بخش 19 - دعا

اے (ذات باری تعالیٰ) تو کائنات کے وجود میں اسی طرح مخفی ہے جس طرح روح بدن میں (یا تو کائنات کے وجود میں روح کی مانند ہے) جانوں میں چھپا بیٹھا ہے لیکن ہم سے دور بھاگ رہا ہے ۔

صرف تیرے ہی فیض کی برکت سے تو زندگی کے ساز میں نغمہ پیدا ہوتا ہے ۔ تیری راہ میں جو موت آئے وہ زندگی کے لیے باعث رشک ہے ۔

اب تو پھر اس غم ناک دل کی تسکین کا سامان بن، پھر ہمارے سینوں میں آ کر بس جا ۔

پھر سے ہم سے عزت و احترام کا طالب ہو ہم عشق میں خام ہیں ہمیں پختہ عاشق بنا دے ۔

اپنی قسمت کی شکایتیں ہماری زبان پر ہیں یعنی تقدیر کا شکوہ کرنے میں لگے رہتے ہیں تیرا نرخ زیادہ ہے اور ہم مفلس و نادار ہیں ۔

ہم خالی ہاتھ لوگوں سے اپنا حسین و دلکش چہرہ نہ چھپا، حضرت سلمان فارسی اور حضرت بلال حبشی والا اونچے درجے کا عشق سستا کر دے (تاکہ ہم اس سے فیض حاصل کر سکیں ) ۔

جاگتی رہنے والی آنکھ اور بے قرار دل عطا کر، پھر سے ہمیں پہلے کی طرح پارے کی سی بے قرار فطرت دے ۔

اپنے روشن نشانوں میں سے ایک روشن نشانی دکھا تاکہ دشمنوں کی گردنیں نیچی ہو جائیں ۔

اس گھاس پھوس یا تنکے کو آگ اچھا لنے والا پہاڑ بنا دے، ہماری آگ کو وہ تپش عطا کر کہ وہ ماسوا اللہ کو جلا دے(تیرے سوا ہر شے کو جلا دے) ۔

جب سے قوم نے وحدت کا رشتہ چھوڑا ہمارے کام کے رشتے میں سینکڑوں گرہیں پڑ گئیں ۔

ہم دنیا میں ستاروں کی طرح منتشر ہو کر رہ گئے، اگرچہ ہم ساتھی ہیں لیکن ایک دوسرے سے نا آشنا (اجنبی) ہیں ۔

ان بکھرے ہوئے اوراق کی پھر سے شیرازہ بندی کر دے (بندھ جانے کا سامان کر دے) پھر سے (وہی پہلے والا) محبت کا دستور تازہ کر دے ۔

ہمیں پھر سے وہی خدمت سونپ دے، جس پر ہم پہلے مامور تھے، اپنا معاملہ اپنے عاشقوں کے سپرد کر ۔

ہم چلنے والوں کو تسلیم کی منزل عطا کر، ابراہیم علیہ السلام کے ایمان کی قوت عطا کر ۔

عشق کو پہلے لا کے وظیفے سے آگاہ کر پھر اسے الا اللہ کی رمز سے آشنا کر ۔

میں شمع کی طرح دوسروں کے لیے جل رہا ہوں ، اپنی محفل کو شمع کی صورت رونا سکھا رہا ہوں ۔

یا الہٰی ایسا آنسو عطا کر جو دلوں میں روشنی پیدا کر دے ، جو بے قرار ہو، بے تاب ہو اور آرام کو جلا دے ۔

میں وہ آنسو باغ میں بووَں اور اس سے آگ اُگے، ایسی آگ جو لالہ کی قبا سے آگ کودھو ڈالے (آگ جھڑنے لگے)

میرا دل ماضی کی کیفیتوں میں کھویا ہوا ہے اور آنکھیں مستقبل کی طرف جمی ہوئی ہیں ، میں بزم میں رہتے ہوئے بھی تنہا ہوں ۔

ہر کوئی اپنے اپنے خیال کے مطابق میرا دوست بن گیا لیکن کسی نے میرے اندر جھانک کر میرے اسرار جاننے کی کوشش نہ کی(یہ مولانا روم کا شعر ہے) ۔

یارب دنیا میں میرا ہم خیال (ساتھی) کہاں ہے، میں کوہ طور کا نخل ہوں میرا کلیم کہاں ہے ۔

اے خدا ! میں ظالم ہوں ، میں نے اپنے آپ پر بہت ظلم کئے ہیں ، میں ایک شعلے کو اپنی آغوش میں پالتا رہا ۔

ایسا شعلہ جو عقل و شعور کا اسباب و اثاثہ لوٹ کر لے گیا، جس نے عقل کے دامن میں آگ لگا دی ۔

عقل نے دیوانگی سکھائی، اس نے علم کی ہستی کا سازوسامان جلا کر رکھ دیا ۔

سورج اس کی تپش کی بدولت آسمان کی سی رفعت والا ہے، بجلیاں ہر وقت اس کا طواف کرتی رہتی ہیں ۔

میں شبنم کی طرح روتی ہوئی آنکھ بنا، جب کہیں یہ چھپی ہوئی آگ میرے سپرد ہوئی ۔

شمع کو تو میں نے کھلم کھلا جلنے کی تعلیم دی لیکن خود میں دنیا کی نظروں سے چھپ کر جلتا رہا ۔

آخر میرے بدن کے روئیں روئیں سے شعلے پھوٹ پڑے، میرے فکر کی رگوں میں آگ ٹپکنے لگی ۔

میری بلبل نے چنگاریوں سے دانہ دنکا چنا، اس (بلبل) نے آگ کی فطرت کا حامل (آتشیں ) نغمہ پیدا کیا ۔

میرے دور کے (افراد ملت کا) سینہ دل سے خالی ہے (کوئی صاحب دل نظر نہیں آتا) مجنون تڑپ رہا ہے کہ محمل خالی ہو گیا ہے ۔

شمع کے لیے اکیلے جلتے رہنا آسان نہیں ، افسوس کہ میرا ایک بھی پروانہ اہل نہیں ہے ۔

کسی غمگسار کا انتظار کرتا رہوں کب تک کسی رازدار کی تلاش میں دوڑتا پھروں

اے (رب ذوالجلال) تو ، کہ تیرے رخ سے چاند ستارے روشنی حاصل کرتے ہیں اپنی آگ جو میری جان میں رکھی ہے اسے واپس لے لے ۔

میرے سینے سے یہ امانت واپس لے لیجیئے، میرے آئینے سے جوہر کا کانٹا نکال دیجیئے۔

(اگر ایسا نہیں تو) پھر مجھے کوئی پرانا ساتھی ہی عطا کر، دنیا کو جلا دینے والے عشق کو آئینہ کر ۔

موج سمندر میں دوسری موج کے ساتھ مل کر چلتی ہے، باہم مل کر تڑپنا موج کی فطرت ہے ۔

آسمان پر ایک ستارہ دوسرے ستارے کا ساتھی ہے، روشن چاند، رات کی گود میں سر رکھے رہتا ہے ۔

دن، تاریک اور طویل رات سے پہلو مارتا ہے، آج اپنے آپ کو آنے والی کل پر گراتا ہے ۔

ایک ندی کا وجود دوسری ندی میں گم ہو جاتا ہے، ہوا کا جھونکا کسی خوشبو میں گم ہو جاتا ہے ۔

ویرانے کے گوشے میں رقص ہو رہا ہے، دیوانہ دوسرے دیوانے کے ساتھ ناچ رہا ہے ۔

اگرچہ تو اپنی ذات میں لا شریک ہے (لیکن پھر بھی) تو نے اپنی دلچسپی کے لیے ایک پوری کائنات سجا ڈالی ۔

میں صحرا کے گل لالہ کی مانند (تنہا) ہوں ، بھری محفل میں بھی تنہا ہوں ۔

میں تیرے فضل و کرم سے ایک ایسے رفیق و غمگسار کا طالب ہوں جو میری فطرت کے رموز سے پوری طرح واقف ہو ۔

وہ ایسا ساتھی ہو جو دیوانہ بھی ہو اور عقل مند بھی یعنی اسے دنیوی یا دنیاوی عزہ و جاہ سے کوئی سروکار نہ ہو ۔

تاکہ میں اپنی عشق و محبت کی آگ اس کی جان کے حوالے کر دوں پھر اس کے دل میں اپنا چہرہ دیکھوں ۔

اپنی مٹھی بھر خاک سے اس کا جسم بناؤں ، پھر خود ہی اس کا بت بن جاؤں اور خود ہی اسے تراشنے والا بھی بن جاؤں ۔