نادر افغان شه درویش خو

افغانستان کے بادشاہ نادر شاہ ایک درویش صفت انسان تھا، اس کی پاک روح پر اللہ تعالیٰ کی رحمت ہے ۔

اس کی تدبیر سے امت مسلمہ کے معاملات کو استحکام حاصل ہوا اور اس کی تلوار نے دین مبین کی حفاظت کی ۔

وہ نماز میں حضرت ابوذر غفاری کی طرح خود کو پگھلا دینے والے تھے اور کفار سے لڑائی کے موقع پر ان کا وار سخت پتھر کو بھی ختم کر کے رکھ دیتا تھا ۔

ان کے جمال سے حضرت ابوبکر صدیق کے عہد کی یاد تازہ ہوئی ۔ اور ان کے جلال سے عہد فاروق کی ۔

ان کے دل میں گل لالہ کی طرح اسلام سے محبت کا داغ موجود تھا ۔ عالم مشرق کی تاریک رات دن میں اس کا وجود آزادی کے چراغ کی حیثیت رکھتا ہے ۔

ان کی نگاہوں میں ارباب ذوق کی سی مستی تھی ۔ جذب و شوق ان کی جان کا جوہر تھا ۔

ان کی تلوار تو شاہانہ ہے لیکن نگاہ درویشانہ تھی ۔ یہ دونوں موتی انہیں لا الہ کے سمندر سے ملے تھے ۔

فقر اور بادشاہی دونوں پر رسول اللہ ﷺ کی خاص حالت کی غماز ہیں اور یہ حضور کی ذات بابرکات کی تجلیات سے قائم ہیں ۔

یہ دو قوتیں مومن ہی کے وجود سے قائم ہیں ، یہ شاہی مومن کا قیام ہے تو وہ فقر اس کا سجدہ ہے ۔

فقر سوز و درد اور داغ و آرزو کا نام ہے ۔ اور فقر کے لیے خون میں تڑپنا اسکی آبرو ہے ۔

نادر شاہ کا فقر آخر کار خون میں تڑپا ۔ اس شہید مرد کے فقر پر آفرین ہے ۔

اے صبا تو تیز چلنے والی مسافر ہے ۔ جب تو اس نادر شاہ کی قبر کے گرد چکر لگائے تو ذرا آہستہ چکر لگانا ۔

نادر شاہ سو گیا ہے باد صبا آہستہ پاؤں رکھ اور گلی کی گرہ بھی آہستہ سے کھول ۔

ان کی طرف سے مجھے فرمان پہنچا ہے جس نے میرے بدن میں نئی روح پھونک دی ہے ۔

ہم تیری آواز کے سوز سے جل اٹھے ۔ وہ قوم کتنی خوش قسمت ہے جس نے تیرا راز پا لیا ۔

تیرے غم سے ہماری قوم (افغان) آگاہ ہے، ہم جانتے ہیں کہ یہ نغمے کہاں سے اٹھ رہے ہیں ۔

تو ہمارے بادل کی آغوش میں بجلی کی مانند ہے ۔ تیری روشنی سے دنیائے مشرق روشن اور فروزاں ہے ۔

کچھ عرصہ کے لیے ہماری پہاڑوں کی سرزمین پر بھی چمک، عشق کو دوبارہ پھر وہی ولولہ و شوق عطا کر ۔

کب تک تو بیڑیوں میں مقید رہے گا ۔ تو تو کلیم ہے سینا پہاڑ کا راستہ پکڑ ۔

چنانچہ میں دشت و درہ اور باغ اور مرغزاروں میں سے گزرا ۔ صبا کی طرح میں پہاڑ اور وادیوں کا راستہ طے کیا ۔

درہ خیبر اللہ تعالیٰ کے خاص بندوں سے نا آشنا نہیں ۔ اس کے دل میں لاکھوں ہی افسانے ہیں ۔

میں نے اس سے زیادہ دشوار گزار راستہ نہیں دیکھا ۔ اس کے پیچ و خم میں نظر الجھ کے رہ جاتی ہے ۔

اس کے پہاڑوں کی وادیوں میں سبزہ نہ ڈھونڈ ۔ اس کے ضمیر کے اندر سے رنگ و بو پیدا نہیں ہوتا ۔

وہ ایک ایسی سرزمین ہے جہاں کا کمزور پرندہ چکور بھی شاہین کا مزاج رکھتا ہے ۔ جبکہ وہاں کا ہرن شیروں سے خراج وصول کرتا ہے ۔

اس کی فضا میں تیز پنجوں والے ایسے نر باز ہیں جن کی ہیبت سے چیتے کے جسم پر کپکپی طاری ہو جاتی ہے ۔

لیکن کوئی مرکز نہ ہونے کی وجہ سے یہ سرزمین انتشار کا شکار ہے ۔ کوئی ان کا نظام نہیں اور نامکمل اور نیم سوز ہے ۔

ان کی پرواز میں بازوں کی سی شان نہیں ۔ بلکہ ان کی پرواز چکوروں سے بھی پست تر ہے ۔

افسوس ہے ایسی قوم پر جس میں زندگی کا جوش و جذبہ نہ ہو اور جس کے حالت و کیفیت واردات سے خالی ہو ۔

ان میں سے کوئی تو سجدے میں پڑا ہے اور کوئی قیام میں کھڑا ہے ۔ اس قوم کا معاملہ ایسا ہی ہے جیسے بغیر امام کے نماز ہو ۔