میں ڈوبا رہتا تھا لیکن اس کے سینے میں ایک دل تھا جو خرقہ پوش تھا ۔ (صوف میں ملبوس )یہ عام طور پر درویشوں کا لباس سمجھا جاتا ہے ۔

وہ مسلمان جنھوں نے (اس طرح) حکمرانی کی ہے ۔ انھوں نے بادشاہی میں فقیری کی ہے ۔

انھوں نے حکمرانی میں فقر کو پروان چڑھایا (فقر میں اضافہ کیا) مدائن میں سلمان فارسی کی طرح رہے۔

اگرچہ وہ حاکم تھے مگر ان کے پاس کوئی سامان نہ تھا ۔ ان کے ہاتھ میں تلوار اور قرآن کے سوا کچھ نہ تھا ۔

جس کی پونجی (سامان) عشق رسول اللہ ﷺ ہے ۔ خشکی اور تری اس کے دامن کے کونے میں بندھے ہوئے ہیں ۔

اللہ تعالیٰ سے حضرت صدیق اور حضرت علی کا سوز مانگ ۔ عشق نبی ﷺ کا ایک ذرہ خدا سے مانگ (اسی عشق سے یہ سوز و ساز حاصل ہو گا) کیونکہ ملت اسلامیہ کی بقا ان کے عشق سے ہے ۔

کائنات کا سازو سامان ان ﷺ کی محبت ہی تو ہے یہی عشق کائنات کا سارا سازو سامان ہے ۔

وجود کا چھپا ہوا جوہر آپ ﷺ کے ظہور سے آشکار ہو گیا ۔ اشارہ نور محمدی ﷺ کی طرف ہے مراد ہے کائنات کی تخلیق کا باعث نبی کریم ﷺ ہیں ۔

آپ ﷺ کے عشق کے بغیر روح کو تسکین نہیں (چین نہیں ہے) آپ ﷺ کا عشق وہ دن ہے جسے شام نہیں ہے ۔

اٹھ اور ان کے عشق کے پیالے کو گردش میں لا ۔ کوہستان (افغانستان) میں عشق کا پیغام تازہ کر ۔