بخش 2 - مسافر وارد می‌شود به شهر کابل و حاضر می‌شود به حضور اعلیحضرت شهید

کابل کا شہر جنت کی مانند علاقہ ہے ۔ اس کی انگور کی بیل سے آب حیات حاصل کر ۔

صائب کی آنکھیں اس کابل کی سیاہی سے سرمہ حاصل کرنے والی ہیں ۔ اللہ تعالیٰ اس سرزمین کو روشن و پائندہ رکھے ۔

رات کی تاریکی میں اس کے چنبیلی کے باغ دیکھ ۔ یوں معلوم ہوتا ہے جیسے سبزے کی چٹائی پر صبح لوٹ پوٹ رہی ہے ۔

وہ ایک اچھے ماحول والا علاقہ (خوش منظر) اور صاف ستھری سرزمین ہے ۔ اس کی ہوا شام اور روم سے کہیں بہتر ہے ۔

اس کا پانی شفاف اور خاک چمکدار ہے ۔ اسکی صبح کی ہوا کی لہر سے مردہ خاک پھر سے زندہ ہو جاتی ہے ۔

اس کے بھید نہ تو الفاظ میں سما سکتے ہیں اور نہ آواز میں ۔ اسکے پہاڑوں میں کئی سورج سوئے ہوئے ہیں ۔

اس کے باشندے سیر چشم اور شریف النفس ہیں ۔ لیکن تلوار کی طرح اپنے جوہر سے بے خبر ہیں ۔

شاہی محل جس کا نام دلکشا ہے ۔ اس کے راستے کی گرد دیکھنے والوں کے لیے کیمیا ہے ۔

میں نے اس عالی شان محل میں بادشاہ سے ملاقات کی ۔ یہ ملاقات ایک سلطان سے ایک دردمند فقیر کی تھی ۔

اس کا خلق دلوں کی سلطنت کو فتح کرنے والا تھا ۔ وہاں بادشاہوں کے رسوم و آداب نہ تھے ۔

میں اس بلند شخصیت والے بادشاہ کے سامنے ایسا ہی تھا جیسے حضرت عمر کے دربار میں کوئی بے نوا شخص ہو ۔

میری روح اس کی باتوں کی گرمی سے پگھل اٹھی ۔ اسنے نیازمندی کے طور پر اس کے ہاتھ کو بوسہ دیا ۔

وہ ایک اچھی باتیں کرنے والا ، سادہ لباس پہننے والا جفاکش اور نرم طبع اور تپاک سے ملنے والا بادشاہ تھا ۔

اس کی نگاہ میں سچائی اور خلوص دکھائی دیتے تھے ۔ اس کا وجوددین اور سلطنت کے استحکام کا باعث تھا ۔ اسکے وجود سے استحکام ملا ۔

تھا تو وہ خاک کا پتلا مگر فرشتوں سے بھی زیادہ پاکیزہ فطرت تھا ۔ وہ فقر اور سلطنت کے مقام و مرتبہ سے باخبر تھا ۔

اس کی نگاہوں میں مشرق اور مغرب کا زمانہ تھا ۔ اس کی دانائی مشرق اور مغرب دونوں کی سیاست کے راز جانتی تھی ۔

وہ ایک ایسا بادشاہ تھا جو داناؤں کی طرح نکتہ داں تھا اور قوموں کے عروج و زوال سے پوری طرح باخبر تھا ۔

اس نے معنی کے چہرے سے پردے اٹھا دیے ۔ ملک اور دین کے نکتے دکھا دیے ۔

اس نے مجھ سے کہا کہ تو اپنے بدن میں جو آگ رکھتا ہے اسکی وجہ سے میں تجھے عزیز رکھتا ہوں ۔

جس کسی میں بھی محبت کا رنگ و بو ہے ۔ میری نگاہ میں وہ ہاشم اور محمود ہے ۔

میں نے اس معزز مسلمان بادشاہ کی خدمت میں قرآن مجید کا تحفہ پیش کیا ۔

میں نے کہا یہ کتاب اہل حق کا سرمایہ ہے ۔ اسکے اندر حیات مطلق ہے ۔

اس کے اندر ہر ابتدا کی انتہا ہے ۔ حضرت علی حیدر کرار اسی قرآن کی قوت سے فاتح خیبر ہوئے ۔

میرے الفاظ کا نشہ اس کے خون میں دوڑ گیا ۔ اس کی آنکھ سے قطرہ قطرہ آنسو ٹپکنے لگے ۔

اس نے کہا نادر دنیا میں بے یار و مددگار ہے ۔ دین اور وطن کے غم میں مضطرب ہی رہا ۔

پہاڑ اور جنگل میرے اضطراب سے بے خبر ہیں ۔ میرے بے حساب غموں کی انہیں خبر ہی نہیں ۔

میں نے بلبل کے نغمے کے ساتھ اپنی فریاد کو ملا یا ۔ بہار کی ندی کے ساتھ میں نے اپنے آنسو ملا لیے ۔

سوائے قرآن کریم کے کوئی اور میرا غمگسار نہ تھا ۔ اس کی طاقت نے مجھ پر کامیابی کے تمام دروازے کھول دیے ۔

اس اعلیٰ خاندان والے بادشاہ کی باتوں نے ایک مرتبہ پھر مجھے بے خود بنا دینے والا جذبہ عطا کیا ۔

سہ پہر کے وقت اذان کی آواز سنائی دی ۔ وہ آواز جو مومن او ر سچے مسلمان کو حدود سے بے نیاز کر دیتی ہے ۔

عاشقوں کی انتہا سوز و گداز ہے ۔ میں نے اس (نادر شاہ) کی امامت میں نماز ادا کی ۔

نماز کے قیام اور سجدے کے راز سواے اپنے ہم مزاج اور واقف کاروں کی محفل کے اور کہیں نہیں بیان کیے جا سکتے ۔