بخش 10 - خطاب به پادشاه اسلام اعلیحضرت ظاهر شاه «ایده الله بنصره»

اے ظاہر شاہ شاہی لباس تجھ پر ٹھیک آیا ہے ، تیرا سایہ ہماری خاک کے لیے اکسیر کا اثر رکھتا ہے ۔

بادشاہت کی تیرے وجود سے قدروقیمت ہے، تیرا دبدبہ ملک اور سلطنت کے لیے قلعہ ہے ۔

تو کہ فتح و ظفر کا سرمایہ ہے تجھ سے احمد شاہ ابدالی کے تخت کی شان اور ہو گئی ہے ۔

جن سینوں میں تیری محبت نہیں ان کا ویران ہو جانا ہی اچھا ہے ۔ بلکہ ان کا دل اور آرزو سے نا آشنا ہو جانا ہی بہتر ہے ۔

یہ جو چمکدار تلوار تیری کمر سے بندھی ہے اس کی چمک سے نصف شب صبح میں تبدیل ہو جاتی ہے ۔

میں اچھی طرح سے جانتا ہوں کہ یہ نادر شاہ کی تلوار ہے ۔ کہوں کہ اس کا باطن ہی ظاہر ہے ۔

میں تیرے لیے عشق کی باتیں لایا ہوں ، مجھ سے سن لے ۔ ایک مرد درویش سے بادشاہت کے راز سیکھ ۔

تیری نگاہ شاہین کی نگاہ سے زیادہ تیزی ہے ۔ اس خداداد سلطنت کے ارد گرد بھی دیکھ ۔

یہ جو کچھ ہم دیکھ رہے ہیں ، کس کی تقدیر میں کیا ہے وہ کونسی شے ہے جو ہونی چاہیے اور نہیں ہے

دن اور رات ہماری تقدیر اور تقدیر کے آئینہ دار ہیں ۔

اے جفاکش نوجوان میں تجھ سے کہتا ہوں کہ مستقبل کیا ہے وہ آج اور کل کی بیٹی ہے ۔

یہ سراپا غبار آسمان اس کے گرد گردش کرتا ہے جو آج کا مالک ہوتا ہے ۔

اس کا وجود اس دنیا کے لیے باعث عزت ہے، ماضی بھی اس کا ہے اور حال بھی اسی کا اور آنے والا کل بھی اسی کا ہو گا ۔

مرد حق روز و شب کا سرمایہ ہے کیونکہ وہ خود اپنی تقدیر کا ستارہ ہے ۔

صاحب نظر انسان امتوں کا قائد و رہنما ہے ، اس کی نگاہ قوموں کی تقدیر کو دیکھ لیتی ہے ۔

تلوار کی تیزی اس کی نگاہ سے زیادہ تیز نہیں ہے ۔ ہم سب شکار ہیں لیکن وہ شکار نہیں ہے ۔

اس پختہ کار کے افکار سے وہ حادثات جو ابھی زمانے کے شکموں میں ہیں لرزتے ہیں ۔

اپنے باپ کی مانند اہل ہنر سے دوستی رکھ، صاحب بصیرت انسان کو اپنا دوست رکھ ۔

اپنے خلد آشیان باپ کی مانند بیداری کی زندگی بسر کر ، زبردست جدوجہد کر اور ان تھک اور کراری کی زندگی بسر کر ۔

کیا تو سمجھتا ہے کہ کرار کے معنی کیا ہیں ۔ یہ حضرت علی کے مقامات میں سے ایک مرتبہ ہے ۔

اس فانی دنیا میں قوموں کے لیے کراری کے بغیر زندہ رہنا ممکن نہیں ۔

آل عثمان کی سرگزشت پر نظر ڈال، وہ مغربیوں کے مکر و فریب سے لگائے ہوئے زخم سے خونیں جگر ہیں ۔

جب تک وہ آل عثمان کراری سے بہرہ ور رہے انھوں نے دنیا میں اور انداز کا جھنڈا گاڑا ۔

برصغیر کا مسلمان میدان سے کیوں پیچھے ہٹ گیا اس لیے کہ اس کی ہمت کراری کی خوشبو یا خوبی نہ رکھتی تھی ۔

اس کی مشت خاک، کچھ اس قدر سرد ہو گئی کہ میری آواز کی گرمی نے اس پر کچھ اثر نہ کیا ۔

نادر شاہ کا ذکر و فکر اور دلبری کے ساتھ قاہری تیرے خون میں ہے ۔ جلال کے ساتھ ساتھ تیری فطرت میں جمالی کیفیت بھی ہے ۔

تو جوانوں اور بوڑھوں کی آنکھ کی روشنی ہے۔ رموزِ سلطنت ہاشم اور محمود سے سیکھ۔

اس آدمی سے بھی رموز سلطنت سیکھ جسکی تلوار نے کوہ و دشت میں حق کا آوازہ بلند کیا ۔

دنوں اور راتوں کے دوران تڑپا جا سکتا ہے اور ایک نیا زمانہ پیدا کیا جا سکتا ہے ۔

قرآن کریم میں ابھی سینکڑوں جہان باقی ہیں ۔ تو ذرا اس قرآن کی آیات کے سوز سے گرمی حاصل کر ۔

پھر اس سوز کا کچھ حصہ افغانیوں کو دے ۔ اس کے زمانے کو ایک نئے دن کا اجالا دے ۔

پہاڑوں اور وادیوں میں منتشر اس ملت افغان کی پیشانی پر مجھے کچھ اور ہی چیز نظر آئی ہے ۔

چونکہ میرے دل میں سوز و درد تھا اس لیے خدا نے مجھے ان کی تقدیر سے آگاہ کر دیا ہے ۔

میں نے ان کے معاملات کو اچھی طرح دیکھا ہے ، میں نے وہ بھی دیکھا ہے جو دوسروں کی نظر سے پنہاں ہے ۔

مرد میدان اللہ ہو سے زندہ جاوید ہوتا ہے ، یہ محدود دنیا اس کے پاؤں کے نیچے ہے ۔

وہ بندہ جو غیر اللہ سے دل نہیں لگاتا اس کا شیشہ بھی پتھر کو توڑ سکتا ہے ۔

وہ اس جہان چون و چند (اسباب) دنیا میں نہیں سماتا ۔ وہ ایسا وسیع سمندر ہے جس کا کوئی کنارہ نہیں ۔

جب وہ مرد حق اپنے چہرے سے پردہ اٹھا دیتا ہے تو وہ خود ہی حشر و حساب ہے ، خود ہی ثواب اور خود ہی عذاب ہوتا ہے ۔

ہمارا اثاثہ حیات قرآن کریم اور حکمت ہے ، انہی دو قوتوں سے ملت اسلامیہ کا وقار ار بھرم ہے ۔

اس قرآن سے تو دنیا سے ذوق و شوق کی فتوحات ملتی ہیں ، اور اس سے محدود کائنات پر غلبہ حاصل ہوتا ہے ۔

دونوں چیزیں (کتاب و حکمت) اس خداے قیوم کی نعمتیں ہیں ، مردا حق کے لیے ایک جمال ہے اور دوسرا جلال ہے ۔

اشیا کی ماہیت جاننے کا آغاز فرنگیوں سے نہیں ہوا ۔ اس کی بنیاد صرف نئی دریافت کی لذت ہے ۔ اس کی اصل و اساس تو نت نئی چیز کو وجود میں لانے اور دریافت کرنے کی لذت کے سوا اور کچھ نہیں ۔

اگر تو غور سے دیکھے تو یہ مسلمانوں کی پیدا کردہ ہے ۔ یہ موتی ہمارے ہی ہاتھ سے گرا ہے ۔

جب عربوں نے یورپ میں بھی اپنے جھنڈے گاڑ دیے تو انھوں نے وہاں نئے انداز سے علم و حکمت کی بنیاد رکھی ۔

یہ بیج تو عرب نشینوں نے بویا تھا لیکن اس کا حاصل یورپ نے اٹھا لیا ۔

یہ پری علم و حکمت ہمارے ہی آبا وَ اجداد کے شیشے سے باہر آئی ہے ۔ تو اسے دوبارہ شکار کر کیونکہ یہ ہمارے ہی کوہ قاف کی پری ہے ۔

البتہ لادینی تہذیب سے بچ کیونکہ وہ اہل حق کے ساتھ دشمنی رکھتی ہے ۔

اس فتنہ پرور نے کئی فتنے اٹھائے ہیں ۔ یہ حرم میں لات و عزیٰ کو دوبارہ لے آئی ہے ۔

اس کے جادو سے دل کی آنکھیں اندھی ہو جاتی ہیں ۔ اور اس کی بے آبی سے روح پیاسی مر جاتی ہے ۔

یہ دل سے بیتابی کی لذت چھین لیتی ہے ۔ یہی نہیں بلکہ مٹی کے اس بدن سے دل کو نکال لیتی ہے ۔

یہ ایک کہنہ مشق چور ہے جو برملا لوٹ مار کرتا ہے ۔ لالہ بھی اس کی لوٹ سے نہیں بچا، وہ بھی اپنا داغ ڈھونڈتا پھرتا ہے کدھر غائب ہو گیا ۔

اللہ تعالیٰ تجھے ذوق حضور نصیب فرمائے ۔ میں یہاں دوبارہ کہتا ہوں جو کچھ میں نے زبور عجم میں کہا ہے ۔

اے مرد دانا ۔ یہ مرنا بھی اور جینا بھی محض اعتبارات سے ہے ۔

نغمے کے سوز سے بڑا آدمی بے بہرہ ہے ۔ آواز اور نغمے کی لذت کے اعتبار سے مردہ ہے ۔

یہ اندھا انسان ساز و آواز سے تو لطف اندوز ہو لیتا ہے لیکن رنگ کے سامنے وہ باوجود زندہ ہونے کے مردہ ہے ۔

روح، حق کے ساتھ رہ کر ہی زندہ جاوید ہو سکتی ہے ۔ ورنہ کفار کی روح مردہ اور صاحب ایمان کی زندہ ہے ۔

وہ جو باقی و قائم ہے جسے موت نہیں ہے وہ حق ہی ہے ۔ حق کے ساتھ زندہ رہنا ہی حیات مطلق پا لینا ہے ۔

جس کسی نے حق کے بغیر زندگی بسر کی وہ گویا مردار کے علاوہ اور کچھ نہیں ۔ اگرچہ کوئی بھی اس کا ماتم نہیں کرتا ۔

اگر تو حیات ابدی کی خواہش رکھتا ہے تو قرآن کریم سے استفادہ کر میں نے اس کے اندر آب حیات دیکھا ہے ۔

وہ قرآن ہمیں لا تخف (نہ ڈر) کا درس دیتا ہے ۔ وہی لاتخف کے مقام و مرتبہ پر پہنچاتا ہے ۔

سلطان اور سردار کی قوت میں لا الہ ہی سے ہے ۔ مرد درویش کی ہیبت بھی اسی لا الہ سے ہے ۔

جب تک ہمارے پاس لا اور الا کی دو تلواریں رہیں ہم نے غیر اللہ کا نشان تک مٹا دیا ۔

مشرق میرے شعلے سے روشن ہے ۔ وہ آدمی مبارک ہے جو میرے دور میں زندہ ہے ۔

میرے سوز و درد سے اپنا حصہ حاصل کر اس کے بعد مجھ جیسا قلندر کوئی نہیں آئے گا ۔

میں نے قرآن پا ک کے سمندر سے موتی نکال کر اپنے کلام میں پرویا ہے ۔ میں نے اللہ تعالیٰ کے رنگ کے راز کی تفسیر بیان کی ہے ۔

میں نے مسلمانوں کو ایک خاص غم بخشا ہے ۔ پرانی شاخ کو میں نے تازگی دی ہے ۔

میرا عشق زندگی کے معانی بیان کرتا ہے ۔ عقل کا پیالہ میری شراب سے روشن ہے ۔

دل کو جلا بخشنے والی گہری باتیں کس نے کہیں مسلمان سے پرسوز بات کس نے کی ۔

میں بانسری کی طرح پہاڑوں اور جنگلوں میں ر وتا رہا ہوں تب کہیں جا کر مجھ پر میرا مقام واضح ہوا ۔

میں نے عشق کی بات سیکھی، میں جل اٹھا ۔ اس طرح میں نے سرد آگ کو دوبارہ روشن کر دیا ۔

مجھے قدرت کی طرف سے آہ صبح گاہی عطا ہوئی ہے ۔ گویا ایک تنکے کو پہاڑ کے سے دبدہ اور وقار سے نوازا گیا ہے ۔

میں اپنے سینے میں لا الہ کا نور رکھتا ہوں ۔ میری شراب یعنی افکار میں لا الہ کا کیف و سرور ہے

اسکے فیض سے میری فکر آسمان پر پرواز کر ہی ہے ۔ اس لا الہ کے فیض سے میری ندی بے کنار ہے ۔

سو تو میری شراب کے دو ایک جام لے لے ۔ تا کہ تو ننگی تلوار کی طرح چمک اٹھے ۔